Тядде «Зрнянь сёксе-2023» Всероссийскяй агропромышленнай выставкаса республикань аграрийхне сатсть 31 казне. 25-сь ёткстост—зрнянь. Эрь медальть эшксса оцю труд, эсь тевцти кельгома, мяль эреклафтомс велеть и ламолгофтомс аграрнай койхнень-обуцятнень.
«Модать лангса работай ломанць ульсь и лядонды юркс обществати, тя сонь виец и козяшиц. А стака пингста—нежедема вастоц. Сюкпря сембонди, кие покоди паксятнень лангса, велеса, фермаса, перерабатывающай предприятиятнень эса. Сюкпря тинь трудонтень, Родинати кельгомантень инкса, мес машттада и мяленте работамс Мордовиять, оцю странаньконь виияфнеманкса. Тинь вельдент Мордовиянь АПК-сь ламода полафтсь, арась конкуренциянь кирдикс, высокотехнологичнайкс. Башка спасибамань валхт аграрийхненди, конат фалу примсихть участия военнослужащайхненди и од региононь эряйхненди гуманитарнай лезксонь прважамаса»,—мярьгсь Мордовиянь Оцюнясь Артём Здунов.

Тячи Мордовиянь товархнень ули кода няемс аф аньцек Таможеннай союзонь прилавкатнень лангста, но и Азиянь, арабскяй миронь странатнень эса. Республикань аграрийхнень вельде латцеви Китайть, Белоруссиять, БРИКС-нь и СНГ-нь странатнень мархта стратегическяй партнёрства. Стане жа цебярь соткст латцевихть Херсонскяй областть и подшефнай Каланчакскяй округть мархта. Тоса мишендеви ни минь продукцияньке, кона кельговсь тостонь эряйхненди.
Мордовиянь аграрийхненди лямбе валхт азсть Российскяй Федерациянь Федеральнай Собраниянь Государственнай Думань Аграрнай кизефкснень коряс комитетть председателенц заместителец Юлия Оглоблина и Россиянь Велень хозяйствань министерствань Велень территориятнень виияфнемань департаментть директоронц заместителец Виталий Платонов. Сон лувозе РФ-нь велень хозяйствань министрть васенце заместителенц Оксана Лутоть пшкядеманц:
«Мордовиянь агропромышленнай комплекссь тага весть няфтсь оцю профессионализма, обеспечендазе отраслять апак лотксек работаманц и касфтозень ключевой сембе направлениятнень коряс производствань объёмтнень. Сюкпря теенть трудонтень и цебярь результатонтень инкса».
Отраслянь представительхненди максфтольхть государственнай казнет. Тяфта, республикань агропромышленнай комплексса оцюдонга оцю сатфксонкса Мордовия Республикань I степенень Славань орденца казьф Темниковскяй райононь «Подсобное хозяйство» ООО-ть генеральнай директороц, мокшалясь Григорий Самолькин. Мордовия Республикань II степенень Славань орденца казьф «Хлебозавод» АО-ть генеральнай директороц, мокшавась Вера Осипова. Кой-кинди максф «Российскяй Федерациянь велень хозяйствань Заслуженнай работник» почётнай лемсь.
Кой-кит аграрийхнень ёткста чествовандафтольхть семьянек. Семейнай ферматнень ёткста сяськикс кочкафоль Ичалковскяй районцта Валерий Сидоровонь фермац. Семьясь кирди 78 оцю сюра жувата. Мирттнень-рьвятнень 11 идьсна.
Сявомок мяльс велень хозяйстваса тяддень сатфкснень, кочкафтольхть сяськихть и муниципалитеттнень ёткса. Казнет получасть Инсарскяй, Рузаевскяй и лия райоттне, а стане жа инь цебярь студенческяй трудовой отряттне.
Мероприятиясь шумордавсь мялень салай концертса, конань аноклазь государственнай филармониянь артисттне.

Сообщение САТФКСНЕ ТОСОТ, КОСА МАШТЫХТЬ ПОКОДЕМА появились сначала на Мокшень Правда.

