Ётай недялять Мордовиянь Оцюнясь Артём Здунов ётафтозе Антитеррористическяй комиссиять заседаниянц. Корхтамась мольфтевсь терроризмать каршес ащемать коряс сембе уровенень властень оргаттнень работаснон цебярьгофнеманц колга.
«Терроризмать каршес ащемань обстановкась лядонды стакакс, тиендевихть терактт Россиять территорияса, конатнень пингста коль сяда сидеста тевс нолявихть беспилотникне, вракне вешендихть кит-ятт гражданоньконь, сядонга пяк од ломаттнень, террористическяй организациятненди, преступнай тевонь тиемати водендаманкса. Сембось тя корхтай сянь колга, што антитеррористическяй безопасностень кизефксне фалу кирдемат контроль ала. Эняльдян пяшкотькшнемс АТК-ть решениянзон, шарфтомс башка мяль потенциальнай пелькснень анализснонды. Эряви шарфтомс мяль национальнай и религиознай ширетнень коряс обществаньконь срафтоманцты тяряфнематнень лангс. Президентоньке китькстазе: ся, мезсь тяни тиендеви Россиять каршес,—тя странаньконь, лама национальностень и конфессиянь государстваньконь лангс атакатнень ёткста фкясь. Аф карматама юкснема профилактическяй работать важнайшинц квалма, сядонга пяк од ломаттнень ёткса. Тяса ули кода водендакшнемс общественнай организациятнень, религиознай объединениятнень».
Стане жа МР-са АТК-ть Председателец лятфтазе, што малаткшни Сяськомань шись, сембонди священнай илась. Республикасонк арьсеф ётафтомс культурно-массовай, военно-патриотическяй и спортивнай лама мероприятия. Анокламась мольфтеви сембе райоттнень эса.
«Властень оргаттненди и правоохранительнай структуратненди граждаттнень безопасностьсна—васенце вастса!—мярьгсь Артём Здунов.—Сембода главнайсь—аф нолдамс зиян».
Тяда башка, Мордовиянь Оцюнясь макссь поручения примамс дополнительнай мерат памятникнень, обелискнень и Отечествань аралайхнень калмама вастснон ванфтоманкса.
Великай Отечественнай войнаса Сяськомать 80 кизонцты лемтьф мероприятиятнень анокламста и ётафтомста общественнай безопасностть и правопорядкать обеспечендамаснон колга пачфтсть МР-ть эзга МВД-нь полициянь начальникть заместителец Владислав Пинаев и МР-ть эзга Росгвардиянь Управлениять начальниконц заместителец Василий Бикурев.
Стане жа АТК-ть заседанияса корхтафоль межнациональнай и межконфессиональнай сотксонь сфераса обстановкать, антитеррористическяй контентть анокламанц и келептеманц, терроризмать профилактиканц коряс субъекттнень работаснон цебярьгофнеманц колга.
Ня кизефкснень коряс кулхцонтфтольхть Культурань, национальнай политикань и архивнай тевонь, Образованиянь министерстватнень, Н.П.Огарёвонь лемса МГУ-нь терроризмань и экстремизмань идеологияти каршек ащемать коряс Координационнай центрать руководительсна, Инсарскяй муниципальнай райононь оцюнясь, МР-нь Оцюнять и МР-нь Правительствать Администрацияснон и Саранскяй кооперативнай институтть представительсна.