Каргоньжяй велень средняй общеобразовательнай школась лувондови инь цебярькс Атюрьевскяй районца. Вов ни комозьда лама киза тяса директоркс педагогическяй трудонь ветеранць, Афганскяй войнань участниксь, козя опыт мархта руководительсь В.И.Гераськин. Сонь «азорондаманц» пингста Каргоньжяи строяфоль тяниень пингть вешфксонзонды отвечай школа. Тяса цебярь, вии педагогическяй коллектив, иттне лисендихть сяськикс муниципальнай, региональнай и межрегиональнай предметнай олимпиадатнень, пялькстоматнень эса. Школать сатфксонза аф ёмлат. Тянь квалма азондыхть оцю казнетне.
Каргоньжяень средняй общеобразовательнай школаса улень Сяськомань Ши каршеня. Иттне и учительхне анокласть тя оцю илати. Урядазь Великай Отечественнай войнаса шавфненди обелискть пирьфонц, озафнесть перьфканза панчфт. Тияк учительхне азондсть ученикненди сянь колга, кода Каргоньжяень эряйхне тюрсть фашисттнень каршес. Ламотне эздост ашесть мрда куду. Да и мрдайхнень эздовок ашезь ляда войнань фкявок ветеран. Тяниень иттне аф содасазь И.И.Кичкаевонь, А.С.Гришинонь, конат аф весть ульсть школаса, азонкшнесть фашисттнень каршес тюремаснон колга. Но шабатненди ули кинь эзда сявомс пример.
Синь тонафтсазь Афганскяй войнань ветераттне В.И.Гераськин и В.Н.Исаев, конат казьфт боевой орденца и медальса. Школав сидеста сашенды В.Я.Антошкин. Сонга ульсь Афганистанца. Казьф оцю казнеса.
Каргоньжяйса цебярь примерда лама. Тянивок велень ламоц од цёратне примайхть участия СВО-са. Фкясь синь эздост А.Маланкин. Аляц, Сергей Иванович, вятсь школаса физическяй культурань урокт. Ужяленди, рана тусь эряфста.
Каргоньжяень школать перьфке аруши и мазыши. Панжихть шуфтонятне. Эрекласть лама кизонь панчфне. Школань техническяй работниксь С.И.Пронин соказе переть, коза учительхне, иттне путнихть эрь-кодама перень сёрот. Участкать мельге ваны технологиянь учительсь Г.А.Мишина.
Каргоньжяй велень средняй общеобразовательнай школаса покодихть кемгафксува педагог, кота техническяй работникт. Шабада 57. Каргоньжяень ученикта башка тя школаса пуропнихть содамошит Боражень, Сире Кушкань, Темниковскяй райононь Кушкань иттне. Пачфневихть синь школьнай автобусса. Кушкань од цёрась, Данила Кабаев, тонафни тяса васенце класста сявомок. Кунара тя школаса тонафни и Татьяна Четырёва. Сон кефкиеце класса, аноклай ЕГЭ-тненди. Татьянада башка школаса нинге кафта выпускникт. Даниил Котельников шумордасы кефкиеце классть, Владимир Шукшин—вейхксоцеть. Но кеняртьфти ся, што тонафнемань од кизоть шабатнень лувкссна аф кири, а, меколанкт, касы. Васенце классу сайхть кота ученикт. И сембоц тонафнида кармай 60.
Гордостекс и прянь шнафтома вастокс школаса, велеса ащи директорсь В.И.Гераськин. Сон педагогическяй трудонь ветеран. Учителень тевти макссь 32 киза. Лац покодеманкса казьф МР-нь Государственнай Собраниять, Образованиянь министерствать, районнай администрациять Почётнай грамотаснон мархта, лия казнеса. А инь оцю казнесь директорти, учительти—иттнень кельгомасна. Школаса трудендай и рьвац, Нина Николаевна. Сонга педагогическяй трудонь ветеран, вяти рузонь, мокшень кялень и мокшэрзянь литературань урокт. Сембе эряфонц Каргоньжяень школати максозе начальнай классонь учительсь Т.Д.Шукшина. Сон тусь тядянц киге. А.А.Юкова 40-да лама киза вятсь школаса рузонь кялень и литературань урокт, лама киза ульсь директоркс. Тянемс велеса кельгома ломань. Тякоть можна азомс и стиренц колга.
Ламонь киза школаса трудендайхть А.Н.Шукшин, С.Б.Колабкина, Г.А.Мишина, В.Н.Исаев, М.Ф.Шукшина, Т.В.Пронина. Кепотьксонди, Г.А.Мишина вятьсыне технологиянь урокнень, тонафтсыне стирнятнень стама, стамань машинкатнень мархта работама. Синь примсихть участия пялькстоматнень эса и занцихть цебярь вастт. Башка мяль шарфнихть мокшень щапненди. Стайхть алянь панархт, авань нулат. Цёранятне тонафнихть шуфтть мархта работама. Улихть станокт. Урокнень вятьсыне А.Н.Шукшин.
Школань коридорхне, классне пяшксет казнеда: кубкада, дипломда, Почётнай грамотада, шнамань сёрмада, сертификатта. Синь корхтайхть сянь квалма, што школаса лаказь-лакай эряфсь. Эрь шиня ётафневихть мероприятият. Аш муниципальнай, региональнай, межрегиональнай пялькстомат, коса ба школась афоль прима участия. Сатфксне кеняртьфтихть. Кепотьксонди, Константин Макашкин примась участия «Эрек классика» лувиень пялькстомаса.
Школаса тонафнихне примасть участия пялькстомаса, кона лемтьфоль М.А.Бебанонь 111 кизонь топодеманцты. Константин Макашкин сявозе васенце вастть. Лац няфтезь пряснон тя пялькстомаса Евгения Котельникова, Тимур Вахобов. Кемонце класса тонафнись Анна Ермолаева, учительхне Т.Д.Шукшина, Н.Н.Гераськина, С.Г.Пугаева сёрмадсть мокшень кяльса диктант. Теест максфтольхть сертификатт. Школаса тонафнихне примасть участия «Монь тядязень профессияц» сочинениянь пялькстомаса. Цебярьхтольхть Елена Тюргановать, Екатерина Фатькинать, Ксения Юфтайкинать, Никита Лёвинонь работасна. А вов Данила Кабаев, Яна Федоткина, Анна Ермолаева лац нянесазь пряснон спортса. А мзяра лия сатфкссна Каргоньжяень иттнень и синь тонафтыснон, сембе афи лятфтавихть.
Каргоньжяень школаса оцю мяль шарфневи мокшень кяльть и мокшэрзянь литературать тонафнемаснонды. Сидеста ётафневихть илат, конат лемневихть школань выпускникненди, мокшень содаф поэттненди В.А.Волковонди, П.К.Торопкинонди. Лац ванфтовихть велень койхне-обуцятне, мокшень щапне-каряпне.
—Эряфсь аф ащи фкя вастса,—корхтай В.И.Гераськин.—Миньге эряфть мархта аськолятама инголи. Лия школатнень эса иттнень лувкссна кири, а миньцонк, меколанкт, касы. И тя пяк кеняртьфти.
Илья Вешкин.