Аф эрь ломанти ули кода тонадомс гончарнай тевть, а кда мокшекс азомс, сёвоньцта сяканянь тиемань тевть. Инголи сон пяк содафоль, арсесь асу мастерхненди прянь тряма вастокс. И тя шарьхкотьф. Гончарнай шарксть лангса тиф, а меле пси пянакудса аш ни кода календаф кядьготне тевс нолявсть эрь кудса. Тяниень пингть гончарда (сяканянь тиида) ляткшни коль сяда кржа, а синь тевсна арасть декоративно-прикладной искусствань башка пяльксокс. Сяс, улема, Саранскяйса Культурань республиканскяй Дворецса ётафтф фкя пуромксть пингста ламос ащень гончарть маласа, кона пильгонзон мархта маштозь шарфнезе шарксть, а кядензон ала тя пингть сёвонень покольсь арсесь мазы сяканякс. Ашель мялезе кирнемс сонь тевда, но сембе сяка маладонь и кизефтине лемонзон-пилензон. Тяфта и арань содафокс Ичалковскяй райононь Рождествено велеса шачф эрзянь алять Александр Петрович Русяевонь мархта. Сон—М.Е.Евсевьевонь лемса Мордовскяй государственнай педагогическяй университетонь художественнай образованиянь кафедрань старшай преподаватель.
С.М.Кировонь лемса Ичалковскяй педагогическяй колледжть шумордамдонза меле 2010 кизоня поступась М.Е.Евсевьевонь лемса Мордовскяй государственнай педагогическяй институту педагогическяй и художественнай образованиянь факультету, тонафнесь «Изобразительное искусство» профильс коре. 2015 кизоня шумордазе магистратурать. 2018 кизоста сявомок тонафнесь аспирантураса.
Александр Петрович Русяев преподаватель тяфтама дисциплинатнень коряс: «Скульптура», «Образовательнай процесса ёмла форматнень скульптурасна», «Лепкась—идть художественнай творчествасонза» и стак тов.
А.П.Русяев—Мордовия Республикаса содаф мастерсь-гончарсь. Казьф «Мордовиянь инь цебярь товархне» (2013-2018 кизотне), «Россиянь 100 инь цебярь товархне» (2014 кизось) Лауреатонь диплопнень мархта. Аф весть примсесь участия Художественнай творчествань Всероссийскяй выставкатнень эса—Гжельса, Москуса, Н.Новгородса, а стане жа маштомошинц няфнезе художественнай творчествань эрь кизонь республиканскяй выставкатнень эса.
Творческяй, асу ломанць тевти кельгоманц вельде ётафнесыне занятиянзон профессиональнай оцю серьса. Эрсь эздост аноклаф студенттнень тонафнемань и творческяй тевснон мяльса кирдезь. Александр Петрович машты эрь тонафнить ваймос кинянь-яннянь вешема, тяфта сон сяда оцю мяль шарфни учебнай материалти. Студентонза сидеста лисендихть сяськикс художественнай творчествань международнай и всероссийскяй выставкатнень-конкурснень эса. Кепотьксонди, «Национальнай достояния», «Искусствань пропилейхне», «Монь страназе—монь Россиязе».
Профессиональнай тевсонза оцю сатфксонкса Александр Петрович казьф М.Е.Евсевьевонь лемса Мордовскяй государственнай педагогическяй институтть Почётнай грамотанц мархта.
А.П.Русяевонь валонзон коряс, гончаронь асусь эсонза эвондась апак учсек, хуш шабакс сон варчсезень виензон тя тевса. Фалу мялезонзоль мезевок тиендемс эсь кядензон мархта. Декоративно-прикладной творчествати асувонц шарьхкодезь педагогическяй колледжень преподавательхне. Васенда тя ульсь шуфтста керсемась. Гончарнай тевти Александр Петрович мяль шарфтсь педагогическяй институтса (тяни сон университет) тонафнемстонза. Эстокиге, кле, шарьхкодень, што тя тевсь—монь! Тонафнесь сяда содаф и оцю опыт мархта мастерхнень эзда, ётафнемок гончарнай искусствати уликс сембе пингонц.
«Гончарнай шарксть лангса творческяй вешендемась и лангсонза мезеньге тиемась максси тейне вийхть, эрьгат»,—мярьгсь Александр Петрович.
Сёвоньцта васенце тифоц педа-пес ашезь удала, но мастерсь, шарьхкотьф, мяляфтсы сонь пяк лац. Тя ульсь акша сёвоньцта сяканя. Аф кодамоль формас коре, фкя ширеняц эчколь, а омбоце ширде шуваняль. Тяни тя сяканясь ванфтови А.П.Русяевонь алянц мастерскойсонза. Аляцка тевфтома ашезь ащекшне—тиендсь жуватань фигурат шуфтонь корягаста, мокорьста.
Тяниень пингть ламонц од ломаттненди гончаронь тевсь—тя, рузкс азомс, экзотика. Сотф тя сонь аф пяк содафокс улеманц мархта. Но стирьхне и цёратне, конат тонафнемстост кярьмотькшнихть пластичнай материалхненди, сембода пяк гончарнай шарксть лангса, меле аф явондыхть мархтонза. И кочксесазь сонь выпускной квалификационнай работаснон тиемста, а меле арсихть афкуксонь профессионалкс тя тевса.
Александр Петрович Русяев маряй оцю гордость ингольдень ученицанц Александра Куксать инкса, кона тяниень пингть тонафты гончарнай искусствати итть «Сириус» образовательнай центраса.
Кда корхтамс эряфса инь питнить колга, Александр Петрович васенце вастти путнесыне семьянь питнишитнень. Рьванц, Юлия Валерьевнань мархта, касфтыхть колма итть. Колмоце шабанясна шачсь ёфси аф кунара. Оцю цёраснон лемоц Марк, стирняснон—Ирина, а одс шачинять—Даниил.
Ётка пингстонза А.П.Русяев кельгсы переса работаманц. Тиендьсы тянь оцю мяльса!
Т.АЛЬШИНА.