Антикризиснай штабть заседанияста

Мордовиянь Оцюнясь Артём Здунов 29 сентябрьста Республикань Кудса ётафтозе экономикать кемошинц и ширенц кирдеманц коряс антикризиснай штабть и коронавируснай инфекциять инголяманц коряс оперативнай штабть марстонь заседанияснон.
Республикань Здравоохранениянь министерствать пачфтеманц коряс, недяляста ковидса сярядихнень лувкссна аф ламода кирсь, тяка пингть панчфтольхть дополнительнай койка-вастт инфекционнай госпитальхнень эса—тя сотф сянь мархта, што сярядихнень ламошкасна—эряфкшу ломатть, конатнень коронавируснай инфекциять пингста вихонзакшнихть хроническяй урмасна. Сяс, кода азозе МР-нь здравоохранениянь министрсь Олег Маркин, эряви шарфтомс башка мяль тя категориянь ломаттнень ревакцинацияснон лангс. Васендакиге тя канневи Лямбирскяй, Темниковскяй, Зубово-Полянскяй и Рузаевскяй райоттненди. Башка азфоль: частичнай мобилизациянь условияса прививочнай кампаниясь кирдема башка контроль ала.
Заседанияса стане жа корхтафоль экономикань ключевой отраслятнень ширеснон кирдемань федеральнай и региональнай мератнень колга, системообразующай предприятиятнень производственнай мощностьснон пяшкотькшнемаснон, а стане жа частичнай мобилизациянь условияса ключевой производстватнень кадраса вешфксснон пяшкотькшнеманц квалма. Мордовиянь Оцюнясь азозе, кле, обстановкась веши стратегическяй планирования, предприятиятненди эряви лац-ряц ваномс-смекамс сембе пелькснень, сувафтомс тевс сембе внутренняй ресурснень, обеспечендамс специа-
листтнень тонафнемаснон и одукс тонафнемаснон, штоба аф нолдамс кадрань аф сатнемать.