«ФилФактъ»—тяфтама лем канни М.Е.Евсевьевонь лемса Мордовскяй государственнай педагогическяй университетонь филологическяй факультетонь газетась. «Кодама мазыши!»—арьсезевонь мон, мзярда университетть официальнай страницасонза няине газетать электроннай вариантонц—тексттне сёрматфт эльбятьксфтома, мяль салайхть дизайнць, вёрсткась. Студенческяй газетась лисенди весть кварталти.
«ФилФактъ» газетась ушедсь нолявома 2010 кизоня. Филологонь аф фкя поколения кочксесь-пуропнесь эсонза. Ётай кизоть редколлегиясь полафтсь марнек. Студенткатне нолдасть изданияти од ваймопожф.
«ФилФактъ» студенческяй газетать руководителец, «Русский язык. Дополнительное образование (медиаобразование)» направлениянь 1 курсонь студенткась Алина Голынова мярьгсь: «Выпускнень анокламаснон лангса работай филологическяй факультетонь ялгафты команданьке. Эрсь эздонк оцю мяль шарфты эсь тевонц лангс, сяс тяфтама результатсь! Васендакиге минь арьсетяма, мезень и кинь колга карматама сёрмадома, явсаськ тематнень, арьсесаськ дизайнать. Разделхнень и рубрикатнень ёткса сотксть старандатама няфтемс фкя стильса и оформленияса».
Дарья Скворцова,
вёрстальщик:
«Вёрсткась веши лама пинге. Сашендови семботь кочкамс ёмла пялькскаста, тиемс мазы и мялень салай материал. Вёрсткать и дизайнать лангса работатама марса, штоба кочкамс марс сембе мяльхнень-арьсематнень».
Юлия Пеганова,
редактор:
«Редакторть инь оцю тевоц—ваномс статьять од сельмованфса. Минь филолоктама, тонафтсамазь эльбятьксфтома сёрмадома, но сидеста, мзярда лама работат статьять лангса, сельмованфсь «сапонияй», сянкса эряви, штоба тевцень ванолезе лия ломань. Аф нолдама фкявок эльбятькс, ванома валрисьмотнень фкя-фкянь мельге молемаснон мельге. Редакторонь тевсь—тя тренировка пря уйти».
Маргарита Паулова,
журналист:
«Монь задачазе—пяшкодемс газетать текстса. Работазень латцеса тяфта: васендакиге молян мероприятияс, конань колга ёратама тяштемс газетаса. Сяльде сёрмадан аф оцю заметкат, шарфтан мяль инь эрявикс ширетнень лангс. Сяда тов вешендян тянь колга лия информация, кепотьксонди, университетть сайтса и эрь кодама соцсетьса. Тяфта кочкави текстсь. Но главнайсь, штоба статьятне салалезь лувить мяленц».
Екатерина Харечко,
журналист:
«Аноклан статьят аф аньцек университетть и факультетть колга, улихть авторскяй работаневок. Тя лезды касомс тейне творческяй ширде, вдь эрь журналистть сембода пяк саласы мяленц кодама-бди фкя темась и сембе виец тушенды тя темати. Мялезон сёрмадомс университетонь преподавательхнень колга».
«ФилФактъ» газетаса лама рубрикада. Студенттне азондыхть аф аньцек факультетть эряфонц, но и вузть ся мероприятиянзон колга, коса филологическяй факультетонь студенттне примасть участия. Авторскяй статьятнень эса азондыхть литературань, рузонь и родной кялень содаф деятельхнень колга.
Филологическяй факультетса лама асу студентта, сяс газетаса ули «ТаланТы» («Ты—талант») лем ала рубрика. Сон лемтьф од ломаттнень творчестваснонды. «Человек месяца» рубрикаса од журналисттне сявондихть сембода активнай и асу филолокнень кядьста интервьют. Газетаса печатлакшнесазь филфаконь тонафнихнень валмороснон, фотографияснон, рисункаснон.
Ноляви студенческяй газетась печатнай и электроннай вариантса. Электроннай версиянц ули кода морафтомс ВКонтакте социальнай сетьса «ФилФактъ—студенческая газета ФФ» сообществаса, печатнайть—сявомс филологическяй факультетть рекреациянь стендстонза. Мекольцесь, 13 выпусксь, нолдаф М.Е.Евсевьевонь лемса Мордовскяй государственнай педагогическяй университетонь ректорть Марина Антоновать, филологическяй факультетонь деканть Сергей Степинонь, Мордовия Республикань Журналистонь союзть председателенц Людмила Резяпкинать лезксснон вельде.
Студенческяй газетань од ноляйхне виденцясть, што газетасна ули мялень салайкс кода эсь факультетонь студенттненди, стане и марнек университетти. Сай пингть ёрайхть тиемс мокшень и эрзянь кяльса башка лопанят.
Оксана плотникова.