Шачсь-кассь Сергей Михайлович Колапа мокшень велеса, 9-це класста меле поступась Н.П.Огарёвонь лемса МГУ-ть видеса Республиканскяй многопрофильнай академическяй гимназияв, кочкамок экономическяй направлениять.
Кафта кизода меле (гимназиянь курссь мольсь тнярс и ульсь фкя лаца 10-11-це классненди)Сергей Перякин тусь Московскяй областень Сергиев Посад ошу, коса содамошинзон касфнема ушедсь приборостроениянь и информатикань Москувонь государственнай университетть филиалсонза.
Вете кизотне ётасть апак маряк, и вов мокшень цёрась получазе «экономист-информатик» специальностьс коре дипломть.
Вузса тонафнемста Сергей Михайлович, кода и ширде саф лия студенттне, эрясь общежитияса, мусь эстеенза аф кржа ялга. Тонадсь Сергиев Посадти, кона содаф мазы вастонзон мархта. Тя ошса ули ЮНЕСКО-ть Всемирнай наследиянц марнек мирса-масторса содаф объектоц—Троице-Сергиева лаврась. Целайнек тя ошсь сувси Россиянь Золотое Кольцо турть маршрутозонза. Ули мезе ваномс Сергиев Посадса, ули мезень колга азондомс.
Университетса мекольце курсса тонафнемста покодсь банкса, кенерькшнесь и содамошит получамс, и работамс. Сяда тов диплом мархта специалистсь мусь лия работама васта—Москуса ульсь юристти лездыкс. Тевсь мялезонзоль, ниле кизоста сонь лац тонадозе, но… И вов тя «но-ть» мельге колма точкатнень путыне аф стак, и аф стак ашине шуморда валрисьмоть. Сяда тов тяштьса сянь, мезе азсь сонць Сергей Перякин.
«Сергиев Посадса и Москуса ваймозе фалу лажаткшнесь Колапати. 8 кизоста ашель стама ши, мзярда афолине лятфта ёмла родиназень—мокшень тя велеть. Сельминголен фалу ащесть тядянь-алянь кудсь, пересь, калонь кунцема вастоне. И кда ошса эрямста рабочай шитне ётнесть аш ни кода курок, то ваймаманнетнень пингста аф фалу содайне месендемс. Меколи сань мяльс—мрдамс Колапав. И тиине тянь».
2017 кизоня Сергей Михайлович мрдась Мордовияв. Аф лама пачфттяма семьянц колга. Тядяц, Вера Николаевна, мзярошка пинге работась Колапаса начальнай классонь учителькс, тяни покоди дошкольникнень мархта. Аляц, Михаил Васильевич, ульсь Колапань велень администрациянь оцюнякс. Тяни Колапась—велень поселения. Нинге Михаил Перякин покодсь колхозса главнай инженеркс.
Тяни мокшалясь заняф кудъётконь и пирьфонь тефнень мархта. Перякиттне кирдихть тракс, буканят, вазнят и куднармотть, касфнихть перень сёрот.
Вера Николаевнань и Михаил Васильевичень колма идьсна: цёрасна Сергей, стирьсна Екатерина и Ольга.
Колапав мрдамдонза меле мокшень цёрась тевфтома ашезь ляда. Кафта кизот Преображенскяй посёлкань Краснослободскяй Спасо-Преображенскяй монастырьса строителель. Сон семботь маштсы, семботь тисы. Ня валхне пяк ладяйхть Сергей Михайловиченди. Отделкась, штукатурендамась, бетононь тиемась и реконструкциять мархта сотф лия сембе тефне ульсть теенза вийс коре. Кда мезтьке содазе аф сяшкава лац—тонафнезе работамста.
Меле трудонь кельги цёрать тердезь работама Од Кярьга вели «Новокарьгинское» ООО-в зоотехникокс-селекционеркс. Сергей Михайлович ашезь атказа. Теенза семботь няфтезь. Тевсь тусь мялезонза, сяс курокста тонадозе. Тонафнесь Саранскяйса «Мордовиягосплем» АО-са, ётась курст Агробизнесонь кадратнень одукс анокламаснон коряс Мордовскяй институтса. Тянивок фалу касфнесы квалификациянц. Аф кунара получась диплом.
«Зоотехниконь-селекционеронь тевсь пяк тусь мялезон. Кудсовок кирттяма жуватат, сяс тянь коряс пуроптф содамошинень нолясайне тевс аф аньцек работаса»,—мярьгсь Сергей Перякин.
И нинге ламос азондсь велень эряфть цебярь ширензон колга. Колапаса, кле, кожфське лия, ваймоцевок тарксеви сяда тёждяста.
Кодапт планонза эряенди? Сяда тов мялец эрямс ёмла родинаса, покодемс тяниень вастсонза. И, конешна, пуроптомс семья!
Татьяна АЛЬШИНА.

Сообщение Шачсь велеса, эрясь ошса и мрдась ёмла родиназонза появились сначала на Мокшень Правда.

Сообщение МР-нь велень хозяйствань и продовольствиянь министркс кемокстаф Антон Илюшкин появились сначала на Мокшень Правда.

