Династия. Тя валть кулемста мялезт эстокиге сайхть тя или тона семьяста ломаттне, конат заняфт фкя тевса. Кепотьксонди, тядясь и алясь или хуш фкясь эздост покоди заводса, машина киса. Лангозонза (лангозост) ваномок или лия туфталонкса тя тевть кочказь идьсна, сяльде уноксна. Тяфта и эвондайхть династиятне, конатнень трудовой марстонь стажсна уленди пяк и пяк ламонь киза.
Старошайговскяй райононь Лемдяй мокшень велеса улемстонк сувсеме Дёмкиттнень ширес. Саме мяльс арамс содафокс скромнай ня ломаттнень мархта. Самай тяфтапт Пётр Филаретович и Клавдия Михайловна.
Пётр Дёмкинонь мархта шамада шамас васьфтемда и теенза кизефксонь-мезень максомда меле талакодоме, што сон сувси педагогическяй династияти, конанди ламотне тяфта и мярьгихть—Пётр Филаретович Дёмкинонь педагогическяй династияц.
Сяс и азондоманьконь ушедсаськ мокшалять эзда.
Шачсь-кассь Пётр Дёмкин Лемдяйса лама идень семьяса. Тядянза-алянза, Анна Александровна и Филарет Иванович, касфтсть кафкса шабат: вете стирьхть и колма цёрат. Пётр Филаретович ётксост инь оцюсь.
Тонафнесь Лемдяень, меле—Новотроицкое велень школатнень эса. Сяда тов поступась Н.П.Огарёвонь лемса Мордовскяй государственнай университетонь физико-математическяй факультету. Кафта кизода меле факультетсь явфтфоль кафта отделениява: физическяй и математическяй.
«Мес эряфонь тевонди кочкайть физикань учителеннеть?» Тя кизефксть лангс мокшалясь отвечась, што школаса тонафнемста мялезонза тусь тя предметсь.
«Мезе учительсь азондоль физикань и математикань урокнень пингста, сявонделине мяльс, а куду молемста арьсень кудонь заданиять лангса, лиякс азомс, тиенделине сонь»,—мярьгсь Пётр Филаретович.
Кой-коста аляц, Филарет Дёмкин, сюцелезе, мес аф тонафни. А цёранц сембе заданиянза тифтольхть ни. Тянемс мяляфтсы физикань и математикань учителенц Владимир Никитинонь. Пади, кле, лангозонза ванозь, нльне апак талакотт, монга арань физикань учителькс. Университету физико-математическяй факультету Пётр Дёмкинонь мархта поступась фкя класса тонафни ялгац Виктор Нарваткин.
Вузть шумордамдонза меле эста ульсть направленият, конатнень коряс диплом мархта од специалисттне кучсевсть работама тя или тона школатненди, сяс Пётр Дёмкин трудовой кинц ушедозе физикань учителькс Ковылкинскяй райононь Польця велень школаса. Тя ульсь 1970 кизоня. Кафта кизода меле сявозь армияв. Пётр Филаретович фкя киза служась Камчаткаса. Полуостровса няезень сопкатнень, гейзерхнень. Ужяль, кле, гейзерхнень эса ашезь удала эшелямс.
Мокшалять тернезь лядомс Ковылкинскяй району, но ваймоц усксь ёмла родиназонза. Лемдяень школаса учительсь ушедсь вятема физикань и математикань урокт.
Сай пингонь рьванц, Ичалковскяй райононь мазы стирть Клавдия Михайловнань мархта Пётр Филаретович арась содафокс Саранскяйса А.С.Пушкинонь лемса Культурань и ваймамань паркса. Рьвяясть и пуроптсть семья ветеце курсса тонафнемста. Рьвац, Клавдия Дёмкина, мархтонзоль Польця велеса, меле учезе армияста. Тянемс синь марсот и эряйхть Лемдяйса.
Пётр Дёмкин—трудонь ветеран, педагогонь стажец—40 киза. Лемдяень школаса работась 1973 кизоста сявомок 2012 кизоть самс. Мзяра шаба тонафтсь физикати и математикати—аф лувови, но пяк и пяк лама.
Мокшалясь—Российскяй Федерациянь Народнай образованиянь отличник, Социалистическяй пялькстомаса сяськи (1976 кизось), казьф СССР-нь Просвещениянь министерствать Почётнай грамотанц мархта. Оцю букваста Учитель. Пара вайме ломань, конань мархта корхнемада меле пряцень марясак сяда тёждяста. Сонь кельгсазь и мяляфтсазь сят, кинь тонафнесь. Сашендыхть, гайфнихть.
Рьвац, Клавдия Михайловна, Лемдяйса кунара арась эсь ломанькс. Тонадозе мокшень кяльть. Сяс, кда теенза кивок пшкяди мокшекс, аф абонды, а лац-ряц отвечай.
