10 апрельста С.Д.Эрьзянь лемса изобразительнай искусствань республиканскяй музейса панжевсь Мордовиянь Народнай и Россиянь Заслуженнай художникть Людмила Нарбековать персональнай выставкац. Сонь ваномонза сашендсть художникть творчестванц кельгиенза, культурань и искусствань деятельхть, а стане жа государственнай исполнительнай и законодательнай властень представительхть.
«Ситцевая Русь» выставкати Людмила Нарбекова лихтезень инь цебярь картинанзон, конатнень сон сёрмадозень мекольдень колмогемонь кизотнень.
Саранск ошень художественнай училищань студенттне няфтезь пуромфненди национальнай костюмонь коллекциять, кона тифоль Людмила Нарбековать эскизонзон коряс.
Сяльде художникть персональнай выставканц панжевоманц мархта поздравляндазе Мордовия Республикань Оцюнясь Артём Здунов.
—Людмила Николаевна,—мярьгсь Артём Алексеевич,—тонь тефнень коряс С.Д.Эрьзянь лемса музейсь содаф аф аньцек Россияса, но и омба масторса. Арьсян тейть творческяй од сатфкст кода художниконди, стане и музеень руководителенди!
Людмила Нарбековать персональнай выставканц панжевоманц мархта поздравляндазе и сиянь медальса казезе Россиянь Художниконь Академиянь Приволжскяй федеральнай округса Академиять представителец Светлана Кузнецова.
Тяфта жа оцю оценка Людмила Нарбековать творчестванцты макссь Российскяй Федерациянь Сенаторсь Пётр Тултаев.
Художникть поздравляндазь Общероссийскяй Народнай фронтть региональнай отделениянц сопредседателец Олег Каштанов и лиятне, кинди мала и питни сонь творчествац.
Сяльде Людмила Николаевна ётафтсь экскурсия картинань выставкать эзга.
Выставкась кармай работама 22 майть самс.
Владимир НЕСТЕРОВ.