Од производствать ванома сашендсь Мордовиянь Оцюнясь Артём Здунов.
«Тепличное» АО-сь—козя история мархта компания, теенза 40 киза ни. Кеняртьфнесамазь ся, што инвесторхненди удалась ётафтомс эряфс тя оцю проектть—8 гектархт площадь, пцтай 2,5 миллиард инвестиция и кафта кизонь кувалмоса работа. А сембода главнайсь—9 тёжятть тонна свежай перень сёра эрь кизоня. Ётаф кувака ки, арьсян сатфкст производстваса и рынкатнень эса»,—мярьгсь республикань руководительсь. Сон стане жа азсь мяль сяда товга кирдемс сотрудничендамань соткст и вятемс марстонь тефт.
Нинге несколька кизода тяда инголе ашель кода арьсемска, што отечественнай производительхненди удалай полафтомс омба масторонь перень сёротнень. Тяни тя—тячиень шись.
«Мялезе седи ваксста азомс благодарностень валхт «РОСТ» компаниять руководстванцты сянкса, мес верондайхть тейнек и ноляйхть инвестицият, сувафнихть тевс тяниень пингонь технологият—тя максси кемоста касондомс-вииякшнемс. Башка мялезе спасибамс «Тепличное» АО-нь сембе командати—несколька ковда тяда инголе ашеме веронда, што сави кочксемс урожай, кона тяни сатсь рекорднай показательхть. Сембось тя сатовсь тинь виентень вельде!»—мярьгсь «Тепличное» АО-ть директороц Елена Родина.
Предприятиянь сотрудникне казьфтольхть Мордовия Республикань Оцюнять Благодарностенц мархта.
«Тепличное» АО-ть инвестпроектоц республикать агропромышленнай комплекссонза колмоцесь, кона нолдаф тевс мекольдень колма кофнень. Инвестициятнень марстонь объёмсна арась пцтай 4 миллиартт цалковай, панчф пцтай 250 рабочай од васта.

Сообщение Миньцонк панжевсть теплицат появились сначала на Мокшень Правда.

ронь касфнихнень ширеса,—азонды хозяйствань директорсь В.И.Сетин.—Тунда и кизонь шитнень ульсть пизепт, мезсь лездсь сёроти аф аньцек касомс, но и кочкамс козя клейковина. Кшинь панемста сон арси белококс. Но и жувататнень андомста тяфтама сёрось ламода лезды касфнемс лофцть лувксонц и буканятнень сталмоснон. Минь хозяйстваньке сиволень и лофцонь мишендемаса пингта инголе пяшкодезень кафкса ковонь платтнень. Приёмнай пункттненди прважаф лама тёжятть тонна продукция.
Владимир Иванович оцю опыт мархта, цебярь азор. Велень хозяйствати лемдсь колмогемонь кафкса киза. Сон лац содасы, мезсь производстваса инь главнайсь, кода ладямс коллективса трудть, кодама решеният примамс, штоба касфтомс производительностть и сатомс оцю сатфкст. Вов и тянивок сёронь урядама шитнень сон най механизаторхнень мархта, путни инголест задачат, ваны качествать мельге, лезды паксяса покодихненди и валса, и тевса.
—Сембось ащи ломаттнень эзда, кода синь тиендьсазь эсь тевснон, кода маштозь латцесазь техникать работанц, стамот кармайхть и результаттне,—сяда тов азонды директорсь Владимир Сетин.—Азса, што эрь комбайнёрть, трактористть, водительть улихть эсь секретонза кода арамс инголи моликс. Главнайсь тейнек аф эряви лядомс ширеса, кирдемс синь тя цебярь тевса, лездомс кизефксснон решандамаса. Сембонь инкса, кие тячи заняф сёронь урядамаса, мон марян гордость, эрь шиня азондан лемозост спасибамань валхт.
Водительсь Евгений Иванович Богачёв паксятнень лангста сёроть усксесы тинголангу. Шити кенерькшни тиемс кемонень-кеветиень рейс. Касфтф урожайть оцю пяльксонц утопненди пачфнесы сон.

