Пингсь содай молеманц. Омбоце ковсь ни ульцяса азорондай тундась, шиста шис эреклафнесы перьфпяльть. Сяда сидеста и коль сяда лямбоста эжди шинясь, а шуфтонятне аф тячи-ванды щасазь эсь сянгяря нарядснон. Тундась—инь цебярь пингсь снимандаманди. Тяда ёта тя мазышить вакска, мокшень стирьхть! Тифтеда снимкат национальнай щамса-карямса, кучесть редакциязонк, азондода эсь колгант и минь пара мяльса сувафттядязь «Мазыхть мокшень стиреньке» конкурсонь участницатнень лувксс. Кизоть песта, кода фалу, тиевихть итокт и азовихть сяськихнень лемсна.
Тяддень колмоце участницаньконь лемоц Наталья Вирясова. Шачсь-кассь стирсь Зубово-Полянскяй райононь Од Потьма велеса мокшень семьяса. Тядяц покоди завучекс велень школаса, аляц—вяти хозяйства.
Наташа зрнянь медальса шумордазе Од Потьмань школать и поступась тонафнема Саранскяи—Н.П.Огарёвонь лемса Мордовскяй государственнай университетонь филологическяй факультетонь национальнай отделенияв. Тяни сон 4-це курсонь студентка. Стирть мялец тядянц лаца сотомс эряфонц школать мархта, арамс учителькс. Кода азозе сонць, тядде ни ёрай варжамс виензон кочкаф профессияса. Университетса Наташа аф аньцек лац тонафни, но и аф лядонды ширеса ётафневи мероприятиятнень, факультетть и вузть общественнай эряфснон эзда.
Шкабавазсь казезе тячиень героиняньконь мазы вайгяльса. Морсема Наташа ушедсь ёмластокиге. Лиякс ашель кода, вдь и алянц, и тядянц ширде пцтай сембе радня ломаненза вайгялюфт. Школаса стирсь морсесь эрь-кодама пуромксса, а оцю класса тонафнемста тертьфоль велень «Субботея» фольклорнай коллективти. Ансамбльть мархта Наталья Вирясовась выступандакшнесь и эсь аймаксост, и республиканскяй сцена лангса—«Шумбрат, Мордовия!» Народнай творчествань республиканскяй фестивальса.
Вузса васенце курсста сявомок Наташа ушедсь морсема филологическяй факультетть видеса пуроптф «Нармоннят» фольклорнай ансамбльса. Аф ваномок одксшиснон лангс, тя коллективса морсихненди-студенттненди ули кода арамс ряцок профессиональнай артисттнень мархта. Эрь кизоня коллективсь аралакшнесы филологическяй факультетть честенц «Студентонь тунда» конкурсса. И тя аф сембе. Мордовиянь «Нармоннятнень» вайгяльсна кулентьфоль лия региоттнень эсовок. Ансамбльсь няфтезе маштомошинц форумса и фестивальса Йошкар-Оласа, Чебоксарыса, Пермьса и лия вастса. Профориентационнай работа мархта уленди республикань райоттнень эса. Сценать лангс стирьхне-артисткатне фалу лисендихть стилизованнай, национальнай щамса, конатнень теест максозь университетса. Наташать ули сире пингонь мокшень щамоцка, конань теенза кочказе щавац, Раиса Алексеевна. Сиренясь афкуксонь мастерица, машты и стама-кодама, и крганянь-мезень кочкама. Кода няйсасть фотографиятнень лангста, мокшень щамсь пяк ладяй Наташати. Аф стирь, а афкуксонь мокшень баярава!
Аш кода аф азомс и сянь, што тячиень конкурсантканьке трудонь кельги, стакада-сталмода аф пели ломань. И тя ётась теенза тядянзон-алянзон эзда. Наташать тряенза-касфтыенза фалу кирнесть и кирдихть лама жувата, оцю пересна. Ули Вирясофнень нешкепересновок. Наташа ёт ёмласта лезни сембе тевса. Тянивок ошса эрямста ваймама шитнень най эряскоды Од Потьмав. Кельгсы стирсь велеть. Тяса ульцяса-коса фалу кайги шачема-касома кяльсь, салай мяль мазы перьфпяльсь, ару кожфсь.
Наталья Вирясовась—панжада вайме и паронь арьси ломань. Аф стак сонь лама ялгадонза, конатнень мархта оцю мяльса ётафнесы ётка пингонц.
Ольга ЕВДОКИМОВА.
Фототне Николай КАРАНОВОНЬ.