Марий Элса ётафтовсь студенческяй форум

17-18 майста Марийскяй государственнай университетса ётафтовсь «Угро-финонь нароттнень козяшисна» международнай студенческяй форумсь. Сон лемтьфоль Россияса Педагогонь и наставниконь кизоти.
Юбилейнай Х форумсь пуропнезень Российскяй Федерациянь Карелия, Коми, Марий Эл, Мордовия, Башкортостан, Татарстан, Чувашия, Удмуртскяй республикатнень эзда, Ханты-Мансийскяй автономнай округста—Юграста, Кемеровскяй областьста, а стане жа Финляндияста и Японияста студенттнень.
Кемонь кизоста Марий Эл Республикась и сонь университетоц васьфтсь 7 странатнень эзда и Россиянь 30 регионцта 2000-да лама од ломань. Форумсь арась теест дискуссионнай цебярь вастокс. Видесонза ётафневихть Угро-финонь университетонь Ассоциациять пуромксонза. Аф кунара панжевсь студентонь тяфтама Ассоциация, кона шарфтф вуснень эса угро-финскяй студенческяй движенияти, ламоц проектонь вятемати.
Тяддень форумть пингста Марий Эл Республикаса панжевсь Народонь ялгаксшинь кудсь. Ули надияма, што сон арай национальнай общественнай организациятненди марса улемань вастокс. Торжественнай церемонияса примасть участия форумс саф студенттневок.
Йошкар-Олав эрь кизоня якайхть и минь од ломаненьке. Тядде республиканьконь эзда ульсть 9 студентт: кототне Н.П.Огарёвонь лемса МГУ-ста, колмотне М.Е.Евсевьевонь лемса МГПУ-ста. Делегацияти руководителькс кемокстафоль М.Е.Евсевьевонь лемса МГПУ-нь родной кялень и литературань кафедрань заведующайсь, филологическяй наукань докторсь Ольга Налдеева.
Форумса работасть кемонь секцият. Синь лемтьфтольхть од ломанень политикать, образованиять, культурать, историять, педагогикать, кяльть коряс исследованиятненди.
Пленарнай заседанияса МГПУ-нь филологическяй факультетонь студентсь Константин Ещиганов азондсь университетса кяльть и культурать ванфтомаснон коряс мялень салай практикатнень колга. Тяка университетонь студенткась Екатерина Козелова «Финно-угорские молодёжные инициативы и студенческое самоуправление финно-угорских университетов» секцияса «Образовательный контент «Школа мордовских языков» как инновационная площадка для реализации студенческих инициатив» докладонц инкса сатозе II степенень Дипломть. Галина Самошкина секциянь лия участникненди няфтезе Валентина Мишанинать произведениянц коряс филологическяй текстонь анализть.
«Финно-угорское и сравнительно-сопоставительное языкознание» секцияса III вастть сатозе Н.П.Огарёвонь лемса МГУ-нь филологическяй факультетонь 3 курсонь студенткась Наталья Вирясова. Сонь докладонц лемоцоль «Особенности системы согласных говора села Новая Потьма».
Н.П.Огарёвонь лемса МГУ-нь филологическяй факультетонь «Нармоннят» фольклорнай ансамбльсь Марий Элса аф аньцек няфтезе мокшэрзянь мороть мазышинц, а стане жа выступандасть доклад мархта. Исследованиясна сотфтольхть кяльть или литературать мархта.
Форумть пингста студенттне ванозь Йошкар-Олать мазы вастонзон, ульсть Козьмодемьянск ошса, коса теест ётафтфоль культурно-историческяй музейнай комплексть эзга экскурсия.
Оксана плотникова.