2025 кизоня ули петьф-мазоптф Саранскяень фкя общественнай территориясь. Кона? Кочкама теенть, ошеряйхть!
15 мартста сявомок 30 апрельть самс республиканьконь столицаса мольфтеви Всероссийскяй рейтинговай вайгялень максома. Саранскяень эряйхне кочкасазь ошень колма общественнай васттнень эзда сянь, кона петеви-мазоптови «Жильё и городская среда» нацпроектонь «Формирование комфортной городской среды» проектть вельде.
Вайгялентень ули кода максомс ошень колма территориятнень эзда фкять — Мордовскяй ульцяста скверть, Советскяй площадть, Московскяй ульцяста Фонтаннай спускть инкса. Тиемс тянь ули кода 13.gorodsreda.ru сайтса.
Кда аф лиси эстеенть, лездыхть волонтёрхне, конат тя пингть работайхть ошень ламоц васттнень эса.
Кепотьксонди, Од ломанень центраса покоди стирьхне-цёратне тячи работасть Н.П.Огарёвонь лемса МГУ-нь архитектурань и строительствань институтса.
— Пяк пара мялезонк, мес кошарямс киньге аф эряви, ломаттне синць пара мяльса макссесазь келькф территориять инкса вайгяльснон, — азозе волонтерхнень эзда фкясь, Мордовия Республикань од ломанень центрань покодись Виктория Горбунова. — Лисенди, синь пичедихть ошснон вандыень шинц инкса.
Волонтёрхне покодихть планшет мархта, конатнень эса няфнесазь ломаттненди общественнай васттнень дизайн-проектснон, лиякс азомс, кодамокс кармайхть ня территориятне, кда синь петевихть-мазоптовихть.