Мордовиянь Оцюнясь Артём Здунов 14 октябрьста ётафтозе мобилизациять коряс республиканскяй призывной комиссиять очередной заседаниянц. Корхтафоль ломаттнень пшкядемаснон мархта работать колга, стане жа военнай службас сяда тов тердемати республикать анокламанц квалма.
Мордовиянь Оцюнясь азозе, што ломаттнень эзда тя темас коре пшкядематне стаки сашендыхть, но эздост арси сяда кржа, сяс мес цебярьгофневи нормативнай базась, конань мяльса кирдезь мольфтеви мобилизациясь. Республикань руководительсь азсь благодарностень валхт прокуратурань и федеральнай структурань представительхненди тя работаса лезнеманкса. «Тя пяк важна—примсемс видексонь решеният и аф нолямс эльбятькст, вдь синь сяда тёждя инголдамс, а аф петнемс меле,—мярьгсь Артём Здунов.—Октябрьста работаньконь вятемста минь сявоськ мяльс странань Президентть Указонц, кона келепнесыне тонафнемас коре призывть эзда острочкань туфталхнень, оборонно-промышленнай комплексонь работникненди призывс коре отсрочкань максомань порядкать коряс Россиянь Правительствать Постановлениянц, призывс серьгятьф граждаттненди кредитнай каникулань максомать колга Федеральнай законть. Тяда башка, сявондьсаськ мяльс системообразующай предприятиятнень коряс документтнень, конатнень примазень республикань Правительствась».
Мордовиянь Оцюнясь лятфтась Президентть аф кунардонь пшкядеманц колга, конань эса государствань оцюнясь кошардсь аф нолямс эльбятькст призывть пингста. «Эряви поладомс аф сатыксненди, конат нолявихть тя работать мольфтемста, крхка анализонь тиемать и машфнемс синь»,—китькстазе Артём Здунов.
Призывной комиссиять заседанияса республикань Оцюнясь азозе, што кемокстась специальнай военнай операциянь участникнень семьяснонды социальнай ширень кирдемань од мератнень колга указ. Эзонза сувсихть:
- школьникнень и СПО-нь тонафнихнень шити кафксть питнефтома андомасна;
- дополнительнай образованиянь госучреждениятнень эса питнефтома кружокне и секциятне;
-военнослужащайхнень тядяснонды-аляснонды пяле стационарнай формаса и кудса социальнай обслуживаниянь формаса питнефтома социальнай услугань максомась; - социальнай обслуживаниянь стационарнай организациятненди военнослужащайхнень тядяснон-аляснон очередьфтома примамасна;
- военнослужащайхнень семьянь членцнонды работань вешемаса лездомась;
- «Содействие занятости» федеральнай проектть мяльса кирдезь военнослужащайхнень семьянь членцнон профессиональнай тонафнемаснон и дополнительнай профессиональнай образованияснон ладямац;
- социальнай и лия пандоматнень оформляндамаса военнослужащайхнень семьянь членцнонды лездомась;
- военнослужащайхнень семьянь членцнонды питнефтома психологическяй лезксонь максомась;
- юридическяй кизефкснень коряс консультациянь максомась.
Заседаниять пингста ванфтольхть ломаттнень пшкядемасна, конат састь республикань Оцюнять лемс частичнай мобилизациянь кизефкснень коряс. Артём Здунов китькстазе: мобилизованнайхнень семьяснон мархта эряви лисендемс личнай связьс и фалу кирдемс ня кизефкснень контроль ала.