17 февральста М.Е.Евсевьевонь лемса Мордовскяй государственнай педагогическяй университетса ётафтовсь школьникнень Федеральнай (Северо-Восточнай) олимпиадаснон заключительнай этапоц, коса примасть участия Мордовиянь пцтай сембе райононь и Саранск ошень округонь представительхне. Инь оцюфтольхть Атюрьевскяй, Ардатовскяй, Краснослободскяй, Рузаевскяй и Теньгушевскяй муниципалитеттнень командасна. Нижегородскяй областень и Чувашия Республикань финалисттне примасть участия дистанционнайста.
Олимпиадань васенце этапсь ётафтовсь дистанционнай форматса, коса примасть участия мокшень кяльть и литературать коряс 81 ломань, эрзяннеть—92 ломань. Финалти ётась 36 участник мокшень, 41 ломань эрзянь кяльть и литературать коряс.
Олимпиадань участникнень приветствовандазень М.Е.Евсевьевонь лемса МГПУ-нь родной кялень и литературань кафедрать заведующаец Ольга Налдеева. Сон мярьгсь: «Олимпиадась—тя цебярь тев родной кяльть тонафнеманцты шабатнень и од ломаттнень мяльснон шарфнеманкса. Мокшень и эрзянь филологиять школьниконь олимпиадатнень лувксозост сувафтомац—тя оцю сатфкс марнек регионти».
Северо-Восточнай Федеральнай университетонь довузовскяй образованиянь и профориентациянь факультетонь подготовительнай отделениять руководителец, олимпиадать модератороц Евгения Шеломова поздравляндазень школьникнень и спасибась М.Е.Евсеьевонь лемса МГПУ-нь ректорти Марина Антоновати сотрудничендаманкса и Федеральнай олимпиадать ётафтомаса лезксонкса.
Заключительнай этапонь работась ащесь 10 заданияста родной (мокшень и эрзянь) кяльть и литературать коряс. Ульсть лексикать, грамматикать, стилистикать, фонетикать коряс заданият. Инь оцюволь национальнай кяльса сёрматф прозаическяй произведениять коряс анализть тиемац.