Артём Здунов:«Военнослужащайхненди, конат тертьфт мобилизациять коряс, сембе пандоматне улест максфт эсь пингстонза»Артём Здунов:

Ётай недялять, 19 ноябрьста, Республикань Кудса Мордовиянь Оцюнять Артём Здуновонь руководстванц ала ётафтовсь Оперативнай штабть заседанияц. Фкя инь важнай кизефксокс ульсь военнослужащайхненди, конат тертьфт Мордовияста мобилизациять коряс, ярмаконь пандомать мархта сотф прябалась.
Региононь руководительсь кулхцондозе военнослужащайхненди пандоматнень эсь пингстонза макссемаснон коряс афсатыкснень машфтоманкса ётафневи работать колга Мордовия Республикань военнай комиссарть докладонц. Военкомть валонзон коряс, прябалатне сотфт персональнай даннайхнень регистрацияснон пингста эльбятькснень, банковскяй картатнень аф эсь пингстонза активацияснон или синь аф улемаснон мархта. Мордовиянь Оцюнясь кошардсь нюрьхкяня пингста ваномс тяфтама пшкядематнень ёткста эрть: «Эряви кирдемс соткст мобилизованнайхнень семьяснон мархта—минь тянь колга корхнеме ни. Ладяф сембе пандоматне улест пачфтьфт получайснонды. Даннайхнень эса эльбятькснень коряс—синь кунара ни эрявольхть петемс, пингта тянкса сатомшкаль».
Военнай комиссарти максф поручения аф пандоматнень коряс эрь случайть сявомс личнай контроль алу и пачфтемс пяшкодемаснон колга. Эряви азомс, региононь руководительть личнай участиянц пингста пандоматнень аф максомаснон коряс кой-кона кизефксне решандафтольхть оперативнай штабса азомдост меле мзярошка частонь ётазь ни.