—Эрь ломанць, улема, нинге шабакс арьсекшни сянь колга, кикс улемс, кодама профессия кочкамс,—азонды Евгений Богачёв.—Вов и тейневок мзярда-бди кельговсь техникась, рульть ваксса улемась. А сяда меле ни тя тейне арась кельгома тевкс. Ошса покоди водительхнень коряс, тейнек, велень хозяйстваса покодихненди, сашендови тиендемс тефт лия графикс коре. Тундаста сявомок сёксети молемс, пефтома тефт: усксемат удобреният, видьмот, кормат, тяда меле малады сёронь урядамась. Лиякс азомс, озат шобдава рульть ваксс, а куду мрдат ни поздна илять. Но мон кельгса эсь профессиязень, сяс сембе стакатне-сталмотне тейне, кода корхнихть, вийс корят.
Кулят тяфтама ломаттнень эзда валхт, азондомат и седисот арай лад пара тевснон инкса, кода синь маштозь кепсесазь велень хозяйствань производствать, пяшкотькшнесазь инголест путф платтнень, анокт шинек-венек покодемс марстонь тевть инкса.
«Агросоюз—Левженский» ООО-са шнакшневи эрь лац покодись, путневи примеркс лиятненди, синь колгаст азондыхть радиоса, телевиденияса, сёрмадыхть газетатне. И катк тяфтама эсь тевонь кельги ломаньда ули сяда лама, вдь синь эздост ащи велеть вандыень шиц.

Николай Лобанов.
Фототне авторть.

Сообщение Сатфксне тосот, коса ули цебярь азор появились сначала на Мокшень Правда.

Тяни велень хозяйствань предприятиятнень эса моли пси пингсь—сёронь урядамась. Агро «К-С» ООО-нь техникась лиссь паксятнень лангс васенцетнень лувксса и тячи урядаф ни видеф площаттнень 50 процентсна.
—Погодась тядде цебярь, сяс ашельхть кодамовок перяфкст, штоба эсь пингстонза ушедомс уборочнай кампаниять и вишкста мольфтемс тевть,—азозе хозяйствать вятиец.
Сембоц тя кизоня Агро «К-С» предприятияса видеф 2300 гектар мода. Мезе касфтсть? Озимой тозер—545 гектар, снав—300 гектар, яровой тозер—1500 гектар, соя—100 гектар. Рана тундаста сявомок сёксети молемс хозяйствань работникне фкявок ши аф ащекшнихть тевфтома. Лац-ряц аноклави модась, эсь пингстонза и эрявикс лувксса сувафневихть удобрениятне, ётафневихть работат вредительда касыкснень араламанкса. А тяста и цебярь урожайностсь. Тядде сон—40-45 центнер гектарста.

Эряви азомс, меля Агро «К-С» предприятияса ладяфоль рекорд—паксятнень лангста урядафоль 10 тёжятть тонна сёра. Тядде тя цифрать арьсекшневи касфтомс.
—Кеман, тейнек тя тиевомшка,—мярьгсь Николай Борисович.—Аньцек погодась афолемазь «васькафта».

Мзярс корхнеме хозяйствань руководительть мархта, паксятнень лангса ашесть лотксе работамда комбайнатне, сей-тов арнесть сёрода пяшксе машинатне.
—Сембоц работайхть сисем комбайнат, колма автомашинат, тяфта жа вете ломатть покодихть тинголангса,—азозе Николай Борисович.—Сембе техникась минценне. Сон фалу одкстопневи. Меля, кепотьксонди, рамаме кафта од комбайнат.
Шнамань лама валда азсь предприятиянь руководительсь коллективонц колга. Ламоц работникне тястоконнет—Сузгярьге и Ключарёва веленнет. Кда корхтамс комбайнёрхнень колга, синь ётксост улихть кода козя опыт мархтот, стане и отт. Миньге содафтоме мархтост. Фкясь эздост, Алексей Курин, трудендай тя хозяйстваса комсь киза ни.

—Сёронь урядамась—эсь лацонь пинге. Эсонза учендат кизоньберьф,—корхтай комбайнёрсь.—Мзярда урожайсь цебярь, седице кенярди, и урядат эсонза пара мяльса. Ванат кенерьф сёроть лангс и лад арси ваймосот, вдь тоньге ули тяса путксце. Меля хозяйствась рамась од комбайнат и монь озафтомазь эздост фкять руленц ваксс. Техникась цебярь, мярьгат сонць семботь тисы. Сёроть урядасы юмафксфтома.
Нинге фкя комбайнёрсь, конань мархта удалась содафтомс, Владислав Сандин. Цёрась сон од, хозяйстваса работай васенце кизось. Но прянц няфтезе аньцек цебярь ширде. Аф нолгаткшни, покоди эрязста, мезьсовок аф лядонды комбай-нёр ялганзон эзда.
—Вестевок ашезь эвондакшне мялезе тумс эряма ошу,—азозе Владислав.—Кельгса модать лангса покодемазень. Сон, мярьгат, вийхть максси.
Од комбайнёрхнень ёткста и Вячеслав Зуев. Работай предприятияса омбоце кизось, но сатфксонзонды ули кода каямс сельме опыт мархта комбайнёрхнендивок. Вячеслав—производствань передовик. Тячиень шити тялясь ни 10 тёжятть центнер сёра.
Паксяста тинголангу од урожайть пачфнесазь водительхне Владимир Горячкин и Николай Овченков. Синь покодихть виень аф ужяльдезь, а сембода главнайсь—кельгсазь ся тевть, конань мархта заняфт.
Тинголангса сёроть примсесы тя участкать заведующаец, отькорь и эрьгав авась Лариса Курышова. Лезнихть теенза весовщицась Надежда Михалина (сонь мирдец, ламоц лия цёраньконь-аляньконь лаца, апак пельхть тусь специальнай военнай операциянь ётафтома васттненди), тинголангонь работникне Сергей Ерушов, Олег Фоминов, водительхне Николай Амбаев, Ярослав Бояров.

