Мордовиясь и Велень од ломанень российскяй союзсь кемокстасть соглашения

Артём Здунов и Велень од ломанень российскяй союзть председателец Дмитрий Пекуровскяй 19 ноябрьста Республикань Кудса кемокстасть Мордовия Республикать и «Велень од ломанень российскяй сюзсь» од ломанень общероссийскяй общественнай организациять ёткса сотрудничендамать колга соглашения.
Документть мяльса кирдезь арьсекшневи вятемс марстонь работа велень од ломаттнень социальнай, творческяй, образовательнай и предпринимательскяй инициативаснон ширеснон кирдемаса, шумбрашить кемокснеманкса условиянь тиендемаса, спортивнай инфраструктурать виияфнемаса, велень од ломаттнень массовай спортти и физическяй культурати водендакшнемаса, а стане жа традиционнай культурнай питнишитнень и мокшэрзянь народть историческяй коензон-обуцянзон ванфнемаса и кемокснемаса.
«Сай кизоста сявомок Россиянь Президентть поручениянц коряс арьсекшнетяма нолдамс тевс «Кадрат велети» оцю программать, тяни кочксесаськ пилотнай региоттнень сонь тевс сувафтоманкса. Мордовиясь, конешна, сувай синь ёткозост»,—мярьгсь Дмитрий Пекуровскяй.
Республикась кирди кеме соткст Велень од ломанень российскяй сюзть мархта. Ня шитнень Саранскяйса ётафтовсь «Спортть—вели!» велень семейнай командатнень ёткса Россиянь и Беларусень спортонь фестивальсь. Фестивалень участникокс арась 180 спортсменць Россиянь 28 регионцта и Беларусь Республикаста. Эрь кизоня «Спортсь велеса» федеральнай проектть вельде региононь аф колмода кржа физкультурно-спортивнай организациятне получсихть спортивнай инвентаренди и оборудованиянди сертификатт. Тядде конкурснай отборонь лидеркс арасть—Большеигнатовскяй райононь шабатненди дополнительнай образованиянь центрась, Темниковскяй и Торбеевскяй райононь детско-юношескяй спортивнай школатне.
Сяда тов Мордовиясь, конань ули эрявикс спортивнай инфраструктурац и кадрань анокламанкса базац, арай эрь кодама уровенень спортивнай пялькстомань, научно-практическяй конференциянь ётафтоманкса, велень территориятнень эса спортть виияфнеманкса эсь лацонь всероссийскяй центракс.