Кяльсь—народть ваймоц

20 февральста М.Е.Евсевьевонь лемса Мордовскяй государственнай педагогическяй университетса ётафтовсь ила, кона лемтьфоль Родной кялень Международнай шити. Сон васьфневи 21 февральста 2000 кизоста сявомок.
Илать панжезе «Гайгема» инструментальнай ансамбльсь, лама фестивалень и конкурсонь лауреатсь. Сяльде ведущайхне содафтозь пуромфнень Родной кялень Международнай шить историянц и коензон-обуцянзон мархта. МГПУ-нь студенттне поздравляндазь илань участникнень эрь кодама кяльса.
Мероприятияс тертьфоль лама инжи. Ётксост МР-нь культурань, национальнай политикань и архивнай тевонь министрть заместителец Николай Бычков, Мордовскяй (мокшень и эрзянь) народть Межрегиональнай общественнай организациянц председателец Юрий Мишанин и лият. Пуромфнень приветствовандазень вузть ректороц Марина Антонова. Марина Владимировна азозе, што педагогическяй университетса оцю мяль шарфневи кяльхнень тонафнемаснонды. Рузонь, мокшень, эрзянь кяльда башка тяса ушеткшневи тонафневома татароннеське. Вузсь примси участия кяльхнень коряс олимпиадатнень эса, тяса ётафневихть конкурст, научно-популярнай лекцият, семинархт, лингвистическяй квестт, выставкат.
Юрий Мишанин эсь корхтамасонза лятфтазе, што мирса-масторса лувондови пцтай сисем тёжятть кяль. Синь аф шарфтыхть фкя-фкянди, но эрсь эздост эсь лацонза мазы и козя. И пяк пичефти, што кой-конат ёткстост юмсихть. Юрий Александрович кошардозень студенттнень аф виздемс родной кяльснон эзда, кельгомс сонь и сяда сиденяста корхнемс эсь кяльсост. Вдь кяльсь—тя народть ваймоц. Юмай сон, юмай народське.
Сяда тов илась поладовсь концертнай программаса. Кайгсть рузонь, мокшень, эрзянь, татаронь и лия кяльса морот. Творческяй номерснон няфтезь педагогическяй университетонь пцтай сембе факультеттне, коса тонафнихть од ломатть аф аньцек Россиянь эрь кодама уженяста, но и омба масторонь странатнень эзда. Синь лисендсть сценать лангс национальнай щамсост, мезенкса илась ульсь сядонга мазыкс и мялень салайкс.
Концертта меле инжихненди ётафтфоль экскурсия МГПУ-ть эзга.
Ольга колединова.