Мордовияса ётафтови «Од вий» фестивальсь

Тядде «Од вий» тяниень пингонь национальнай моронь Панжада фестивальть гала-концертоц ётафтови июньцта, «Акша келу» Республиканскяй национально-фольклорнай илать пингста. Эсонза примайхть участия коллектифт и ськамост морсихть (7 кизоста сявомок 50 кизосотненди молемс).
Сцена лангса выступандайхть любительхть и профессионалхт: солистт, дуэтт, группат, эстраднай вокальнай ансамбльхть, вокально-инструментальнай ансамбльхть, авторхт-исполнительхть, профессиональнай и самодеятельнай коллектифт, а стане жа искусствань идень, музыкальнай школань, вокальнай студиянь, культурно-досуговай учреждениянь, средняй общеобразовательнай школань, средняй специальнай и высшай образованиянь учебнай заведениянь, профильнай государственнай учреждениянь представительхть.
Гала-концертса кармайхть кайгома мокшэрзянь народнай и дискотекань морот, конат ётафтфт мокшень и эрзянь кяльс. «Од вий» тяниень пингонь национальнай моронь Панжада республиканскяй фестивальсь ётафтови лама национальностень нароттнень, конат эряйхть Мордовиять территорияса, национально-культурнай койснон-обуцяснон ванфтоманкса и ламолгофтоманкса, ломаттнень марстоптоманкса, ётксост фкя-фкянь шарьхкодемать кемокстаманкса, а стане жа исполнительхнень творческяй асушиснон панжеманкса.
Фестивальть аноклаенза-ётафтыенза: Мордовия Республикань Культурань, национальнай политикань и архивнай тевонь министерствась и Народнай творчествань Республиканскяй кудсь.