3 октябрьста Республикань Кудса ётафтовсь Мордовия Республикань мобилизациять коряс призывной комиссиять заседанияц, коса тифтольхть итокт частичнай мобилизациянь васенце этапти. Комиссиянь членда башка эсонза примасть участия Мордовия Республикань прокурорть тевонзон тиендисна Владимир Ерофеев и Пензенскяй гарнизононь прокурорсь Андрей Аношкин.
Мордовиянь Оцюнясь Артём Здунов, кона ащи республиканскяй призывной комиссияти оцюнякс, башка лоткась сянь лангс, што задачать, конань путозе Верховнай главнокомандующайсь, РФ-нь Президентсь Владимир Путин, комплектованиянь васенце этапса регионць пяшкодезе педа-пес. Тяниень пингть кеме контроль ала кирдеви призывникнень и синь радня и мала ломаньцнон эзда пеняцяматнень ванондомасна. РФ-нь Президентть поручениянц коряс, работать качестванц цебярьгофнеманкса республиканскяй и муниципальнай призывной комиссиятнень лувксс сувафтфтольхть прокуратурань представительхне.
«Законодательствать мяльса кирдезь миньцонк ладяфт мобилизациять пингста военнай службас тердемать коряс шарьхкодеви вешфкст. Сембе синь пуроптфт законть эса, азфт Президентть, Оборонань министерствать мархта,—мярьгсь Артём Здунов.—Тяка пингть мобилизационнай мероприятиятнень пингста ломаттнень эзда сашенды тя темас коре лама кизефкс. Пеняцямат сашендыхть и тейне, и «пси линияв», лама кизефкста соцсетьтнень эса мушенды Регионть мархта управлениянь центрась. Эняльдян сембе ответственнайхненди пингонь апак тарксек, а главнайсь— аф озадонь седихть ащезь сявондемс мяльс эрь сигналть. Башка азса, што ня шитнень тяштьфтсть пря и лама доброволец. Мялезе спасибамс земляконьконди, кие аф пелезь срхкась мирнай менельть и семботь, мезсь тейнек питни, аралама. Тейнек эряви обеспечендамс мобилизованнайхнень бытснон, штоба боевой анокламань сембе мероприятиятне республикань эряйхненди улельхть пяшкотьфт педа-пес. Тячи ёран лична молемс боевой слаживаниянь вастти, корхнемс боецнень мархта, ваномс, сембе-аф эрявикссь синь ули, кодама кизефксонь решандамаса эряви лездомс семьяснонды, мзярс синь кармайхть военнай службаса. Минь пачфттяма цёраньконди бытовой парши мархта оцю посылка. Лезкс синь кочкамасост максси и бизнессь, и тёжятть аф озадонь седихть ащи ломанць. Сембонди оцю сюкпря».
Заседаниять пингста ванондовсть мобилизациять коряс военнай службас тердемань омбоце этапть ётафтоманцты анокламать и сембе уровенень призывной комиссиятнень работаснон цебярьгофнеманц мархта сотф кизефксне.
Тяниень пингть мобилизованнайхнень и синь радняснон эзда пеняцяматнень ламошкасна сотфт шумбрашить мархта. Тянкса республикань Оцюнясь мярьгсь виияфтомс военно-врачебнай комиссиятнень работаснон.
Заседанияса ванондовсть Мордовиянь Оцюнять лемс саф пшкядематне, конат сотфт частичнай мобилизациять мархта. Сембе случайхнень коряс содафоль, што отсрочканди туфталхт ашельхть.
Частичнай мобилизациять и призывс коре мобилизациять пингста военкоматтнень работаснон сяда лац ладяманкса примаф решения панжемс Саранскяйса дополнительнай призывной пункт.
«Сюконян земляконьконди, кие аф пелезь срхкась мирнай менельть аралама»
