Казьфт конкурсса сяськихне

6 апрельста Саранскяйса, А.С.Пушкинонь лемса Культурань и ваймамань паркса, казьфтольхть Нармонень Международнай шити лемтьф «Пернатый квартал» республиканскяй конкурсса сяськихне. Конкурсть ётафтозе Мордовия Республикань Государственнай Собраниясь «Известия Мордовии» газетать и «Зёленый мир» ДЭО-ть ширень кирдемаснон вельде. Инголи, 10 кизонь кувалмоса, тя конкурссь улендсь «Птичий дом» лем ала. Тяни полафтсь лемоц, но проектть целец лядсь сякось—водендамс иттнень и од ломаттнень мяльснон Мордовия Республикань перьфпяльть араламанц и ванфтоманц мархта сотф прябалатненди, кда азомс сяда видеста, нармоттнень лувксснон ванфтомаснонды.
Тядде итокне тифтольхть 8 номинациятнень коряс. Жюрись кочкась 42 сяськи и призёр.
Мордовия Республикань Государственнай Собраниянь депутатсь, Госсобраниянь Аграрнай кизефкснень, природопользованиять и строительствать коряс комитетть председателец Кузьма Самолькин мярьгсь:
—Кемонь кизоста конкурсонь участникокс арасть тёжятть шаба марнек Мордовияста. Тя пялькстомать вельде ули кода няфтемс асушить, и, конешна, сон эвондафты родной крайти кельгома, перьфпяльти ответственнайста малаткшнема.
Каземать Кузьма Самолькин ушедозе «Креативный дизайн» номинацияста, коса 1 вастть сатозе Советскяй Союзонь Геройть А.И.Семиковонь лемса Темниковскяй СОШ-са тонафнись Глеб Сергеев.
А «Птичья многоэтажка» номинацияса 2 вастть сатозь Зубово-Полянскяй райононь Молочница посёлкань основной общеобразовательнай школаса тонафнихне-браттне Илья и Кирилл Мучкиттне. Цёранятне аш ни кода старандасть и оцюфнень лезксснон вельде тисть нармоттненди аф кудня, а дворец.
Сценать лангс сяськихнень казема лисендсть республикань Госсобраниять Председателенц Старшай советникоц Иван Москаев, «Зелёный мир» ДЭО-ть руководителец Ольга Ручина, «Известия Мордовии» газетать главнай редактороц Олег Каштанов.
Нармонень эрь куднять куднякс лемдемс кяльцевок аф шарфтови. Кодапт аньцек ашельхть! Аньцек ванондолеть и ванондолеть лангозост!
Татьяна Альшина.