Максим Афанасьевич Бебан—МАССР-нь Заслуженнай писатель. Шачсь 1915 кизонь 10 февральста Ковылкинскяй райононь Керата велеса. Аделазе Мордовскяй педтехникумть, сяльде—педагогическяй институтть. Войнада инголе и сяда меле покодсь «Мокшень правда» газетаса, республикань Писателень союзса, книжнай издательстваса, «Мокша» журналса.
Максим Бебан—мокшень содаф поэт и прозаик. Сон сась литературав, мзярда странасонк ушедовсь колхоснень пуроптомасна. Васенце произведениянзон эса Максим Афанасьевич сёрмадсь сире эряфть панеманц, ломаттнень ёткса од сотксонь ладямать, культурать касоманц и кемокстаманц колга.
«Тундати казьса» и «Моросна и мяльсна» сборниконза лиссть 1933 кизоня Москуса.
Максим Бебанонь поэтонь вайгялец моли цебярь и вии лихтибряста—мокшэрзятнень устнай народнай творчествастост.
Войнань кизотнень поэтсь няфнезе народоньконь асушинц, эсь масторонц кельгоманц.
Сядонга кемокстась Максим Афанасьевичень вайгялец мирнай пингть, кайгозевсь од вийса. Родинати-тядяти кельгомать, сонь цёранзон-стирензон тевснон, шачема-касома ширть мазышинц—семботь ули кода мумс сонь поэзиясонза.