Мордовиянь Оцюнясь Артём Здунов 24 январьста примась участия «Единая Россия» партиять всероссийскяй совещаниясонза, кона ётафтовсь партиянь Генеральнай советть секретаренц Андрей Турчаконь председательстванц ала. Совещанияса корхтафоль странаса импортонь полафтомать колга.
Лятфтасаськ, 2022 кизонь тунданя «Единая Россия» партиясь нолдазе тевс «Кочкак минценнеть» импортонь полафтомать и индустриализациять коряс партийнай проектть. Сонь общественнай советонцты оцюнякс арась «Ростех» корпорациять генеральнай директороц Сергей Чемезов.
«Кочкак минценнеть» проектсь водендаф аралакшнемс предпринимательхнень и производительхнень, конат лезнихть импортонь полафнемаса, праваснон и кирнемс синь ширеснон, пуропнемок перьфканза общественнай организациятнень, НКО-тнень, образовательнай средань представительхнень, исполнительнай властень федеральнай и региональнай оргаттнень, активнай граждаттнень.
«Единая Россия» партиять импортонь полафтомать коряс проектть тиеманц коряс инициативанц ширенц кирдезе РФ-нь Промышленностень и торговлянь министерствась. Ведомствась максси производительхненди и заказчикненди информационнай систематнень тиемаснон коряс наработкат. Синь лезнихть сяда курокста ладямс производственнай и логистическяй цепочкат сятнень вастс, конат юмафтфтольхть санкциятнень тевс сувафтомдост меле.
«Единая Россия» партиясь марса «Ростехть» мархта региоттнень эса сувафнихть тевс РФ-нь субъекттнень территорияса «курокстонь лезксонь максомань» и медоборудованиянь автопаркть одкстопнеманц коряс проектт. «Одкстопнесаськ вастста вастс ётни мобильнай комплекснень, козякофнесаськ синь медицинскяй приборса. Тейнек удалась полафтомс омба масторонь бренттнень российскяйхнень и мархтонк ялгафни странаннетнень лангс. Тя ульсь тиф Ханты-Мансийскяй автономнай округса, Татарстанца, Мордовияса, Ставропольскяй крайса»,—азозе «Кочкак минценнеть» партийнай проектть общественнай советонц председателец, «Ростех» государственнай корпорациять генеральнай директороц Сергей Чемезов.
Мордовиянь пчксемань учреждениятненди «Ростехть» мархта сотрудничендамать мяльса кирдезь 2022 кизоня поступасть медоборудованиянь вете единицат—кафта маммографт и тевлавонь искусственнай вентиляциянь вете аппаратт. Синь работайхть 4№ Республиканскяй больницяса, 1№ Республиканскяй больницяса, Ковылкинскяй, Ардатовскяй, Краснослободскяй районнай больницятнень эса, Саранскяень 4№ поликлиникаса. Тядде омба масторонь бренттнень отечественнай и мархтонк ялгафни странань медоборудованиять лангс полафтомать коряс сотрудничендамась поладови.