31 январьста Рузаевскяй муниципальнай райононь Левжа мокшень велень средняй общеобразовательнай школаса ётафтовсь СССР-нь Журналистонь и Писателень союзонь членти, мокшень содаф писательти, «Мокшень правдать» ингольдень главнай редакторонцты, Левжа велеть содаф цёранзон эзда фкяти—Николай Учватовонди лемтьф творческяй илядь—«Питнефтома козяшись» лем ала республиканскяй участия мархта Учватовскяй литературнай муниципальнай лувоматне.
Тя шиня Левжань школав пуромкшнесть учительхть Рузаевскяй райононь школатнень эзда, сашендсть инжихть Саранскяйста, конатнень ётксоль и Николай Ивановичень унокоц Павел Учватов.
Учватовскяй лувоматнень аноклазь Рузаевскяй райононь администрациянь Образованиянь Управлениясь, Информационно-методическяй центрась, Левжань средняй общеобразовательнай школась.
Васенда пуромфненди няфтьфоль Николай Учватовонди и сонь творчестванцты лемтьф выставкась.
Сяда тов ушедсь «Питнефтома козяшись» литературно-музыкальнай композициясь.
Левжань школаса тонафнихне сценать лангса моразь Мордовия Республикать Гимнанц.
Школать директороц Лариса Рузманова азсь седиста моли валхт тя илас пуромфненди.
«Учватовскяй лувоматне кунара ни арасть эрь кизоннекс и тячи оцю мяльса васьфттядязь сембонь Левжань школаса»,—мярьгсь Лариса Анатольевна.
Панжезень лувоматнень «Информационно-методическяй центра» МУК-ть директороц Наталья Щербакова.
—Тя конференциясь кизоста кизос кочкси коль сяда лама ломань. Пингстонза педагокне полафнихть опытса, тиендьсазь семботь инь питнить—шачема кяльть ванфтоманц инкса. Тяфтама пуромкснень пингста кепсевихть литературать, содаф земляконьконь колга кизефксне,—азозе Наталья Викторовна.
Мордовскяй (мокшень и эрзянь) народть Межрегиональнай общественнай организациянц председателец Юрий Мишанин башка мяль шарфтсь сянди, кода левжеряйхне кородозь ванфтсазь содаф ломаньцнон колга мялямть. Мокшень тя велеса шачсть Николай Учватов, содаф морсись Мария Антонова и ламотне лиятне. Сембонь синь эрявихть лятфнемс творческяй тяфтама васедематнень пингста.
Юрий Александрович азондсь организациять Исполкомонц выездной заседаниянзон колга. Тядде фкясь эздост арьсекшневи ётафтомс Рузаевскяй районца.
Сёксенда Мордовияса ули Мокшэрзянь народть съездоц, конанди анокламась мольфтеви ни. Оцюдонга оцю тя пуромксти республиказонк сайхть инь достойнай ломаттне.
Юрий Мишанин казсь школань библиотекати книгат.
Левжань школать шумордаец, Н.П.Огарёвонь лемса Мордовскяй государственнай университетонь филологическяй факультетть деканонц цифровизациять коряс заместителец Дарья Родина сувси ся ломаттнень ёткс, конат лама кизода инголе тисть ушеткс Учватовскяй лувоматненди. Дарья Викторовна лятфтазе, кода сембось эста ульсь и азсь благодарностень валхт тячиень лувоматнень аноклайснон и ётафтыснон лемс.
Мордовия Республикань Правительствать видеса Гуманитарнай наукань Научно-исследовательскяй институтть главнай научнай сотрудникоц, региональнай исследованиянь и этнологиянь отделть заведующаец, Николай Учватовонь унокоц Павел Учватов ванфтсыне Учватофнень семьяснон историянц, коензон, щятянц колга мялямть. Павел Сергеевич эрь кизоня сашенды Левжав мала ломаненцты лемтьф пуромксненди. Тя мезтьке сон азсь приветствиянь валхт пуромфненди.
«Мяляфтса, кода лувоматне ётнесть кемонь кизода инголе. Оцю спасиба сембонди, кит тиезь синь эрь кизоннекс»,—мярьгсь Павел Сергеевич.
Учватовскяй лувоматнень колга эсь мяльснон-арьсемаснон азозь «Якстерь тяштеня» идень журналть главнай редактороц Вера Брындина, писательсь, общественнай деятельсь, блогерсь Николай Храмов, лиятне.
«Питнефтома козяши» литературно-музыкальнай композициять пингста кайгсть морот, сценка лаца няфтьфтольхть Николай Учватовонь произведениянзон эзда пакшт.
Левжань школаса тонафнихнень ули синцень театральнай студиясна, сяс стирнятне и цёранятне сафтозь сембоса.
Кядень кайги цяпамат ульсть Канаефнень семейнай ансамбльснон и лия морайхнень лемс.
Пуромксса ульсь Левжань эряйсь Татьяна Дементьевна, конань цёрац Сергей Николаевич специальнай военнай операциянь участник. Сергей тюремань паксяса ашезе када боевой ялганц и лихтезе сонь вии ляцендематнень алда. Сонць Сергей стакаста ранендафоль, но боевой задачанц пяшкодезе. Тяни цёрась ащи госпитальса.
Татьяна Дементьевнанди, кода и лия тядятненди, азфоль оцю спасиба тяфтама цёрань касфтоманкса. А авать унокоц—Сергей Николаевичень цёрац, Артём, морафтозе алянцты лемтьф стихотворениять, конань сон сёрмадозе школань учительхнень лезксснон вельде.
Вятезь литературно-музыкальнай композициять начальнай классонь учительсь Артём Дивеев и рузонь кялень и литературань учительсь Наталья Учватова.
Сяда тов работать поладозь «Минь фалу карматама мяляфтомост содаф ломаненьконь», «Семьянь келеса», «Кядне тевти тонатфт» секциятне.
Творческяй илядть пингста ванфтольхть семьять и сонь питнишинзон и коензон, родной кяльть и литературать, иттнень тонафтомаснон мархта сотф и лия эрявикс кизефксне.
Татьяна АЛЬШИНА.
Фототне Николай КАРАНОВОНЬ.