—Тя кизось тейне юбилейнай,—азозе тинголангонь азоравась Лариса Курышова.—Тяддень уборочнай кампаниясь тейне—комозцесь! Монць шачемас-касомас коре Рузаевканнян, лисень рьвакс Ключарёвань цёранди и 1986 кизоста сявомок эрян тяса. Хозяйстваса покодемась мялезон. Тяса улихть сембе условиятне, руководствась фалу кирнесы работникнень ширеснон.
Уборочнайть мархта фкя пингста мольфтеви 2024 кизонь урожайть касфтоманцты анокламась—сокави-тиеви озимой тозерть алу модась. Эздонза видеви 800 гектар. Тя тевса заняфт алят-цёрат Александр и Николай Порватофне. Синь покодихть Т-150 тракторса. К-744 тракторть руленц ваксс озаф Иван Рузаев.

Агро «К-С» предприятияса улемстонк аф кржа пара валда кулеме сонь руководителенц колга. Николай Борисовичень седиец най пичеди марстонь тевть инкса, конань мархта сон заняф эряфоньберьф. Мокшалясь кельгсыне ломаттнень и эсь шачема-касома уженянц. Башка мяль шарфни Сузгярьге и Ключарёва велетнень, конатнень территорияса ащи хозяйствац, социальнай прябаласнон решандамаснонды. Оцю лезкс максси предприятиянь работникненди. Кепотьксонди, аф кунара хозяйствать средстванзон лангс рамафоль куд комбайнёрти Алексей Абросимовонди (сонь цёрац—СВО-нь участник), кона тяда инголе эрясь общежитияса. Тяни эряма вастонь получаманкса очередьса ащи комбайнёрсь Владислав Сандин. И тяфтама кепотькста пяк лама.
«Николай Борисович цебярьдонга цебярь руководитель и пара вайме ломань, кона фалу шарьхкоттянза и анок лездомс!»—тяфтама валхт кульфтольхть Агро «К-С» предприятиять вятиенц колга сембе работникнень эзда, кинь мархта савсь корхнемс. А сонць Николай Борисович маряй гордость коллективонц инкса, мархтонза, кле, тейне любой задачатне вийс корят!
Арьсетяма Николай Борисовиченди и сонь команданцты од сатфкст и молемс аньцек инголи!
Ольга Евдокимова.
Фототне Николай КАРАНОВОНЬ.

Сообщение Агро «К-С» ООО-са трудендай тевонь лац содай команда появились сначала на Мокшень Правда.

Мяленьке пачфтемс велень хозяйствань покодихнень колга, кодама тефт ня шитнень синь вятихть паксятнень и лугатнень лангса, кода мольфтеви тишень анокламась, мзяра лотка пяшкотьф сенажса. Мокшэрзянь велетнень эса ули кинь шнамс, кинь путомс примеркс и сокамаса, и видемаса, и тишень лядемаса, и сёронь касфнемаса-урядамаса. И эрсь эздост анок няфтемс прянц, сатомс оцю сатфкст эрь-кодама пялькстомаса.
«Агросоюз-Левженский» ООО-са сембе тефне мольфтевихть инголькиге арьсеф планц коре. Тяса лац содасазь, мзярда лисема сокама-видема, кодама пингть анокламат корматне, мзярда кярьмодема сёронь тялямати.

—Июнь и июль кофне, тя самай ся пингсь, мзярда пяшкодемат лоткне сенажса, тишесь марама капас, анокламат сёронь лядемс комбайнатне,—азонды хозяйствань вятись В.И.Сетин.—Аф прянь шнамга азса, ётай кизотнень коряс сембе ня тефне мольфтевихть сяда лац, курокста и оцю качества мархта. Кепотьксонди, тишень и сенажень анокламаса планць пяшкотьф ни сизьгемонь процентс. Сембе корматне пачфневихть ферматнень малас, штоба тялонь кофнень аф содамс синь усксемаснон и жувататнень рационц сувафтомаснон мархта сталмот. Мзярда сембось ряцок, траксне топоцьтот, аш кодамовок прябалат жувататнень андомаснон мархта. Тяфта тевти малаткшнемась максси тейнек возможностть кизоста кизос касфнемс лофцонь потямать. Кепотьксонди, мана эрь траксста средняйста минь получаме кафкса тёжянень килограмма лофца. Тядде тя цифрась касы нинге вете сятт килограммас, сяс мес эрь траксти ули аноклаф пцтай ведьгемонень центнер кормовой единица и сембе синь оцю качествань.

