Фкя содаф валмуворксса корхтави: «Эряф эрямс—аф паксянь туркс ётамс»
ЗАГС-онь куцеманятнень эзга куцемста или церькаву венцяма сувамста рьвяяйхне аськоляйхть серцек, фкя-фкянь кядьс кундазь и, улема, тя пингть арьсихть: эряфонь кигаст сяда товга кармайхть молема тяфта. Но, ужяленди, аф сембонди удалси васьфтемс «зрнянь свадьбаснон». А «бриллиантовай» илась—тя ломанть эряфса афкукс оцю сатфкс, и уленди сон шурода весть.
Анна Ермолаевна и Дмитрий Иванович Дабаефне—павазу ломатть. Тячи, 2 майста, синь васьфтезь бриллиантовай свадьбаснон. Шачсть и тячемс эряйхть мирттне-рьвятне Краснослободск аймаконь Сире Потьма велеса. Ширесост улемстонк сельмованфоньконь салазе кудботмоснон арушиц. А вдь кудазоравати кафксогемоньда лама киза! Шарьхкотьф, тняра кизоса ломанти стака кирдемс тяфтама оцю кудса сельмонь каямшка порядка.
Эсь одкс пингснон колга азондомаснон полатне ушедозь фкя-фкянь инголязь, эрсь, улема, пельсь, што кона-кона эздост нолдасы или юкстасы лятфтамс ся пингонь эряфстост инь важнайть.
—Кода эвондась ётксонт кельгомась?—кизефтине сиренятнень. Анна баба мярьгсь:
—Митянь, сай пингонь мирдезень мархта эряме фкя ульцяса. Тядяньконь кудсна ащесть пцтай карань-каршек, сяс лац содаме фкя-фкянь. Конешна, эсь велень начальнай школаса тонафнемстонк кельгомать колга ашень арьсекшне. А вов мзярда шумордаськ шабрань Зайця велень кафкса кизонь школать и ушедоме лисендеме стирнянь келеса илядень ульцяв, велестонк цёратнень ёткста мялезон кармась тушендома ронгс-пондс кеме и шамас мазы Митя цёрась, хуш сон корязон ниле кизода сяда одоль. Илядень ульцяста кудга срадомда инголе Митянь мархта ашеме ляткшне—виздеме, што ли. Но седиезе марязе, што туфан Митянь мяльс. А тяса нинге брадозе сидеста шнакшнезе тейне Дабаев ялганц: синь ся пингть марса тонафнесть Торбеевскяй СПТУ-са трактористокс.
—Аннакай, ашель мяльце кафкса класста меле сяда тов тонафнемс?—кизефнень Анна бабань эса сяда тов.
—Ся кизотнень, азса видеть, тядяньконь-аляньконь ашель мяльсна, штоба идьсна, сядонга пяк стирьсна, получсельхть коса-бди ширеса сай пингонь профессия. Эста кемголмува кизоса эрь стирнясь маштсь ни траксонь потяма. Сембонди содаф, ся пингонь мокшень семьятне идень пяльде козятольхть. Мезе сёпондомс, тянь сюнеда ламоц велень семьятне эрясть ашуста, аф кода тяни. Сяс фкя кудса эряйхнень ёткса эрь эрьгав кядсь кандсь оцю лезкс марстонь ашушить машфтомаса. Вов и моньге, кодак аделайне Зайця велень 8 кизонь школать, тядязе прважамань тувонь аннема фермав, кона ащесь аф ичкозе веленьконь эзда. Тяфта и ушедыне эсь покодемань кизень…
Аннакась лоткась корхтамда, таргазе кядьруцянянц и нардазень летькомф сельмонзон. Поланц азондоманц эстокиге поладозе Митя атя:
—Минь вдь Аннань мархта кафцьке ёмласта лядоме аляфтома. Анна шачсь, мзярда алянц, кода комсомольскяй активистонь, войнань васенце шитнень ни сявозь фронту Родинаньконь аралама. Тюремань паксяста сон ашезь мрда. Монга алязень аф мяляфтса, афи няендине сонь. Кафцьке касоме тядянь паця ала. Мон нинге мярьголень, касфтомасонк оцю талекась прась щаваньконь и бабаньконь лангс. Вдь тядяньке шинь-ши заняфтольхть колхознай тевса.
