30 январьста Саранскяйса, М.Е.Евсевьевонь лемса Мордовскяй государственнай педагогическяй университетса, «Важнайть колга корхнемат: минь пингоньконь героенза» лем ала ётафтовсь научно-общественнай форум. Сон лемтьфоль мокшэрзянь васенце просветительть, учёнайть-энциклопедистть, культурань и общественнай деятельть Макар Евсевьевич Евсевьевонь шачема шиста 160 кизонь топодемати.
Научно-общественнай форумса, коза пуромкшнесть педуниверситетонь преподавательхне и студенттне, эсь мяльснон мокшэрзянь васенце просветительть научнай сатфксонзон и научно-творческяй наследиянц колга азозь Мордовиянь и странань лия региононь государственнай властень, наукань и общественнай деятельхне.
Васенцекс научно-общественнай форумс пуромфнень приветствовандазень Мордовиянь Государственнай Собраниять Председателенц заместителец Наталья Долматова. Сон республикань законодательнай органть Председателенц Владимир Чибиркинонь и депутатонь корпусть лемста макссь оценка педуниверситетть, кона достойнайста каннесы мокшэрзянь васенце просветительть лемонц, трудонзонды наукаса и национальнай педагогическяй кадрань анокламаса. Сон тяфта жа серьгядезень педуниверситетонь учёнайхнень и студенттнень Макар Евсевьевонь научно-творческяй наследиянц вельде, кона аф сиретькшни, виияфнемс сяда тов мокшэрзянь кяльхнень и национальнай культурать.
Наталья Долматова максозе ректорти республикань Государственнай Собраниять Председателенц Благодарственнай сёрманц. Эсонза максф оцю оценка педуниверситетть сембе тевонзонды, конатнень сон тиендьсыне наукаса, национальнай культураса и национальнай педагогическяй кадрань анокламаса.
Сяльде Евсевьевонь научно-просветительскяй тевонзонды макссь оцю оценка Мордовскяй (мокшень и эрзянь) народть Межрегиональнай общественнай организациянц председателец, филологическяй наукань докторсь, профессорсь Юрий Мишанин. Сонь валонзон коряс, Макар Евсевьевич Евсевьев стама Ломань, конань эряфонц и тевонзон лангс ванозь, эряви служамс эсь Отечествацти и народцти!
Макар Евсевьевонь научно-культурнай наследиянц тевс ноляманц колга пачфтсь педуниверситетонь ректорсь, педагогическяй наукань докторсь, профессорсь Марина Антонова. Сон азондсь и слайдса няфтезень ся букварьхнень, конатнень педуниверситетонь учёнайхне аноклазь республикань и странань лия региононь школатненди, коса тонафневихть мокшень и эрзянь кяльхне. Сембе синь тифт-аноклафт Макар Евсевьевонь научнай наследиянц вешфксонзон коряс.
Сяда тов научно-общественнай форумть теманц коряс эсь мяльснон азозь республикань Культурань, национальнай политикань и архивнай тевонь министерствань отделонь начальниксь Александр Кочеваткин, педуниверситетонь учёнайхне Любовь Водясова, Николай Горячев, Ульяновскяй областень мокшэрзянь национально-культурнай автономиять председателец Владимир Софонов и ламотне лиятне.
Владимир НЕСТЕРОВ.