Аделсеви апрель ковсь. Перьфпяльсь полафни тялонь удомада меле, эреклакшни шуфттнень сянгярьгодомаснон, панчфнень панжемаснон, лямбе ширде саф нармоттнень мазыста морамаснон вельде.
Панчфнень колга тяштемста мялезон сась Рузаевскяй муниципальнай райононь Трускляй велень школаса 10-це класса тонафнись Дарья Амбаева. Мес? А сяс, што мокшень стирсь аш ни кода шарфты панчфкя лангс: сембе ширде шачф-удалаф, мазы, аньцек ванондолеть лангозонза и корхнелеть мархтонза. Ёран башка мяль шарфтомс Дашань сёралонзон лангс. Фотографиятнень эса няйсасть Трускляень мокшень стирть тя козяшинц, конань «пуропнезе» эряфоньберьф.
Дарьянь шачемдонза меле кизонь ётазь, тядяц, Лариса Алексеевна, и аляц, Владимир Парфирьевич, нарафтозь стирняснон шяярензон. И сембе. Ся пингста сявомок Дашань шяяренза вестевок ашесть керсев. 16 киза касфнесыне сёралонзон. Синь пяк мазыхть, кувакат, эчкт! Стирсь и сяда тов ёрай ванфтомс тя мазышить.
Шачсь-кассь Дарья лама идень семьяса. Вете шабатнень ёткста сон сембода ёмлась. Тяни тонафни Трускляй велень школаса 10-це класса. Фалу получсесь цебярь оценкат. 9-це классть шумордазе якстерь аттестат мархта. 11-це классть аделамдонза меле инголенза панжеви эряфонь оцю кись. Коза молемс тонафнема сяда тов? Инголенди тяфтама тефнень аф азонкшнесазь, но, Дарьянь валонзон коряс, сон тисы семботь, штоба школать шумордамс пяк и пяк цебярьста. А меле поладсы тонафнеманц сяда тов.
Трускляень стирсь пяк кельгсы мокшень кяльть. Фалу примси участия родной кялень олимпиадатнень эса. Муниципальнай этапса лисендсь сяськикс, а Межрегиональнайса—призёркс.
Ужяленди, аф кунара тусь эряфста Дашань аляц, Владимир Парфирьевич. Тядяц и аляц марса эрясть пяк лама киза. Лариса Алексеевнань улихть колма иденза васенце мирденц эзда, нинге кафта шачсть Владимир Амбаевонди рьвакс тумдонза меле.
Мокшень семьясь эрясь павазуста. Но эряфть сонцень закононза. Мзярда Лариса Алексеевнань сатозе удавань палась, стирец Даша арась теенза васенце лездыкс. Сонга пяк ризнась-ольксесь алянц куломдонза меле, но содазе, што кельгома тядянцты эряви ширень кирди, нежедема васта. Аньцек няйсы, што шачфтыец аварьгоды, моли ваксозонза, ашкордасы, азы седиста моли валхт. И кафцьконь ваймос арай сяда тёждя. Но аф аньцек валса и корхнемаса лезни стирсь тядянцты. Даша кудонь тефнень эсовок васенцесь: пиди, урядай, ваны арушить мельге. Тундаста сявомок сёксеть самс работай переса. Велеса тевда фалу пефтома, аньцек кенерькшнек!
Трускляйса Даша эряй тядянц и альняканц Владимиронь мархта. Лариса Алексеевна работай Рузаевкаса единай дежурно-диспетчерскяй службаса, а Владимир—Н.П.Огарёвонь лемса Мордовскяй государственнай университетонь Машиностроениянь институтть филиалсонза программистокс.
Тядянц и альняканц ошста самозост мокшень стирсь и ярхцамс аноклай, и лия тефт тии.
Школаса Даша Амбаева васенцесь аф аньцек тонафнемаса. Вов ни аф фкя киза сувси Трускляй велень школать видеса пуроптф «Наследники» поисковай отрядти, конань руководителец мокшалясь, патриотсь, учительсь Филипп Полынов. Дарья примси участия ётафневи сембе пуромкснень эса, аноклакшни презентацият, видеороликт. Кепотьксонди, Родной кялень Международнай шити, Семьянь кизоти. Сон, кода и «Васенцетнень движенияснон» лия активистонза, ашезь ляда ширеса и «Журавли» акцияти лемтьф мастер-классть пингста тись кагодста Крокус Сити Холлса шавфнень мяляфтомаснонды лемтьф каргонят.
16 апрельста ульсь Мокшень и эрзянь кялень Всероссийскяй шись, конань мяльса кирдезь ётафтовсь «Мокшень и эрзянь кяльса диктант» акция. Трускляень школаса диктантть тонафнихненди и школань сотрудникненди ётафтозе «Ученик года—2024» пялькстомать муниципальнай этапонц участницац Дарья Амбаева.
А нинге сонь мазы вайгялец. стирсь аф весть лисендсь велень клубть сценанц лангс морама.
Эрь тевса сатфкст тейть, Дарья! Пяшкодевост сембе мяльхне-арьсематне!
Татьяна АЛЬШИНА.