Мордовиянь Оцюнясь Артём Здунов 5 декабрьста путозе кяденц Батыр Эмеевич Эмеевонь Мордовия Республикань Правительствать Председателенц заместителенц тевонзон тиендикс путоманц колга Указть алу.
Тянь квалма республикань Оцюнясь пачфтсь регионца башка экономическяй зонань тиемань кизефкснень коряс рабочай совещаниять пингста. Артём Здунов азозе: «Батыр Эмеевич вятезе Дагестанца Промышленностень министерствать, работась пяк лац. Тейнек удалась одукс нолдамс тевс ламоц предприятиятнень, конат сёлгома лангсотольхть, мольфтевсь цебярь работа промышленнай паркнень тиемаснон коряс».
Правительствать Председателенц од заместителец кармай заняф Мордовиять экономикас инвестициятнень водендакшнемаснон, касомань-вииямань институттнень мархта марстонь тевонь вятемать, ТОСЭР-нь паркнень пяшкотькшнемаснон, внутриреспубликанскяй и межсубъектовай производственнай кооперациятнень пуропнемаснон, госкорпорациятнень мархта марстонь работать, а стане жа башка экономическяй зонать тиеманц мархта.
Батыр Эмеевич Эмеев шачсь 1984 кизоня Дагестан Республикань Кизилюрт ошса. Шумордазе народонь ялгаксшинь Российскяй университетть «Мировая экономика» и «Юриспруденция» специальносттнень коряс. 2007 кизоста сявомок 2011 кизоти молемс работась Российскяй Федерациянь Экономическяй развитиянь и торговлянь министерствань макроэкономическяй прогнозированиянь департаментса; 2011 кизоста сявомок 2018 кизоти молемс ульсь промышленнай предприятиянь финансовай директоркс; 2018-2020 кизотнень покодсь Дагестан Республикань Промышленностень и энергетикань министерстваса, тяконь лувксса ульсь министрти заместителькс, Дагестан Республикань Правительствать Председателенцты васенце заместителькс. Содасыне английскяй и французскяй кяльхнень.
Рьвяяф, касфты ниле итть.