Нинге школаса тонафнемста историянь урокста содаме 28 геройть-панфиловецть подвигснон колга. Москуть ала бойхнень пингста синь каршезост ардсь 50 фашистскяй танка. Воиттне ашезь када эсь позицияснон, машфтозь вражескяй ламоц машинатнень, но ламошкасна эздост шавфтольхть. А ульсть тя подразделенияса Мордовиянь воитт? Штоба тянь содамс, эрьда лувсаськ «Тянь колга мяляфты марнек Россиясь» книгать (Авторхне А.Коваленко, Г.Лебедев. «Ветеран Отчизны», «Мегатрон» ЦСП Издатцентрась, Моску ошсь, 2007 кизось).
Сборникса кочкаф Великай Отечественнай войнать, Москуть ала бойхнень и геройхнень-панфиловецнень колга оцю материал. Тяса азондови и Мордовиянь воиттнень колга. Мяль вельде лувине «Василий Клочковонь связноец» главать. Корхтамась мольфтеви политрукть В.Г.Клочковонь и сонь боецонзон колга. Тя сон бойда инголе азозень ня валхнень: «Россиясь оцю, а потамс аш коза. Фталонк Москусь!»
«В.Г.Клочков шачсь Саратовскяй областьса ашу семьяса. Синь эрясть Алтайса, Пензаса, Мокшан ошса, кафта кизот Мордовияса, меле—Саратовса и Алма-Атаса.
Мокшанца сон лездсь колхозонь пуроптомаса, вятсь комсомолонь тефт. Мзярда дивизиясна сась Москуть аралама, связнойкс эстеенза кочказе Чамзинскяй райононь эрзянь цёрать—красноармеецть Яков Георгиевич Тумайкинонь. Бойса няфтезе прянц геройкс, ламоксть аралакшнезе политрукть эряфонц, лац пяшкотькшнезень сембе приказаниянзон. А мзярда политрукть В.Г.Клочковонь тердезь 1941 кизоня Краснай площадьса ётафтови парадс, сявозе мархтонза и связноенцка. Аделавсь парадсь и эстокиге мрдасть эсь позициязост. Мольсть стака бойхть. 1941 кизонь ноябрьста гитлеровецне тусть наступленияс. Тя пингть политрукть ротаса ульсь 131 ломань, но стака бойда меле лядсь 30 боец и командир. Ламоцне шавфтольхть. Клочков и боецне няезь, што лангозост эци танкань колонна. Эста сон тердезе красноармеецть Тумайкинонь и мярьгсь пачфтемс команднай пункту пакет и азомс комбатти, майорти Решетниковонди: «Боеприпаста лядсь кржа, эняльдян кучемс лезкс, лангозонк сай 30 танка».
Аньцек Тумайкин азозень ня валхнень, эстокиге кульсь кожфса нарядонь вяшкома. Эста сон тутмадезе майорть лотконяти и кяшезе эсь ронгонц мархта. Ухадсь взрыв. Яков Георгиевич стакаста ранендафоль, а комбатсь стаки мольфтезе бойть. Лезкс максомс Клочковонди ашель кода: фашисттне сязезь оборонать. Мзярда комбатсь кочказе мекольце резерванц, 28 панфиловецсь тиезь ни героическяй тевснон.
Синь подвигснон колга содась марнек странась. Панфиловецнень ёткса ульсть Мордовиянь и лия представительхть. Нят: гвардиянь сержантсь Д.К.Матеркин, старшай лейтенантсь Солдаткин, красноармеецне Г.М.Шемякин и Г.Е.Конкин.
Кода повсь Яков Тумайкин панфиловскяй дивизияв?
«Войнада инголе минь марса Иван Шадринонь мархта работаме Алма-Атинскяй областень Талды-Курганскяй сахарнай заводса. Вов и повоме фкя ротав»,—азондсь Яков Георгиевич.
Ниле кофт ульсть марса В.Клочковонь мархта. 1941 кизонь 16 ноябрьста, мзярда красноармеецсь Тумайкин стакаста ранендафоль, сонь прважазь Бугуруслан ошень госпитали. Пчкясь и воявась Тула ошть маласа, Брянскяй фронтса, Орёл и Волхов ошнень ала. Казьф «За отвагу» колма медальса, васенце степенень Отечественнай войнань кафта орденца и лия казнеса».
Книгань авторсь азонды сяда тов: «Ульсть Панфиловскяй дивизияса Мордовиянь и лия воитт, но синь эрявихть вешемс. Мон васетькшнень дивизиянь ветераттнень, од воиттнень мархта. Ротань казармаса ули дивизиянь Боевой славань музей. Тяса служасть панфиловецнень цёрасна, а тяни геройхнень уноксна. Вов тяса служай Мордовиянь воинць, гвардиянь рядовойсь Николай Анатольевич Князькин (Я.Г.Тумайкинонь унокоц). Сонць ветеранць колмоксть ульсь тяса, васетькшнесь воиттнень мархта, пачфни Дубосеково разъездть ваксса бойть и эсь эряфонц колга».
Николай Князькин азонкшнезе, што войнада инголе Тумайкиттне эрясть Мордовияса, Чамзинскяй райононь Малое Маресево велеса. Альнякац, М.Н.Тумайкин, ульсь партиянь райкомонь секретарькс. Войнань пингть фронтса комиссароль, ламоксть тиендсь героическяй подвикт. Казендевсь боевой орденца. Меле Матвей Тумайкинонь кучезь партизанскяй отряду, коса и шавовсь.
Книгаса лятфневи старшай лейтенантсь Солдаткин. Авторхненди ашезь мув лемоцка. Кие сон, аф содаф земляконьке?
316-це стрелковай дивизиясь пуроптфоль Казахстанца. Ульсть и Киргизиянь воитт. Авторхне ашесть карма вешендема, сотцема сянь, кода повсть русне, мокшэрзятне Среднеазиатскяй республикав.
СССР-нь Геройхне Г.М.Шемякин и Г.Е.Конкин 28 геройть-панфиловецть спискасот.
Г.М.Шемякин азондсь публицистти А.Кривицкяенди сянь квалма, кода сон бойса стакаста ранендафоль.
«Машинась гусеницанзон мархта калдордозь эвондась траншеять вельхксса. Мон куроконе комань окопть потмаксс, фатяйне палы жидкостень сюлекать, и мзярда вражескяй танкась ётазе траншеять, ёрдайне лангозонза. Мяляфтса кайги ляцемать, а меле маштсть ёжене. Кода аделавсь бойсь? Кие таргамань модать алда, кие ускомань санбату, аф содаса. Сань ёжес шиньгучкать. Стакаста ранендафолень и контужендафолень. Госпитальса пчкамда меле тунь бойс.
Фёдор ГАВРИЛОВ.