Владимир Иванович пара мяльса азозень сятнень лемснон, кие тишень, сенажень анокламаса сатни оцю сатфкст. Нят: механизаторхне Евгений Курзенков, Владимир Прончатов, водительсь Евгений Богачёв, жувататненди кормань пачфнись Александр Кузнецов, кормань анокламать мельге учётонь вятись Алексей Наумов. Тя тевса синь заняфт аф васенце кизось ни, содасазь мзярда лисемс лядема и кярьмодемс тюковандама. Тяда башка, оцю урожай учсеви получамс и кукурузаса заняф площаттнень эзда. Тя культурась хозяйстваса видеф кафта сятт гектар лангса. Марнек арьсеф анокламс аф 1500 тоннада кржа.

Краснослободскяй районца кормань анокламаса инь лац мольфтевихть тефне «Подкова» ООО-са. Тя хозяйстваса кирдихть алашат. Республикаса алашань кирдемать коряс велень хозяйствань предприятиятне лувовихть сурса, но синь аф ёмла путкссна Продовольственнай программать пяшкодемаса. Лама киза «Подкова» ООО-са аноклакшнесть кумыс, кона пачфневсь странань ламоц региоттненди. Тяни тястонь покодихне касфнихть племенной жуватат. Эрь кизоня хозяйствась мишенди ведьгемонь пря алаша. Сон, кода содаф, тишень и пинемонь кельги жувата, вов мес тяса тевс ноляви эрь частсь, штоба сяда лама анокламс тяфтама корма.

Кемнилие киза механизаторкс хозяйстваса покоди Александр Викторович Бушаев. Ломанць тевонь кельгихнень эзда, тяфтапнень колга корхнихть, кенерькшни сембоса. И тя видец тяфта, сон и ляди, и тюковандай.

—Мзярда улихть кормат, эста кармай и лофца, и сиволь,—мярьгсь Александр Бушаев.—Тялонь кофненди сатомшка ни анокламе и тишеда, и сенажда. Нюрьхкяня пингста ули урядаф кукурузаське.
Мордовия Республикань Велень хозяйствань и продовольствиянь министерствать даннаензон коряс, тячиень шити марнек республикаса аноклаф 28000 тонна тише, 329000 тонна сенаж. Тя сяда лама манать коряс. Лугатнень и паксятнень лангса кормань анокламась стаки мольфтеви.
Николай Лобанов.
Фототне авторть.

Сообщение Улихть кормат, кармайи лофцовок появились сначала на Мокшень Правда.

