17 октябрьста МР-нь Правительствать заседанияса ванондовсть социально-экономическяй виияфтомань инь эрявикс кизефксне. Региональнай Правительствань председательсь Владимир Сидоров мярьгсь муниципальнай райононь оцюнятненди и министронь кабинетонь члеттненди—райоттнень кураторснонды макссемс мобилизованнайхнень, конат участвовандайхть специальнай военнай операцияса, семьяснонды сембе ширдень лезкс.
Правительствань члеттне кирдезь законопроектть ширенц, кона максси гарантия ломаттненди, конат эсь воля примайхть участия специальнай военнай операцияса, ванфтомс синь работама вастснон.
Мордовияса мольфтеви инженернай коммуникациятнень электроннай схемаснон тиевомаснон коряс оцю работа. Стане жа аноклавихть транспортнай планированиянь документтне, конатнень ёткса транспортнай инфраструктурать комплекснайста виияфтомань программась. Ня мероприятиятне мярьгондихть тиемс республикань инженернай и транспортнай инфраструктурань даннаень марстонь база и арьсемс населенияти цебярь услугань максомать коряс синь работаснон эрь кодама ситуацияса.
Совещанияса ванондовсть тялонь пингти дорожнай хозяйствать анокламанц коряс кизефксне. Владимир Сидоров азозе, што сембе муниципальнай райоттненди эряви анокламс техникать и курьксть эзда сатомшка материал, эсь пингстонза кемокстамс сембе населённай пункттнень эса китнень чистендаманкса контрактт. «Работась пяк серьёзнай: эряви ваномс транспортть, тяконь лувксса школьнай маршруттнень работаснон мельге»,—китькстазе премьер-министрсь.
Кепсевсь нинге фкя кизефкс—урозь-иттнень эряма вастса обеспечендамасна. 2022 кизонди нолдаф ярмакнень марстонь объёмсна—120 миллион цалковай, конатнень вельде арьсекшневи рамамс 84 квартира. Стане жа дополнительнай финансированиять вельде кизоть пенцты нинге ниле урозь-иттне получайхть эряма вастт.