12 сентябрьста Саранскяйса ётафтовсь республикань министронь кабинетть заседанияц, коса ванондовсть социально-экономическяй виияфтомань кизефксне.
Спортонь и од ломанень политикань региональнай министерствать руководителец Александр Савилов азондсь, што сай кизоня Мордовияса арьсекшневи ётафтомс 600 малава спортивнай мероприятия, конатнень ёткса всероссийскяй серень 50 пялькстома.
МР-нь Правительствать Председателец Владимир Сидоров мярьгсь, што минь республикасонк ули оцю спортивнай инфраструктура: «Мордовия Арена» стадионць, панжевсь «Саранск Аренась», футбольно-легкоатлетическяй манежсь, лыжно-биатлоннай комплекссь и стак тов. Эряви сяда активнайста нолямс тевс спортивнай инфраструктурать Саранскяйса и республикань райоттнень эса окружной и всероссийскяй пялькстоматнень ётафнеманкса.
Ванондовсть Мордовиянь Оцюнять Артём Здуновонь Государственнай Собранияти Посланиянц эряфс ётафтоманц коряс Правительствать тевонь вятемань программанц пяшкотькшнеманц итогонза.
Премьер-министрсь башка лоткась республикань вятить сембе поручениянзон, конат путфт министронь кабинетть инголе, пяшкотькшнемаснон коряс эрявиксшить лангс.
Совещанияса стане жа ванондовсть Ромодановскяй районть виияфтоманц коряс платтне. Муниципалитетонь оцюнясь Сергей Ведяшкин азондсь инвестиционнай проекттнень эряфс ётафтомаснон колга, конатнень ёткса велень хозяйствань культурань видьмонь нолямань комплекснай центрать строямац, комбикормовай заводть техническяйста одкстоптомац и лия кизефкст.
Владимир Сидоров мярьгсь муниципалитетонь руководительти сяда оцю мяль шарфнемс заработнай платать касфтоманц, аграрнай комплексть, ёмла и средняй предпринимательствать виияфтомаснон, туристическяй ширеть, инвестиционнай проекттнень эряфс ётафнемаснон коряс кизефксненди.