79 кизода инголе шумордавсь Великай Отечественнай войнась. Оцю питне пандсь советскяй народсь, штоба сяськомс фашисттнень. Аф фкя киза мольсть стака тюрематне, странаньке юмафтсь пяк лама ломань. Но, аф ваномок стакатнень-сталмотнень лангс, минь сяськоме. Сюкпря сятненди, кит эряфонь аф ужяльдезь тюрсть вандыень шиньконь инкса.
Инсарскяй райононь Исавелеть историяса войнась занци оцю васта. Велеряйхне стакаста васьфтезь сонь ушедоманц колга кулять. Содазь, што эряви араламс аф аньцек эсь эряфснон, но и унокснон сай пингснон.
Исавелеста Великай Отечественнай войнань кизотнень фронтса ульсь 154 ломань—тяфта сёрматф «Мялямонь книгаса». Но аф сембе эздост мрдасть тюремань паксятнень эзда. Сяськома мархта сайхнень ёткса ульсь мокшалясь Иван Степанович Кечкин.
Иван Степанович шачсь оцю семьяса, кота иттнень ёткста ульсь фкя цёракс. Аляц, Степан Владимирович Кечкин, Великай Отечественнай войнаса шофёроль. Казьф «За отвагу», «За победу над Германией в Великой Отечественной войне в 1941-1945 гг.» медальхнень мархта. Воявась Калининскяй фронтса, Ржев и Белый ошнень инкса.
Иван Кечкин шачсь 1924 кизоня. Школаса шумордась 10 класст. Улема, цёрась арьсесь велеса сетьме эряфонь колга, лездомс алянцты кудонь тевса и стак тов. Но семботь шорязе войнась. 1942 кизоня теенза топодсь 18 киза и сон сявфоль военнай службас.
Аеркс врагть каршес тюрсь Западнай фронтса, а меле—1-це Белорусскяй фронтса. Лейтенантоль, путфоль миномётнай ротати командиркс—207-це стрелковай полкса 76-це стрелковай Краснознамённай Ельненскяй дивизияса.
Васенце казненц получазе 1944 кизонь 31 мартста—тя ульсь Якстерь Звездань орденць, Годовичи и Миляновичи ошнень инкса тюремста. Миномётста ляцендематне шорясть фашисттненди молемс инголи. Мзярда минатне аделавсть, Иван Степанович вятезе эсь взводонц инголи, нолямок тевс оружиять.
1944 кизонь 12 сентябрьста Иван Кечкин маштозь вятезе тюремать Прагать штурмонц пингста. Сонь миномётонза лездсть пехотати, сонць Иван Степанович тапась станковай 4 пулемётт и машфтсь немецкяй 10 солдатт. Тя сембось лездсь Прагать сявомста. Тянкса Исавелень мокшень цёрась казьфоль Отечественнай войнань II-це степенень орденца.
1945 кизонь 2 майста Берлинонь гарнизонць азсь капитуляциянц колга. Но гитлеровецне сембе сяка срхкафтсть тюрема. Сон стакаль, немецне тюрсть кяжиста. Иван Степанович няфтезе прянц аф пели ломанькс. Миномётса тапась станковай 3 пулемётт, шавсь 25 гитлеровец. Шпандауть маласа кочкавсь лама немец. Кечкин ялгась ульсь цебярь кепотьксокс солдаттненди.
Иван Кечкин сяськомада меле мрдась куду, рьвяясь, шачсть 3 иденза: цёрац и 2 стиренза. Ужяленди, эрясь аф куватьс, кулось 51 кизоса. Тяфтама геройхне марстонь вийса аралазь шачема мастороньконь. И минь тянь фалу мяляфтсаськ!
Илья ПЕРВОЙКИН.