1418 ши и ве
Великай Отечественнай войнась ушедсь 1941 кизонь 22 июньцта. Сон мольсь 3 кизот 10 кофт 18 ши или 1418 ши и ве. А инь кувака тюремась—1126 ши—ульсь Ленинградть инкса. Эздост 871-сь тусь ошть блокаданцты.
7 миллионда лама ломань—Москуть инкса тюремаса
Тняра ломань примась участия Москуть инкса тюремаса (1941 кизонь 30 сентябрьста сявомок 1942 кизонь 20 апрельти молемс).
26 миллионда лама ломань шавовсь войнаса
Войнать шумордамдонза меле Иосиф Сталин азозе официальнай цифрать—боевой действиятнень пингста шавовсь 7 миллиотт ломань.
РФ-нь Оборонань министерствать тяниень даннаензон коряс, Великай Отечественнай войнать пингста юмась-арась 26 миллионда лама ломань, ёткстост—12 миллионць военнослужащайхть. Аф официальнай источникнень эса азондови, што войнань кизотнень шавфнень лувкссна пачкотькшни 43 миллион ломанти.
Пефтома карьхцьт
Официальнай даннайхнень коряс, войнась Советскяй Союзти тись оцю карьхцьт. Великай Отечественнай войнань кизотнень 1710 ошсь и 70 тёжянь велесь марнек тапафтольхть.
«За взятие Берлина» медальсь
Тя медальть получаензон ётксот Советскяй Союзонь Маршалхне Георгий Жуков и Иван Конев. Казнетнень ламошкасна максфтольхть войнать шумордамдонза меле 3 кизонь ётазь. Сонь ульсь кода получамс эсь воинскяй частьса, а стане жа демобилизацияда меле эряма вастть коряс военнай комиссариатса.
17 киза Сяськомань Шись ашезь отмечсев
Сяськомань Шить васенцеда отмечазь 1945 кизонь 9 майста. Сон ульсь масштабнайкс. А Сяськомань Парадсь ётафтовсь Якстерь площадьса аньцек 1945 кизонь 24 июньцта. 1947 кизоть самс 9 Майсь азфоль ваймамань шикс. Тя шиня ульсть концертт и нолявсть салютт. Но тяда меле Сяськомань Шить лемс торжестватнень лоткафтозь, и 17 киза тя шись арсесь рабочайкс. Васенцеда 9 Майть праздновандазь аньцек 1965 кизоня.
80 тёжянь офицерсь—ават
Великай Отечественнай войнать пингста авать ролец аф азовомшкаль. Войнань кизотнень фронтса врагть каршес тюрсь 1 миллионти молемс ава, 80 тёжянць эздост офицерхтольхть. Аватнень-доброволецнень эзда кочкафтольхть авиационнай полкт, стрелковай и разведывательнай бригадат, моряконь рота. «Герой Советского Союза» лемть получазе 87 авась.
Итть-геройхть
Иттне стане жа тюрсть Родинаньконь инкса. Боевой заслугатнень инкса кемотть тёжятть идсь казьфтольхть орденца и медальса, нилетне ёткстост получазь «Герой Советского Союза» лемть. Нят: Лёня Голиков, Марат Казей, Валя Котик и Зина Портнова. Шабатне ульсть партизанкс-разведчикокс, синь шавовсть тюрематнень эса и казниндафтольхть немецнень мархта.
Пинетневок лездсть армияса
Животнайхне стане жа налхксть оцю роль Великай Отечественнай войнаса. Войнань кизотнень фронтса ульсь 60 тёжяньда лама пине. Синь машфнезь вражескяй эшелоттнень, каннесть 200-та лама донесения. Пинетне-сапёрхне лезнесть мумс минатнень. Тяда башка, синь ульсь лезкссна тюремань паксяста ранендафнень курокста пачфнемаса госпитали. «Джульбарс» пинесь арась фкя и сяка пинекс, кона казьф «За боевые заслуги» медальса. Ранендаф пинесь примась участия Сяськомань Парадса, кона ётафтовсь Москуса 1945 кизонь 24 июньцта.