Общественнай тя территориясь — фкя инь оцюсь Саранск ошень округса. Меля сон сяськс «Жильё и городская среда» нацпроектонь «Формирование комфортной городской среды» федеральнай проектть рамкаса Всероссийскяй рейтинговай вайгялень максомаса. Лиякс азомс, ошеряйхне кочказь тя вастть, штоба тядде сон петеволь-мазоптоволь. Тянкса нолдафт ярмакт федеральнай бюджетста. Работатне ушетфт ни.
Кода азозе Саранск ошень округонь администрациянь Ошень хозяйствань кизефкснень коряс управлениять начальниконц васенце заместителец Алексей Матюшин, тяниень пингть подряднай организациясь — «ТСК Вектор» ООО-сь мольфтьсыне территориять петеманди-мазоптоманди анокламанц коряс тефнень: срафтф-калафтф ташта сценась, «сязьф» асфальтобетоннай вельхкссь, урядафт бордюратне и идень площадкась. Маластонь шитнень ушедови коммуникациятнень ладямасна.
Петемда-мазоптомда меле общественнай тя вастсь арай аф содавикс. Тяса эвондайхть ёмла архитектурнай формат, ялга якамань од кинят, ладявихть эземнят, тиевихть идень и спортивнай площадкат, озафтовихть кусторкскат и панчфт.
Кода мярьгсь Алексей Васильевич, петемань-мазоптомань тефне мольфтевихть графикс коре, сембе работатнень арьсекшневи шумордамс тяддень август ковста.
Тияк лятфтасаськ, што тяниень пингть, 30 апрельть самс, Саранскяйса мольфтевиты Всероссийскяй рейтинговай вайгялень максома ся территориять инкса, кона ули петьф-мазоптф 2025 кизоня «Жильё и городская среда» нацпроектонь «Формирование комфортной городской среды» проектть вельде. Кочкамась мольфтеви колма общественнай территориятнень — Советскяй площадть, Фонтаннай спускть и Мордовскяй ульцяста скверть ёткса. Эрьти ули кода максомс вайгяленц. Тиемс тянь можна 13.gorodsreda.ru сайтса.