Тяни велеряйхне жуватат аф кирдихть: кие работай Москуса, кие мушенды райцентраса тев. Велязем велеса, улема, аньцек минь семьяньке тячемс ванфтсы тя койть.
«Мес тячемс вятьсасть тя стака тевть?» кизефксть лангс алязе отвечси: «А кода ина велеса эрямс?» Вячеслав Мефодьевич мзярошка киза якась работама Москуву, но кадозе тя тевть—стака улемс ичкозе семьять эзда. Марнек тефнень вятьсазь миртть-рьват кафонест, кой-коста Игорь дуганозень мархта сашенттама ошста.
Тядязе и алязе шачсть трудонь кельги семьяса. Бабазе работцесь Веляземонь колхозса складонь заведующайкс, атязе—мешень ваныкс. Щавазень мархта щятязе покодсть шабрань Заропка велень колхозса. Фкя-фкянь мархта од ломаттне арасть содавикс нинге школаса тонафнемста. Сяльде, мзярда алязе шумордазе Н.П.Огарёвонь лемса Мордовскяй госуниверситетонь Аграрнай институтонь «Зоотехния» отделениять, а тядязе Пензенскяй областень Спасск ошень училищаса «Бухгалтер в сельском хозяйстве» отделениять, рьвяясть.
Кирдемс-аф жуватат, тяфтама кизефкс инголест ашезь стякшне. Тя козяшись сатовсь теест бабазень-атязень эзда. Мзярда атязе, Великай Отечественнай войнань идсь, Мефодий Елисеевич сяда одоль, лезнесь кудъётконь тевса, ванць мешнень мельге. Нешкоперень ваныкс ульсь 60-да лама киза. Васенда работась колхозонь нешкопереса, сяльде водендась мешт сонць. Мархтонза идькс пингста сявомок лезнесь алязе—семьяса инь ёмла идсь. Атязе тонафтозе цёранц и рьвянянц семботи, мезе содась сонць. Мефодий Елисеевич колма кизот кода тусь эряфста, а тевоц эряй. Алязе и тядязе старандайхть сонь вятемс седикс-ваймокс.
Мешнень мархта кизоньберьф тевда лама. Медь аф ули, кда аф ванцак мешвелеть, эсь пингстонза аф андсайть, аф качандасак медть. Мекольдень пингть медьта сявонттяма аф пяк лама, 600 килограммать малава, сяс мес паксятнень ушедсть пркшсемост ядса. Ламоц мешне урадсть. Мешненди, Зубуса теест мярьгихть «прамушт», маладома аньцек цебярь мяль-арьсема мархта.
Ули паксяньке, конань лангса алязе работай кизоньберьф. Аф кунара рамаме трактор и эрявикс инвентарь. Тяни эстейнек ули кода лядемс, шарфнемс и тюковандамс тишеть. Семботь тиендьсы алязе сонць, теенза лезды тядязе Наталья Владимировна.
Тняра кизоста мирттне-рьвятне тонадсть ни стяшендомс 5 частста шобдава и сувсемс куду пцтай 10 частста илять. Рана шобдава жувататне вятемат лугав. Лофцста аноклаф вайть, мичкть, сырть, шапама лофцть тядязе мишендьсы.
Кизонь шись тяла анды, сяс оцю хозяйствань кирдихне май ковть саманц пичефтьсазь аноконди. 30 сотка модать, коса озафтф модамарь, урядамац аф тёждя.
Велень стака трудть дуганозень мархта содасаськ идькс пингста сявомок. Кда ёрат эряфса мезе-бди сатомс, эряви лама работамс.
Мон тонафнень Н.П.Огарёвонь лемса Мордовскяй госуниверситетонь филологическяй факультетса. Шумордайне бакалавриатть и магистратурать, тяни тонафнян аспирантураса. Игорь сотозе эряфонц юристонь тевть мархта. Шумордазе тяка университетонь юридическяй факультетонь бакалавриатть, тяни тонафни магистратураса, работай прокуратураса.
Меля Вячеслав Мефодьевич получась Мордовия Республикань Оцюнять Артём Здуновонь эзда Диплом.
Пингсь моли инголи, и штоба аф лядомс фталу, эряви фалу тонафнемс. Тядде алязе ётась «Организация собственного дела» (с составлением бизнес-плана для самозанятого)» дополнительнай общеразвивающай программа. Зубово-Полянскяй районца тя тонафнемать ётафтозе Саранскяень Наукань и техникань кудсь.
Тонафнемать пингста корхтамась мольфтевсь сянь колга, кода вятемс личнай подсобнай хозяйствать. Алязе тись бизнес-план, кона тяни эряви ётафтомс эряфс. Тянкса государствась макссь ярмак.
Эрь тевсь аф тёждя, кда тиендьсак сонь совестьс коре. Тядязе и алязе трудонь кельги ломатть. Марян гордость, мес шачень тяфтама семьяса.
Оксана Белкина.

Сообщение Кие машты покодема, ся машты эряма появились сначала на Мокшень Правда.

Меля хозяйстваса кочкафоль 12,5 тёжянь тонна сёра, урожайностсь—46 центнер гектарста. Сёронь урожайть касондоманкса крестьянско-фермерскяй хозяйствась рамась зерноочистительнай и сортировочнай комплекст. Стане жа тифтольхть сёротнень апак лотксек косьфнеманкса бункерхт-накопительхть.
Хозяйствань руководительсь Николай Сардаев азозе, што 2016 кизоня петьфоль механическяй мастерскойсь, помещениять пяльксоц тифоль работникненди ваймосема вастокс, душевоенди. Лямбе помещенияса техникать петемац мольфтеви тялондавок. Хозяйствать территорияса работай столовай—питнефтома пси обетт пачфневихть нльне ся работникненди, конат покодихть паксяса. Аф юксни КФХ-сь тястонь эряйхнень колгавок—максси эрявикс лезкс, тялонда чистендакшнесыне китнень Перхляйскяй, Шишкеевскяй и Пайгармскяй велень поселениятнень эса. Азфоль, што тундань сокамань-видемань тефнень хозяйствась шумордакшнесыне эсь пингстонза.
Республикань руководительсь сувсесь стане жа КФХ-ть базас, коса макссь оценка велень хозяйствань техникати и видемать пингста эрявикс агрегаттненди, ванозе зерноочистительнай комплексть.
Мекольдень кизотнень хозяйствась тонаткшнесы од направлениять—животноводствать. 2019 кизоня КФХ-ти максфоль оцю сюра мархта жуватань фермась. Тячи жувататнень лувкссна касфтф кафтонь-крда, меля получафоль пцтай 200 тонна лофца. Тядде хозяйствать эвондась 150 оцю сюра мархта жуватанди лофцонь фермань нинге фкя зданияц, арьсекшневи касфтомс тракснень лувксснон.
Целайнек Рузаевскяй районца тундань-паксянь тефне шумордама лангсот: видеви пцтай 25 тёжянь гектар площадть эзда 18 тёжянь гектарсь максф яровой культуратнень алу. Республикаса тундань видемась шумордаф 80 процентта.

