Нинге аф кунара Зубово-Полянскяй райононь Жуковка велеть колга цебярь славась мольсь сембе округаса. Семьятне оцюфтольхть. Ломаттне тяса трудонь кельгихть. Покодсть колхозса, лия вастова. Велень средняй общеобразовательнай школаса тонафнесь лама идь. Тяни школать сёлгозь. Шабада лядсь кржа. Содамошинь кочкама усксесазь Ширенгушень школав.
Вов и С.А.Панишкинавок Жуковка велень школати макссь 33 киза. Работась начальнай класснень мархта. Кельгозь иттне, тонафты ялганза. А конашкава Светлана Алексеевна сонць кельгозень эсь тонафтыень тевонц, учитель ялганзон и учениконзон. И тянемс кельгсыне. Фкявок ученикоц аф ётай кудонц вакска. Сувсихть седикс-ваймокс корхнема, пара куляснон азома. Пади, мокшавась тя пингс школаса и покодель. Но сонь сёлгозь. Тевфтома тя асу, машты кядь авась ашезь ляда. Сявозь велень клубу работама. И вов ни ниле кизот сон тиендьсыне клубонь азоравань тефнень. Аш стама ила Жуковка велеса, Зубово-Полянскяй районца, да и республикаса, коса ба афоль прима участия Светлана Алексеевна. Нят и концертт, и фестивальхть, и кодама повсь пялькстомат. Тяддевок «Шумбрат, Мордовия!» республиканскяй народнай творчествань фестивальс-пялькстомас усксезе «Рукотворные чудеса» выставканц. Сембе работатнень мокшавась тиезень эсь кядьсонза. Пуроптсь перьфканза лама ваныда. Ломаттненди няфтьсь и мастер-класс.
С.А.Панишкина Жуковка велеса шнама ломань. Семьянц колга велеряйхне корхнихть аньцек шнама валса. Мирдец, Алексей Николаевич, трудонь кельги мокшаля. Коса аньцек ашезь покотькшне. И эрь вастса кадондсь эсь колганза аньцек шнама лятфнемат. Тянивок оцю хозяйствасна. Кирдихть кафта тракст. Улихть лия жуватасна. А теест аноклама тише, сёра.
—Велеса ваймамать колга эряви юкстамс,—корхтай Светлана Алексеевна.—Аньцек варьхмоди шись, тонь учтядязь тефне.
Светлана Алексеевнань и Алексей Николаевичень кафта идьсна. Синь оцюфт ни. Стирьсна, Елена Алексеевна, аделась строительнай институт. Эряй Москуса. Сонцень строямань бизнесоц. Касфты цёранянц эса. Данилонди вете кизонят. Цёрасна, Денис Алексеевич, аделазе Мордовскяй госуниверситетонь велень хозяйствань институтть. Служась армияса. А тяни Зубово-Полянаса сонцень бизнесоц, пети техника.
—Эсь эряфозень лангс мон аф пеняцян, сембось минь лац,—шумордазе корхтаманц Светлана Алексеевна.—Кда иденьконь сембось лац, тееньк пара кафтонь-крда.
Илья Вешкин.