Саранскяйса МР-нь Торгово-промышленнай палатать площадкаса ётафтовсь Мордовиянь Оцюнять Артём Здуновонь региононь Од ломанень правительствать составс конкурснай кочкамань сяськихнень мархта васедемац. Конкурссь ётафтовсь 2022 кизонь 15 апрельста сявомок 17 майти молемс и лездсь мумс инь ёнюфнень и асуфнень.
—Кочкаф 13 сяськи. Од ломанень правительствать васенце составонц лангс минь путнетяма оцю надиямат. Од ломанень министрсь должен улемс региональнай Правительствань министрти афкуксонь дублёркс. Важна, штоба тинь малаткшнеледе эсь обязанностентень пяшкотькшнемаснонды оцю ответственностень марязь. Задачат путневихть серьёзнайхть,—мярьгсь Мордовиянь Оцюнясь.
Республикань руководительсь азсь мяль путомс Од ломанень министронь кабинетонь члеттнень региональнай Правительствань министрхненди лездыкс. Од чиновникне кармайхть примсема участия региононь оцю и эрявикс мероприятиятнень эса. Ётксост од предпринимателень съездсь, бизнес-сообществать мархта васедематне, научнай конференциятне, а стане жа благотворительнай и экологическяй акциятне.
Арьсекшневи ладямс марстонь тевонь вятема МР-нь Госсобраниять видеса Од ломанень парламентть, «Единая Россия» Всероссийскяй политическяй партиянь «Од гвардиять», а стане жа «Монь Мордовиязе» экспертнай клубть мархта.
Мордовиянь Од ломанень парламентонь члеттне азондсть сай пингонди планцнон колга. Эздост лама: регионца од элеваторонь и складской помещениянь эвондамать эзда сявомок экономическяй стака задачатнень пяшкотькшнемаснонды молемс.