Мобилизованнайхнень семьяснон пшкядемаснон лангс эряви шарфнемс башка мяль

Мордовияста мобилизованнайхнень семьяснон социальнай ширде прянь марямаснон мельге фалу ванома Правительствань члеттненди, тяконь лувксса Председателень заместительхненди, муниципалитетонь оцюнятненди, сембе уровенень депутаттненди, партиецненди, общественникненди и бизнес-сообществати. Тяфтама задача путсь Артём Здунов военнослужащайхнень семьяснонды лезксонь максомань кизефкснень коряс совещанияса.
Региононь руководительсь азозе, што тяниень пингть фкя инь васенце афсатыкссь сянь эса, што мобилизованнайхнень семьяснон эзда сашенды пшкядематне ванондовихть пяк ламос. Кепотьксонди азозе случайть, мзярда лезксонкса пшкядсь мобилизованнайть рьвац, кона ащесь декретнай отпускса, теенза эрявсь рамамс идень ярхцамбяльхть. «6 октябрьста сась пшкядемась, кафта недяляда тяда инголе, а тинь коль ванондсасть сонь? Кда ломаттне тяштихть тейне, лисенди, мондедон башка синь кивок аф няйсыне, аф кульсыне»,—мярьгсь сон.
Зубово-Полянскяй райононь оцюнясь стане жа сялтфоль сянкса, што мобилизованнайхнень семьяснон прябаласна аф решандакшневихть курокста тозк вастова, а лихневихть республиканскяй уровеньц. «Тянь нолямс аш кода,—азозе Артём Здунов.—Сембе семьятненди эряви улемс районца учётса, оцюнять заместителензонды кирдема мархтост соткст, кизефнема, кода тевсна, мезьса лездомс. Улихть депутатт, улихть партият, улихть мобилизованнайхнень и синь рьваснон работань максысна, улихть профсоюст—сембонди кярьмодема тя работати».
Азфтольхть курокста работамань кепотьксневок—депутатскяй корпусть, бизнесть, республикань рядовой эряйхнень ширде, сатомшка оцю лезкс максси Миронь российскяй фондть региональнай отделенияц. Кой-кона муниципальнай и промышленнай предприятиятне активнайста кярьмодсть мобилизованнай сотрудникснон семьяснонды материальнай лезксонь максомати. Мордовиянь Финансонь и Юстициянь министерстватне ётафтсть системнай работа кой-кона пшкядематнень коряс, конат сотфт кредитнай каникулань максомать и шумотнень списандамаснон мархта. Республикань Здравоохранениянь министерствась максси лезкс и кирдьсыне контроль ала пшкядематнень, конат сотфт медицинскяй обслуживаниять мархта. Социальнай защитань, трудонь и населениять заняфшинц коряс министерствась сяда тов мольфтьсы мобилизованнайхнень семьяснон социальнай паспортснон тиемаснон коряс работать. Башка поручения максфоль МР-нь Правительствать Председателенц заместителенцты—энергетикань и ЖКХ-нь министрти Игорь Чадовонди. Тялоти эряви ваномс мобилизованнайхнень семьяснон жилищно-коммунальнай условияснон, башка сятнень, конат эряйхть частнай секторса.