Од кизонь илатнень каршеня «Защитники Отечества» фондть филиалоц Мордовияса ётафтсь «Напиши новогоднее письмо солдату» патриотическяй акция. Эсонза примасть участия республикань сембе школатне.
Рузаевкань 10№ школань 4-це класса тонафнись Ксения Суркова тяштсь спецоперациянь аф содаф боецти послания. Сёрма мархта конвертсь максфоль фронту и повсь рядовойть Сергей Храмовонь кядьс.
«Сёрмась токазе ваймозень,—мярьгсь сон.—Аф содаф стирнясь тяштсь, што маряй инксон гордость, арьсесь вийхть, кемоши и курокста мрдамс куду».
Самок отпускс, Сергей сась мяльс васьфтемс сёрмать авторонц мархта. Сон сась Мужествань урокс школав, конань эса тонафни Ксения, казсь теенза конфетат и фронтовой павазу кружка. «Ламос арьсень, мезе тейть каземс, Ксюша. Налхкшт и книгат тейть рамайхть тядятне-алятне, а вов военнай афкуксонь кружка, кона ульсь фронтса, казян аньцек мон»,—мярьгсь Сергей Храмов.
Спецоперациянь ветеранць азондсь стирнятненди и цёранятненди, што СВО-са участиянь примамада инголе работась школаса учителькс. Но теенза ашель кода лядомс ширеса моли событиятнень эзда и путозе кяденц военнай контрактть алу. Сон пачфтсь тонафнихненди военнай эряфть, боевой братствать, афкуксонь ялгаксшить и ся стакатнень-сталмотнень колга, конатнень мархта сашендови васьфнемс передовойса.
Иттне казсть боецненди казнет, рисункат и сёрмадсть сёрмат. Сергей пачфтьсыне синь мархтонза служай ялганзонды.