Школать шумордамдонза меле высшай образованиянь получама тумс оцю ошу, сяльде мумс аф кальдяв покодема васта, работамс несколька киза и… мрдамс ёмла родиназот—Краснослободскяй району. Тяфта и тись мокшень цёрась Сергей Перякин, конань колга азонттама газетаньконь тячиень номерсонза.
Шачсь-кассь Сергей Михайлович Колапа мокшень велеса, 9-це класста меле поступась Н.П.Огарёвонь лемса МГУ-ть видеса Республиканскяй многопрофильнай академическяй гимназияв, кочкамок экономическяй направлениять.
Кафта кизода меле (гимназиянь курссь мольсь тнярс и ульсь фкя лаца 10-11-це классненди)Сергей Перякин тусь Московскяй областень Сергиев Посад ошу, коса содамошинзон касфнема ушедсь приборостроениянь и информатикань Москувонь государственнай университетть филиалсонза.
Вете кизотне ётасть апак маряк, и вов мокшень цёрась получазе «экономист-информатик» специальностьс коре дипломть.
Вузса тонафнемста Сергей Михайлович, кода и ширде саф лия студенттне, эрясь общежитияса, мусь эстеенза аф кржа ялга. Тонадсь Сергиев Посадти, кона содаф мазы вастонзон мархта. Тя ошса ули ЮНЕСКО-ть Всемирнай наследиянц марнек мирса-масторса содаф объектоц—Троице-Сергиева лаврась. Целайнек тя ошсь сувси Россиянь Золотое Кольцо турть маршрутозонза. Ули мезе ваномс Сергиев Посадса, ули мезень колга азондомс.
Университетса мекольце курсса тонафнемста покодсь банкса, кенерькшнесь и содамошит получамс, и работамс. Сяда тов диплом мархта специалистсь мусь лия работама васта—Москуса ульсь юристти лездыкс. Тевсь мялезонзоль, ниле кизоста сонь лац тонадозе, но… И вов тя «но-ть» мельге колма точкатнень путыне аф стак, и аф стак ашине шуморда валрисьмоть. Сяда тов тяштьса сянь, мезе азсь сонць Сергей Перякин.
«Сергиев Посадса и Москуса ваймозе фалу лажаткшнесь Колапати. 8 кизоста ашель стама ши, мзярда афолине лятфта ёмла родиназень—мокшень тя велеть. Сельминголен фалу ащесть тядянь-алянь кудсь, пересь, калонь кунцема вастоне. И кда ошса эрямста рабочай шитне ётнесть аш ни кода курок, то ваймаманнетнень пингста аф фалу содайне месендемс. Меколи сань мяльс—мрдамс Колапав. И тиине тянь».
2017 кизоня Сергей Михайлович мрдась Мордовияв. Аф лама пачфттяма семьянц колга. Тядяц, Вера Николаевна, мзярошка пинге работась Колапаса начальнай классонь учителькс, тяни покоди дошкольникнень мархта. Аляц, Михаил Васильевич, ульсь Колапань велень администрациянь оцюнякс. Тяни Колапась—велень поселения. Нинге Михаил Перякин покодсь колхозса главнай инженеркс.
Тяни мокшалясь заняф кудъётконь и пирьфонь тефнень мархта. Перякиттне кирдихть тракс, буканят, вазнят и куднармотть, касфнихть перень сёрот.
Вера Николаевнань и Михаил Васильевичень колма идьсна: цёрасна Сергей, стирьсна Екатерина и Ольга.
Колапав мрдамдонза меле мокшень цёрась тевфтома ашезь ляда. Кафта кизот Преображенскяй посёлкань Краснослободскяй Спасо-Преображенскяй монастырьса строителель. Сон семботь маштсы, семботь тисы. Ня валхне пяк ладяйхть Сергей Михайловиченди. Отделкась, штукатурендамась, бетононь тиемась и реконструкциять мархта сотф лия сембе тефне ульсть теенза вийс коре. Кда мезтьке содазе аф сяшкава лац—тонафнезе работамста.
Меле трудонь кельги цёрать тердезь работама Од Кярьга вели «Новокарьгинское» ООО-в зоотехникокс-селекционеркс. Сергей Михайлович ашезь атказа. Теенза семботь няфтезь. Тевсь тусь мялезонза, сяс курокста тонадозе. Тонафнесь Саранскяйса «Мордовиягосплем» АО-са, ётась курст Агробизнесонь кадратнень одукс анокламаснон коряс Мордовскяй институтса. Тянивок фалу касфнесы квалификациянц. Аф кунара получась диплом.
«Зоотехниконь-селекционеронь тевсь пяк тусь мялезон. Кудсовок кирттяма жуватат, сяс тянь коряс пуроптф содамошинень нолясайне тевс аф аньцек работаса»,—мярьгсь Сергей Перякин.
И нинге ламос азондсь велень эряфть цебярь ширензон колга. Колапаса, кле, кожфське лия, ваймоцевок тарксеви сяда тёждяста.
Кодапт планонза эряенди? Сяда тов мялец эрямс ёмла родинаса, покодемс тяниень вастсонза. И, конешна, пуроптомс семья!
Татьяна АЛЬШИНА.