Клавдия Дёмкина Ковылкинскяй райононь Польця велеса кувалгофтф шинь группань воспитателель. 1973-1982 кизотнень ульсь старшай пионервожатайкс Лемдяень школаса. Казьф В.И.Ленинонь лемса Всесоюзнай пионерскяй организациять Центральнай советонц «За активную работу с пионерами» значоконц мархта. Работань марстонь стажец—33 киза, конатнень эзда ламотнень максозень велень Советти, коса секретарель. Трудонь ветеран.
Педагогонь тевса сафтозь Дёмкиттнень идьсновок.
Цёрасна, Николай Петрович, кочказе алянц тевонц. Николай Дёмкин—Старошайговскяй средняй общеобразовательнай школань физикань и информатикань учитель. Педагогонь тевонц ушедозе информатикань учителькс Лемдяень школаса. 1992 кизоста сявомок работай Старошайговскяй 2№ средняй общеобразовательнай школаса. Николай Петрович—Мордовия Республикань Заслуженнай учитель, Российскяй Федерациянь общай образованиянь Почётнай работник. Казьф аф фкя Почётнай грамотаса. Российскяй Федерациянь инь цебярь учительхнень конкурссост сяськи. Мордовия Республикань учительхнень ёткса физикать коряс олимпиадань призёр. «Учитель года-2013» республиканскяй конкурсонь призёр. Марстонь стажец—30-да лама киза.
Николай Петровичень рьвац, Нина Васильевна, начальнай классонь учитель Старошайговскяй общеобразовательнай школаса. Педагогсь тевонц ушедозе 1988 кизоня начальнай классонь учителькс Лемдяень школаса. 1994 кизоня поладозе сонь Старошайговскяй 2№ школаса. 2008 кизоня Нина Васильевна ушедсь работама начальнай классонь учителькс Старошайговскяй 1№ общеобразовательнай школаса. Россиянь общай образованиянь Почётнай работник. Казьф Мордовиянь Правительствать Почётнай грамотанц, Старошайговскяй муниципальнай райононь оцюнять Благодарностенц мархта. Стажец—33 киза.
Пётр Филаретовичень и Клавдия Михайловнань стирьсна, Татьяна Петровна, образованияс коре филолог. Шумордазе М.Е.Евсевьевонь лемса Мордовскяй государственнай педагогическяй институтть. Лама киза воспитателель Саранск ошень 68№ и 72№ идень саттнень эса.
Ужяленди, пингта инголе тусь эряфста Дёмкиттнень стирьсна Елена Петровна. Сон образованияс коре начальнай классонь учителель.
Пётр Филаретович шачсь трудонь кельги лама идень семьяса. Шабатнень ёткста педагогокс арась аф аньцек сон. Тяддень январьста газетаса пачфнеме Теньгушевскяй районца эряй мокшавать Ольга Матвеевать колга, кона сташенды мокшень щапт, тиенди мазоптомбяльхть. Ольга Филаретовна—Пётр Дёмкинонь родной сазороц. Мокшавась педагогическяй трудонь ветеран, тяни пенсияса. Работань марстонь стажец—34 киза. Педагогокс ушедсь работама 1984 кизоня Теньгушевскяй райононь Сакаевскяй школаса начальнай классонь учителькс. Меле тонафтсь итть Шокшинскяй средняй школаса.
Мокшалять нинге фкя сазороц образованияс коре стане жа педагог. Анастасия Осиповать стажец 40-да лама киза. Педагогонь тевонц ушедозе 1979 кизоня Лемдяень школаса начальнай классонь учителькс. 1986 кизоста сявомок сон—воспитатель Саранск ошень 46№ идень садса. Анастасия Филаретовна казьф «Российскяй Федерациянь воспитаниянь и просвещениянь почётнай работник» мяштьса каннемань знакса, грамотаса.
Аф стака лувомс, што вяре азф сембе ломаттне педагогонь тевти лемдсть пяк и пяк лама кемотть киза. А династиянь ушедыкс эстеест лувозь Лемдяень мокшалять Пётр Дёмкинонь.
Пётр Филаретович и Клавдия Михайловна пенсиясот. Но кали велеса кивок ащи тевфтома? Кудонь азорсь пингонц ламошканц ётафнесы гаражса—тосот и инструментонза, и лия паршиец.
Трудонь кельги ломаттне путнихть пере. Лезнема сашендыхть идьсна, уноксна. Ули уноконь иднясновок.
Дёмкиттнень кенкшсна фалу панжадот сувайхненди. Вов и миньге ширесост улеме аф кржас. Ванондоськ семейнай альбомснон, кулхцондоськ лятфнемаснон. Тумстонк Пётр Филаретович и Клавдия Михайловна прважамазь, кода тиендихть сембе пара азорхне, мянь ульцяв—ортатненди молемс.
Татьяна АЛЬШИНА.
Фотось Николай Карановонь.