Мобилизациянь кизефксненди—
башка мяль

7 октябрьста Мордовиянь Оцюнять Артём Здуновонь председательстванц ала ётафтовсь Республиканскяй призывной комиссиять очередной заседанияц. Ванфтольхть прябалатне, конат васьфтьфтольхть частичнай мобилизациянь васенце этапть пингста.
Мордовиянь Оцюнясь мярьгсь, што ломаттнень пшкядемаснон коряс, конат сотфт мобилизациять пингста нолдаф эльбятькснень мархта, муфт кит-ятт синь решандаманксост. Кепотьксонди, шумбрашить лангс пеняцяматнень пингста мобилизованнайсь прважави дополнительнай медицинскяй обследованияс. Кизефксне, конатнень коряс эряви дополнительнай решения, лихневихть ваномс Республиканскяй призывной комиссияти. Региононь руководительсь шарфтсь мяль нормативнай акттнень лангс, конат лиссть тя недялять федеральнай уровеньца гражданонь эрь кодама категориятненди отсрочкань максомать коряс. Васендакиге корхтамась мольфтеви студенттненди «О предоставлении отсрочки от призыва на военную службу по мобилизации» РФ-нь Президентть Указонц колга.
«Эрь заявительти эряви максомс аф аньцек сёрматф ответ законодательствать мяльса кирдезь, но и корхнемс лична, содамс—сембось-аф решандаф, сембось ли шарьхкотьф»,—мярьгсь Артём Здунов. Пшкядематнень эзда, конат састь тя недялять, сяда сидеста васьфневихть призывонь категориятнень мархта сотф кизефксне, службас тердемань пункттнень эса медицинскяй комиссиятнень кальдяв работаснон лангс пеняцяматне, урманкса или сяряди радня ломанть мельге якаманкса отсрочкань максомать колга эняльдематне.
Артём Здунов эняльдсь шарфтомс башка мяль сашенды лездомать и ширень кирдемать колга эняльдематнень лангс, конат сашендыхть военнослужащайхнень и синь семьяснон эзда. Заседанияса ванфтольхть мобилизацияс коре военнай службас граждаттнень тердемань омбоце этапти анокламать и ётафтоманц коряс кизефксне и сембе уровенень призывной комиссиятнень работаснон цебярьгофнемац.