Тядде храмти топоди 160 киза
Церькаву якаматнень, тоса улематнень колга лиятненди азонкшнемс аф эряви. Тянь лац содасаськ сембе. Храмсь—тя васта, коза ломанць якай, сяс мес тянь вешсы ваймоц. Но Кадошкинскяй райононь Адаж велень Троицкяй церькавса улеманьконь и сонь настоятеленц—Кадошкинскяй райононь Благочиннайть протоиерейть Павел Назинонь колга азонттама оцю мяльса. аф кунара якаме командировкас Адажу. И тевоньконь ушедоськ Троицкяй церькавста, коса бславамазь отец Павел.
Троицкяй храмть пяк козя историяц
Пензенскяй губерниянь Инсарскяй уездонь Адаж велеса васенце церькавсь строяфоль 1782 кизоня прихожаттнень ярмакснон лангс. Святиндафоль сон 1784 кизоня. Церькавсь шуфтоннель, кельмоль, ульсь фкя престолоц—Святительть и Чудотворецть Николаень лемс. Колокольняцка тифоль шуфтста.
1864 кизоть самс Николаевскяй церькавсь таштоль ни, тяфта тевсь ащесь и колокольнять мархта, сяс эрявсь капитальнайста петемс или одукс строямс. Церькавса служасть колма ломатть: священниксь, дьяксь и пономарьсь.
Тяка кизоня Адаж велеса ушедсть строяма од церькав. Кода и инголи, тя тевсь мольфтевсь прихожаттнень ярмакснон лангс. Николаевскяй церькавть од зданияц кевоннель. Эста шумордафоль трапезнайть и колокольнять строямасна. Синьге тифтольхть кевста.
Тяда меле Адажень церькавса ульсть кафта престолхт. 1869 кизоня храмть строяф пяльксоц святиндафоль Святой Троицать лемс. Тяфта Адажень церькавсь арась кафта престол мархтокс. Васенцесь—Святительть и Чудотворецть Николаень, омбоцесь—Святой Троицать лемс.
1903 кизоня велеса ульсь пожар, конань пингста палсть церькавонь кой-кона зданиятне. Священникти и псаломщикти строяфтольхть од кутт.
1917 кизоти церькавть штатоц ащесь, кода и инголи, колма ломаньцта: священникста, дьякста, псаломщикста. Храмть видеса ульсь мода, сембоц—35,5 десятина.
Кода пачфнесазь историческяй каготтне, Адажса церькавсь сёлкфоль 1930 кизотнень ушетксста. 1946 кизоть васенце пялестонза сон панчфоль Адаж велень Шкайти верондайхнень эняльдемаснон и ходатайстваснон коряс. Храмти эста эрявсь капитальнай ремонт. Сон мольфтевсь фкя пингть службатнень мархта.
Отчётно-информационнай доклаттнень и информационнай справкатнень эса (1952, 1953, 1954 кизотнень и стак тов) лятфневи, што церькавсь нинге весть ашезь пякснев, работась кода эряви, общинась ётнезень эрявикс сембе перерегистрациятнень.
Отец Павел азозе: Адажень храмсь пякстафоль весть и сявок аф лама пингс, сяс службатне эсонза ётафневсть фалу и озондома сашендсть ломатть аф аньцек Кадошкинскяй, но и Инсарскяй, Рузаевскяй, лия райоттнень эзда. Аф ваномок кардаматнень лангс, Троицкяй храмса венцяфтсть, кстиндафтсть…
1975 кизоня тя церькавти максфоль республиканскяй значениянь архитектурань памятниконь статус, мезсь кой-мзярс лоткафтозень сонь сёлгоманц и срафтоманц-калафтоманц мархта сотф тяряфтоматнень. Ремонт зданияти ашезь тиендев, а ломаттне коль сашендсть службас, церькавонь таинствань тифтема, Шкаень ликонятненди сюконяма.
Подмосковьяста—Адажу
Адажу срхкамстонк тейне удалась содамс, што Троицкяй церькавть настоятелец—Кадошкинскяй райононь Благочиннайсь отец Павел Назин шачемас коре аф Мордовиянь. Васьфтемстонк храмть и сонь прихожанонзон колга азондсь пяк и пяк лама, а вов эсь квалманза ашель мялец пачфтемс, но кой-мезе сяка удалась содамс.
Вов ни 24 киза отец Павел служай Адажса. Сась Мордовияв 2000 кизоня Подмосковьяста духовниконц эзда рекомендательнай сёрма мархта. Ёрась эряфонц лемдемс Шкайти и Святой Троицати служамати—хуш кикс. Мордовияса эста одукс панчсевсть храпне, стройсевсть отт. Эрявсть эсост служайхть. Тя кизефкссь занцесь башка васта. Лама мезе сонь решандаманксонза тись Владыкась Варсонофий, кона ульсь Саранскяй и Мордовскяй епископокс.
