Кибермошенникне и синь «равжа» тевсна

«Стопмошенник13» телеграм-каналсь пачфни, што аферисттне стаки кучсихть бытовой техникань мишенди российскяй оцю лавкатнень лемста фишинговай электроннай сёрмат. Эсост мярьгондихть рамамс тя или тона товархнень «пси акциять» коряс.
Ня сёрматне аноклафт корпоративнай стильса, кона васьфневи российскяй ламоц ритейлерхнень работаса.
Сай пингонь васькафтф ломаттненди мошенниконь сёрматнень эса ули «тевс нолдамс промокодть» пунянять, конань люпштамста уленди автоматическяйста ётама поддельнай сайтти, кона, бта, бытовой техникань российскяй оцю ритейлерхнень эзда фкясь.
Тя веб-страницать стака явфтомс оригинальнай ресурсть эзда сянкса, што мошенникне нолясазь тевс эсь лацонь техникать, конань пингста фейковай сайттнень доменцна бта официальнайхнень лацот.
Лацкас ванондость электроннай сёрматнень. Получамок хуш кодама сёрма, тяда эряскода отвечамс или пяшкодемс эздонза инструкциятнень: васенда шарфтода мяль эрявикс детальхнень лангс.
1.Сельмос пови тема. Оцю перевотт, ярмаконь компенсацият, учётнай записть синнемац или блокировкац, мошенниконь кядьса тиф операцият… Аферисттне ёрайхть «саламс» ломанть мяленц.
2.Эвфнематне. «Тяникиге!» и «тейть лядсь аньцек 3 частт» валхне, восклицательнай лама знаконь улемась—тя сембось сувси мошенникнень килькшс. Мошенникне коль эряскофтыхть, аф макссихть пинге арьсемс.
3.Эльбятьксне, опечаткатне и аф содаф кодама символхне текстса. Кой-кона преступникне—аф грамотнай ломатть, но кой-коста валхнень эльбятькс мархта тяшнесазь специальна, кепотьксонди, «призонь розыгрышь», или полафнесазь кой-кона букватнень латинскяй лия букватнень лангс. Тяфта синь ёрайхть аф повомс спам-фильтратненди.
4.Сёрмань кучить аф шарьхкотьф адресоц. Аф содаф кода букватнень или цифратнень молемасна или «левай» доменць ся сёрмань кучить адрессонза, кона бта сась оцю организациять лемста,—тя корхтай подделкань колга.
5.Сёрмаса ссылка, кда сон тоса ули. Лиякс азомс, сайтть адресоц, конанди сон вяти. Штоба сонь няемс, эряви водендамс ссылкать лангс и лацкас проверямс адресть. Сидеста ломаттнень аф внимательнайкс улемаснон лангс надиязь, преступникне путнихть сообщениятненди содаф компаниятнень или бренттнень лемснон мархта ссылкат, цють полафтомок синь. Сяс сон проверсема лац-ряц.