Корхтамати меки шоворсь Анна баба:
—Вов и монга ёфси од стирнякс сотыне эряфозень колхозть мархта. Васенда тувот касфнень, тоса ушедонь траксонь потьнема. Фкя илядня пялонк апак учсек састь кудалайхть. Синь и корхтайхть тядязти, кле, ёрасаськ ладямс Анна стирентень цёраньконди рьвянякс. Мон кулине валснон—седиезе кочкярязон валгсь: и кенярдень, и эводень. Кодама стирь аф кенярди кудалайхненди? А эводень—кода улемс Митянь мархта? Вдь ся пингти кудстотне содазь, што минь Митянь мархта аф стак ащемда ялгандатама, кельгомань толня крьвязсь ётксонк. Виде, бабазень мяльс сон ашезь тушенда, сяс сялдсь эсонза. Кле, Митя благой цёрась, и велеса колганза якай кальдяв слава. Но мон сафтыне смелшизень и мярьгонь кудалайхненди: «Арда кизефтесть Митя Дабаевонь, сявсамань-аф рьвакс? Кда атказай, эста мон аран рьвакс цёрантенди, а кда аф атказай…» Ашень кенере аделамс валнень, фкясь кудалайхнень ёткста тусь Митянь кизефтема. Кати пачкотькшнесь кудозост, кати аш, нюрьхкяня пингта меле сай пингонь мирдезе крхкаста ваймонь тарксезь сувась пялонк и мярьгсь тядязти, кле, тячикиге анокан рьвяямс Анна стирентень лангс. Ульсь свадьбаньке. Колма шит велесь мешвеленякс бзнась. Афи мярьгат, што тя ульсь кодгемонь кизода инголе.
Аннанди и Митянди свадьбадост меле марса ламос ашезь сав эрямс. Мзярда Митянди топодсь 18 киза, сявозь армияв служама. Эста шачфоль ни Лёня цёрасна, конанди аньцек пяле кизоняль.
Митя служась танкистокс, сяс и колхозу сявозь трактористокс. Анна рьвац покодсь дояркакс. Трудонь кельгомаснон вельде колхозникнень ёткса курокста арасть честень путома ломанькс. Алексей цёраснон мельге шачсть Наташа, Зина стирьсна, Сергей цёрасна и Лена стирьсна. Тядятне-алятне сембе вийснон путнезь сянкса, штоба идьсна касольхть шумбраста-тазаста, улельхть ёнюфт и трудонь кельгихть, ломань ёткса маштольхть эряма ялгаксшиса. И теест тя сафтовсь.
Азондомок идьснон колга, Анна Ермолаевна и Дмитрий Иванович Дабаефне шнамань валса корхтасть овснон и рьвяняснон колга. Кле, пяк удалафт. Ётксост улихть и руз офт-рьвянят, конат шарьхкодьсазь, што сиренятненди стака корхтамс рузонь кяльса, сяс велеса улемстост старандайхть (кода сафтови) калякондакшнемс мокшекс и идьснонга тонафтсазь тянди.
Полатне эряфснон лангс аф пеняцяйхть. Кле, тяниень эряфсь ламода тёждялгодсь: ведсь и газсь кудсот, недяляти весть вальмалост сашенды автолавка—рамак, мезе мяльце. Ваймоста пежень ароптома, озондома Анна баба якай шабра Зайця велень церькаву.
Азома сявок, што Дабаефне хуш и эряйхть цивилизациять эзда ичкоздень веленяса, коса тялонда ляткшни 5-6 ломань, ваныхть сянь мельге, мезе тиендеви Россияса и марнек мирса. Пяк пичедихть Донбасса событиятнень инкса и кемайхть, што минь боецоньке тя СВО-ста лисихть сяськикс.
Вов тяфта и эряйхть-ащихть Анна Ермолаевна и Дмитрий Иванович. Эрь шинь тевса-заботаса, фкя-фкянь кельгозь-ванфтозь. И вестьке ашесть каендакшне, мес 60 кизода инголе шкайгисна сотовсть фкя сюлмоса.
Минь эсь ширденк арьсетяма теест кемодонга кеме шумбраши, и катк бриллиантовай свадьбань иласна канды лама кенярдемада!
Николай ЦИЛИКИН.