2 мартста странасонк ульсь Педагогонь и наставниконь кизоть торжественнайста панжевомац. «Наставникнень марафонцна» онлайн режимса пуропнезень марс Россиянь 10 ошнень. И фкясь эздост—Саранскяйсь. Марафононь участникнень видеосвязть вельде приветствовандазень странань Президентсь Владимир Путин.
—Педагогонь и наставниконь кизоть ётафтоманц смузец сянь эса, штоба шарфтомс общественностть мяленц ся ломаттнень трудснон лангс, конат макссесазь пингснон и вийснон шабатненди, од ломаттненди, минь сай пингоньконди,—мярьгсь государствань оцюнясь.—Тяни Российскяй армиянь солдаттне и офицерхне, конатнень воспитандазь минь учителеньке, мужественнайста, афкуксонь геройкс пяшкотькшнесазь эсь долгснон, аралакшнемок ломаненьконь нацисттнень и террористтнень эзда, конат кафкса кизот муцсезь и шавондозь ломаттнень Донбасса.
Владимир Путин шарфтсь мяль, што Россиянь учительхне воспитандакшнихть достойнай ученикт, спасибась педагокненди, мес фалу верондайхть Россияти и сяс, мес макссесазь тя верать эсь ученикснонды.
Саранскяйса «Наставниконь марафонть» ётафтоманкса вастокс кочкафоль «Знание» Обществать студияц, кона ащи М.Е.Евсевьевонь лемса МГПУ-ть зданияса. Тяса эряфса наставникнень вастснон колга корхнесть учительхне, врачне, аф фкя лацонь уровенень руководительхне. Марафононь участникнень приветствовандазень МР-нь Правительствать Председателенц заместителец Галина Лотванова.
—Ёткстонк эрть эряфса ульсь ломань, конань сон лемнесы кельгома учителькс, наставникокс. Стака арьсемс образованиять наставничествафтома. Но тяни наставничествань институтсь виияфневи строительстваса, промышленностьса и лия отраслятнень эса,—мярьгсь сон.
Панжезь марафонть МР-нь Государственнай Собраниять Председателенц заместителец Наталья Долматова и М.Е.Евсевьевонь лемса МГПУ-ть ректороц Марина Антонова. Корхтамась мольфтевсь наставникнень колга, сянь, кодамокс теест эряви улемс. Эсь наставниконц колга лятфтась и МР-нь образованиянь министрсь Елена Солдатова. Тяфтамокс теенза арась рузонь кялень и литературань учителец Татьяна Владимировна Тюрина, конань эрь урокоц ётнесь мялень салайста. Сяс Елена Петровнавок эсь пингстонза арась рузонь кялень и литературань учителькс. И тячемс сон кирди кеме соткст эряфсонза инь главнай учителенц мархта.
Стане жа мероприятияса эсь тонафтыснон-наставникснон колга азондсть мирттне-рьвятне Сергей и Евгения Забродиттне. Полатне покодихть педагогокс М.Е.Евсевьевонь лемса МГПУ-са. Тяда башка, выступандасть Н.П.Огарёвонь лемса МГУ-нь Медицинскяй институтть директоронц заместителец Светлана Аксенова, Республиканскяй офтальмологическяй больницянь врачсь-офтальмологсь Татьяна Кумакшева и лиятне.
Ольга ЕВДОКИМОВА.