Ня шитнень Мордовиянь Оцюнясь Артём Здунов ётафтсь васедема МР-нь од ломаттнень тевснон коряс Госкомитетть председателенц Анастасия Гришневать мархта. Корхтамась мольфтевсь регионца од ломанень политикать эряфс ётафтоманц колга.
Анастасия Гришнева пачфтезе, што 13 июньцта сявомок 17 июнти молемс Владивостокса ётафтовсь исполнительнай властень оргаттнень руководительснон, конат отвечайхть од ломанень государственнай политикать эряфс ётафтоманкса, Всероссийскяй семинарсна-совещаниясна. Пингстонза тифтольхть итокт 2023 кизонь мониторингти. Мордовия Республикась тага сувась ТОП-5 рейтингти аф 200 тёжяньда кржа ломань мархта группать эса. Показательхне, конат сявондевсть мяльс рейтингть тиемста, няфнезь инфраструктурать, добровольчествать, патриотическяй воспитаниять, касы поколениять мархта работать виияфнемаснон. Тя—республикань командать лац ладяф работанц результатоц.
Совещанияса корхтафтфоль «Молодёжь и дети» национальнай од проектть пяшкодеманц колга. Сон ушедсы эсь работанц 2025 кизоня. Тя нацпроектти операторкс ащи «Росмолодёжсь».
Васедемаса стане жа корхтамась мольфтевсь Васенцетнень Движенияснон федеральнай проектонзон эса республикать участвовандаманц колга. Республикась активнайста работай тя ширеть коряс. «Ноябрь ковть песта Саранскяйса ётафтови васенце лезксонь максомать коряс чемпионатть всероссийскяй финалоц. Тяни странань сембе субъекттнень эса ушедови региональнай отборсь. Миньге аноклатама команда»,—азозе Анастасия Гришнева.
Мордовиянь Оцюнясь шарфтсь мяль тя работать эрявиксшинцты. «Тейнек эряви кода можна сяда лама ломань тонафтомс васенце лезксонь максома. Минь покоттяма тянь коряс, ширезонк сашендыхть специалистт Россиянь Здравоохранениянь министерстваста. Эрьда тонафтсаськ школатнень, СПО-нь учреждениятнень, вуснень»,—мярьгсь Артём Здунов.