Инголдамс коронавируснай
инфекциять лезды вакцинациясь

15 сентябрьста Республикань Кудса ётафтовсь коронавируснай инфекциять инголяманц и келемоманцты кить персеманц коряс оперативнай штабть заседанияц.
Мордовиянь Оцюнясь азозе, што шиньберьф сярятьксни 200 лама ломань. «Ули аф оцю кирема, но тяка пингть 158 пациентсь ащихть ковиднай госпитальхнень эса, ёткстост 23 ломанць—реанимациясот,—мярьгсь Артём Здунов.—Тянь мархта ряцок касонды гриппса сярядихнень лувкссна».
Сембода лама урмаськотфта Саранскяйса, Старошайговскяй, Лямбирскяй, Ичалковскяй и Большеберезниковскяй райоттнень эса. Кассь сярядихнень лувкссна шабатнень ётксовок.
«Республикань Образованиянь министерствати, Роспотребнадзорти и муниципальнай образованиянь оцюнятненди эряви эрь шиня ваномс иттнень ёткса урмать келемоманц мельге и примсемс мерат главнай санитарнай врачть мярьгоманзон мяльс сявондезь»,—мярьгсь вице-премьерсь Галина Лотванова.
Инголдамс урмань од волнать ули кода аньцек эсь пингстонза тиф вакцинацияти и ревакцинацияти.
Республикаса коронавируснай инфекциять каршес васенце компонентть мархта вакцинациянь планць пяшкотьф 94 процентс, ревакцинациять коряс—78 процентс. Ули кода кочкамс вакцина мяльс коре—Мордовияв поступась 60 тёжянь доза назальнай препарат. Маластонь пингть региону пачфтеви стане жа 80 тёжянь доза вакцина гриппть эзда.