Очижинь каршеня недяляста и Очижиста ушедсь отец Павелонь служамань киц Адажень церькавса командировкас кучф священник лаца. Но Шкайсь семботь шарфтозе лиякс. Владыкать Варсонофиень решениянц коряс, отец Павел сяда тов поладозе служамать настоятелькс. Тянь сон примазе сетьмома (смирения) мархта.
Васень пингть семьянц мархта эрясь церькавть видеса священниконь кудса. Тевда пяк ламоль. Велеряйхне шарьхкодсть: отец Павел сась ширезост аф кой-мзярс. 2000 кизотнень ушетксста храмса благотворительхнень ярмакснон лангс ушедсть мольфтевома реставрациянь тефне.
Удалась кочкамс прихожаттнень эзда община, пуроптомс хор, панжемс воскреснай школа. Тяниень пингть матушкась Елена морай клиросса, теенза лезнихть Адажень прихожаттне, кой-кит эздост заняфт и лия тевса: мишендихть штатолхт, сёрматкшнихть помондамс лепт и стак тов.
Матушкась Елена уленди прихожаттнень мархта святой васттнень эса паломническяй поездка мархта. Аф кржа паломникта сашенды Адажувок.
Батюшкась Павел шарфтсь мяль сянди, што ламотне эздост Троицкяй храмса оцю мяльса сюконякшнихть святынятненди, а нинге эняльдихть ётафтомс экскурсия и пачфтемс церькавть историянц колга.
Отец Павелонь и матушка Еленань оцю цёрасна, отец Аркадий, служай Пензенскяй епархиянь церькафнень эзда фкяса. Ёмла цёрасна, Фёдор, тонафни Инсарань школаса. Отец Павел семьянек эряй тя ошса.
Троицкяй храмть настоятелец сатомшка мяль шарфни од ломаттнень духовно-нравственнай воспитандамаснонды. Уленди Адажень школаса, коса «Разговоры о важном» занятиятнень пингста пачфни семьянь питнишитнень, православнай илатнень колга.
отец Павелонди максонь кизефкс Адажень эряйхнень колга, конатнень ламошкасна—Троицкяй церькавть прихожанонза. Вов мезе сон азсь:
—Адажень эряйхне—Шкаенди кемай, пара вайме, ответственнай ломатть. Кда улель лиякс, тняра киза, улема, тяса афолень служа.
Храмсь тячи
Отец Павел Троицкяй храмть колга азондоманц ушедозе Адажень ломаттнень эзда. Оцю Распятиять ваксс маладомстонк мярьгсь:
—Велеряйхне, ниле альнякатне-дугаттне Мишаниттне—зрнянь кядь асу ломатть. Фкясь эздост скульпторсь Павел (ужяленди, тяни аш шиса), храмоньконди тиезе фкя Распятиять. Тя аф аньцек церькавонь святыня, а ся, мезть тиезе эсь велень эряйсь.
Церькавонь пцтай сембе Шкаень ликонятнень (эздост пяк лама) ули историясна. Ётксост—Утоли мои печали Божий Матерть ликоц и Взыскание погибших ликсь, конатненди сядонь киза. Синь сёрматфтольхть Пайгармань монастырть иконописнай школасонза.
—Шкаень ламоц ликнень, улема, ломаттне каннезь срафтф-калафтф церькафнень и, пади, краеведческяй кодамовок музейхнень эзда, штоба ванфтомс юмамда-арамда. Мзярда сань тяза служама, няине, синь аш кода пуроптомс фкя храмонь собранияс. Эздост лама, салсихть мяль, но аф фкя «родонь-плямань».
Альнякатне-дугаттне Мишаниттне тисть Троицкяй храмти резьба, сявомок кепотьксонди сянь, кона ульсь тяда инголе. Лама работасть и киотть мархта сотф тевса.
Церькавса ванфтовихть кунардонь Плащаницат, Шкаень лия ликонят—сембось фкя материалса аф азондови. Сяда пара самс и няемс эстейть.
Престолда церькавса тянивок кафта. Адажть престольнай илац—Святой Тройцянь шись.
Ичкози кулевихть Троицкяй церькавть пайгонзон вайгяльсна, тернемок ломаттнень Шкайти озондома.
Адажень храмсь стама васта, коса сетьми ваймось, муви ответ ламоц кизефкснень лангс. И сонь кенкшенза панжадот сембонди!
Татьяна АЛЬШИНА.
Фототне Николай Карановонь.