1945 кизонь 25 апрельста Эльба ляйть лангса Торгау ошть видеса ульсь советскяй и американскяй войскатнень васедемасна. Эльбаса васедемась пяк лац няфтезень антигитлеровскяй коалициянь союзническяй соткснень.
КОДА ТЯ УЛЬСЬ
23 апрельста Эльбать малас саф передовой частьтнень эса пачфтьфоль, што пункттнень эса американскяй частьт ашельхть. Аньцек 1945 кизонь 25 апрельста, воиноньконь павазснонды, ульсь историческяй тя васедемась.
25 апрельста 13 частста 30 минутаста Стрела районца, кона Ризать эзда Северо-Западнай ширеса, 58-це гвардейскяй дивизиянь 173-це гвардейскяй стрелковай полконь 7-це ротань воиттне командирть старшай лейтенантть Григорий Степанович Голобородьконь мархта смеказь военнаень группать, кона мольсь Западть ширеста. Миннетне аф ламода эводсть, но курок шарьхкодезь, што инголе аф сят, кинь мархта тюрсть войнать пингста. Сембе сяка Голобородьконь подразделенияц тусь каршезост. Кода содавсь сяльде, тя ульсь 1-це американскяй армиянь 69-це пехотнай дивизиянь развед-группась. Сонь вятезе лейтенантсь А.Коцебу, Техасста ингольдень студентсь, мархтонза ульсть сержанттне и солдаттне Д.Полонскяй, М.Шульман, Г.Ситник (кона сяльде казьфоль Якстерь Звездань орденца), Форестер и лиятне.
Частта меле Торгауть районца 58-це гвардейскяй дивизиянь 173-це гвардейскяй стрелковай полконь 2-це батальононь воиттне няезь, што ошень церькавть колокольнястонза максси сигнал военнай формаса кодама-бди ломань. Гвардиянь лейтенантсь А.С.Сильвашко ёрась пшкядемс теенза немецонь кяльса, но тянь эзда мезевок ашезь лисе. Солдатоньке ляцсть кожфти и кулезь «Москва—Америка!» валхнень. Красноармеецне шарьхкодсть, што церькавонь колокольняса американец. Тя ульсь тяка 69-це пехотнай дивизиянь солдат.
Сяльде маладсь офицер, кона азозе, што синь 1-це американскяй армиянь 69-це пехотнай дивизиянь разведчикт, и эняльдсь офицероньконди ардомс мархтонза батальононь штабу, кона ащи кеветие вайгяльбеса васедемань вастть эзда.
Кода содавсь меле, тя ульсь младшай лейтенантть Уильям Робертсононь группац.