Сообщение МР-нь оцюнять Рузаевскяй районца улеманц колга появились сначала на Мокшень Правда.

—Саранскяйса эста эрясь стирь ялгазе, а тяни ни рьвязе Валентина. Сонга кирдезе ширезень, кле, шачема ширесонга ули кода лац эрямс. И афкукс. Тевфтома фкявок ши ашень аще. Семьязе тясонга тряви. Рьвязень мархта касфттама кафта цёрат. Пара мялезон, што синь кассть сельминголен, няине, кода идне тиезь васенце аськолксснон, кода азозь васенце валснон. Оцюти, Матвеенди, курок топоди 6 кизот. Ёмлати, Назаронди, 2 кизонят. Мон тонафтан эсост алянь тефненди. Синь фалу пяк учендыхть, мзярда мрдан покодема вастстон, шарыхть перьфкан, лажаткшнихть. Деряй аф тянь эса павазсь? Фкявок ши ашень каенда, мес кадыне Москуть.
Андрей Мордовияса аф эстокиге музе эсь вастонц. Мзяра-бди пинге покодсь кшинь усксикс хлебозаводса, меле бригада мархта арнесь республикать эзга, тиендсть-петнесть перяфкст-месть. Но вов ни колма кизот кода сон покоди Рузаевскяй райононь Болду велень «Исток» хозяйстваса. Васень пингть якась жувататнень мельге—скотниколь.
—Тейне тя тевса сембось лац содафоль, вдь мон шачень-касонь велеса, и минь фалу кирнеме и тракст, и тувот. Скотникокс покодемста тейне сидеста сашенкшневсь вазыяфнемс тракст, лезнемс ветеринарти пчкафтомстост, вакцинань путнемста. И вов пяле кизода инголе хозяйствань азорхне «касфтомазь», тяни мон бригадиран,—азозе мокшалясь.
Андрей илештень кятть кярьмодсь од тевти. Валонзон коряс, инголи ульсь аф ламода пелькс. Но мархтонза покоди опытнай ветеринарсь и хозяйствань руководительсь сембе ширде лездсть и лезнихть од специалистти. Тянкса сон азонды теест оцю сюкпря.
—Коллективть эзда ламось ащи. Кда мархтот покоди ломаттне венепнесазь тейть кядьснон, тевти тонадат вишкста и тёждяста. Аньцек аф нолгаткшнема. Илештить кяттнень и инголи!—мярьгсь алясь.
Андрей Анисимов «Исток» ООО-са лувондови цебярь специалистокс. Хозяйствань руководствась надияй лангозонза. Мокшалясь покоди виде ваймот, кода тонафтозь тядянза-алянза.
—Мон кельгса велень эряфть. Жуватань мельге якамать аф лувондса стама тевкс, конань эряви визнемс ошень ялгатнень инголе и сёпондомс эздост. Арьсян, велень хозяйстваса покодемась сяда пара офисса шинек-венек нюдендемать коряс. Апак пельхть семьянек ётан эряма вели, аньцек эвондай возможность. А мзярс эрь шиня арнян Болду Саранскяйста. Стакат-сталмот тянкса аф васьфнян. Кой-коста сявондьса мархтон оцю цёразень. Пингонь ётазь ёмлатинге няфтьса покодема вастозень. Шабатненди ёмластокиге содама велень трудть питнец, ату кармайхть арьсема, што кшись касы шуфта пряса,—пеедезь азозе Андрей Анисимов.
Од алясь кельгсы эсь тевонц, марясы прянц эсь вастсонза. И пандыхть, кле, аф кальдявста. Маласонзот иденза, рьвац, тядянза-алянза, марнек оцю юромоц. А мезе тага эряви ломанти павазонди?
Марина Стешина.

Сообщение Покоди велеса итянкса аф ужяльди появились сначала на Мокшень Правда.