Артём Здунов ётафтсь приём

Мордовиянь Оцюнясь, «Единая Россия» партиять региональнай отделениянц секретарец Артём Здунов ётафтсь приём.
Рузаевскяй райононь Красное Сельцо велень поселениянь депутатсь Максим Сорвачев пшкядсь эняльдема мархта—тиемс идень садти капитальнай ремонт. Сон строяфоль 45 кизода инголе и веши одкстоптома. Идень саду якай 60 идь, работайхть ниле группат. «Шабада миньцонк лама, посёлкась касы-виияй. Эряйхне тянь пяк учсазь»,—мярьгсь депутатсь.
Идень садти капитальнай ремонтсь тиеви «Комплексное развитие сельских территорий» госпрограммать мяльса кирдезь. Республикань Оцюнясь путсь задача—сай кизоня (тунда-кизонда) тиемс зданияти порядка и штоба 1 сентябрти тя объектсь нолдаволь тевс.
«Единая Россия» партиять региональнай отделениянц секретаренцты приёмс сашендсь Чамзинскяй райононь Комсомольский посёлкань эряйсь Татьяна Казимирова. Сон пшкядсь Артём Здуновонди Васенце микрорайононь лама квартирань кудонь эряйхнень лемста, што синьцост аф сатнихть благоустроендаф ваймама васттне. Эряйхне вешихть, штоба улель идень площадка. Тя кизефкссь кармай решандаф «Комплексное развитие сельских территорий» программать вельде. Ваймамань вастть петемац-мазоптомац арьсеф сай кизонди.
Региононь руководительсь мярьгсь райононь оцюняти васедемс ломаттнень мархта и содамс, кодамот идень площадкать строяманц коряс синь мяльсна-арьсемасна.
«Моледа и ваность,—пшкядсь Артём Здунов Чамзинскяй райононь оцюнять заместителенцты Алексей Тюрякинонди.—А финансированиять мархта кизефксть минь решандасаськ—тоса аф оцюфт карьхцне—6 миллиотт».
Галина Лушкина, Саранскяйста домкомсь, стане жа сась Марина Расковать ульцяса 23№, 25№, 27№ кудонь эряйхнень лемста эняльдема мархта. «Минь куд пирьфсонк ули модань оцю пакш, а иттненди эряви площадка. Аф сембонди зепс коре рамамс квартира од кудса, коса улихть тяниень пингонь идень площадкат»,—мярьгсь сон. Кудть пирьфоц петеви-мазоптови «Формирование комфортной городской среды» федеральнай проектть мяльс сявозь. Республикань Оцюнясь путсь задача—тиемс работать сай кизоть кизонь кофнень самс.
Саранск ошень округонь Горяйновка велень эряйсь Елена Лукьянова сашендсь приёмс кунардонь прябала мархта. Синьцост аш центральнай канализация. 2014 кизоня проектнай документациясь тифоль, но строямань тефне лядсть апак ушетт. Республикань Оцюнясь мярьгсь Саранск ошень округонь оцюняти Игорь Асабинонди и ЖКХ-нь министерствати сявомс тя кизефксть эсь контрольснон алу и азомс сонь решандаманксонза кит-ятт.
«Ушедода работама. Од кизоть самс нинге ули пинге. Катк специалисттне максыхть питне работань объёмтненди,—мярьгсь Артём Здунов.—Стане жа эрявихть вешемс финансированиянь источникт—тя инь стака кизефкссь. Но сон эряви решандамс».