Павазуван, мес шачень семьяса, коса лац содасазь кшить питненц. Тядяне-аляне, Вячеслав и Наталья Белкиттне, кирдихть оцю хозяйства: колма тракст, кемонь ведрашт, тувот, сараст, ули нешкопересна, 30 сотка пересна, паксясна. Ингольдень пинкнень Зубово-Полянскяй районца тяфтама оцю хозяйстват васьфневсть сидеста.
Тяни велеряйхне жуватат аф кирдихть: кие работай Москуса, кие мушенды райцентраса тев. Велязем велеса, улема, аньцек минь семьяньке тячемс ванфтсы тя койть.
«Мес тячемс вятьсасть тя стака тевть?» кизефксть лангс алязе отвечси: «А кода ина велеса эрямс?» Вячеслав Мефодьевич мзярошка киза якась работама Москуву, но кадозе тя тевть—стака улемс ичкозе семьять эзда. Марнек тефнень вятьсазь миртть-рьват кафонест, кой-коста Игорь дуганозень мархта сашенттама ошста.
Тядязе и алязе шачсть трудонь кельги семьяса. Бабазе работцесь Веляземонь колхозса складонь заведующайкс, атязе—мешень ваныкс. Щавазень мархта щятязе покодсть шабрань Заропка велень колхозса. Фкя-фкянь мархта од ломаттне арасть содавикс нинге школаса тонафнемста. Сяльде, мзярда алязе шумордазе Н.П.Огарёвонь лемса Мордовскяй госуниверситетонь Аграрнай институтонь «Зоотехния» отделениять, а тядязе Пензенскяй областень Спасск ошень училищаса «Бухгалтер в сельском хозяйстве» отделениять, рьвяясть.
Кирдемс-аф жуватат, тяфтама кизефкс инголест ашезь стякшне. Тя козяшись сатовсь теест бабазень-атязень эзда. Мзярда атязе, Великай Отечественнай войнань идсь, Мефодий Елисеевич сяда одоль, лезнесь кудъётконь тевса, ванць мешнень мельге. Нешкоперень ваныкс ульсь 60-да лама киза. Васенда работась колхозонь нешкопереса, сяльде водендась мешт сонць. Мархтонза идькс пингста сявомок лезнесь алязе—семьяса инь ёмла идсь. Атязе тонафтозе цёранц и рьвянянц семботи, мезе содась сонць. Мефодий Елисеевич колма кизот кода тусь эряфста, а тевоц эряй. Алязе и тядязе старандайхть сонь вятемс седикс-ваймокс.
Мешнень мархта кизоньберьф тевда лама. Медь аф ули, кда аф ванцак мешвелеть, эсь пингстонза аф андсайть, аф качандасак медть. Мекольдень пингть медьта сявонттяма аф пяк лама, 600 килограммать малава, сяс мес паксятнень ушедсть пркшсемост ядса. Ламоц мешне урадсть. Мешненди, Зубуса теест мярьгихть «прамушт», маладома аньцек цебярь мяль-арьсема мархта.
Ули паксяньке, конань лангса алязе работай кизоньберьф. Аф кунара рамаме трактор и эрявикс инвентарь. Тяни эстейнек ули кода лядемс, шарфнемс и тюковандамс тишеть. Семботь тиендьсы алязе сонць, теенза лезды тядязе Наталья Владимировна.
Тняра кизоста мирттне-рьвятне тонадсть ни стяшендомс 5 частста шобдава и сувсемс куду пцтай 10 частста илять. Рана шобдава жувататне вятемат лугав. Лофцста аноклаф вайть, мичкть, сырть, шапама лофцть тядязе мишендьсы.
Кизонь шись тяла анды, сяс оцю хозяйствань кирдихне май ковть саманц пичефтьсазь аноконди. 30 сотка модать, коса озафтф модамарь, урядамац аф тёждя.
Велень стака трудть дуганозень мархта содасаськ идькс пингста сявомок. Кда ёрат эряфса мезе-бди сатомс, эряви лама работамс.
Мон тонафнень Н.П.Огарёвонь лемса Мордовскяй госуниверситетонь филологическяй факультетса. Шумордайне бакалавриатть и магистратурать, тяни тонафнян аспирантураса. Игорь сотозе эряфонц юристонь тевть мархта. Шумордазе тяка университетонь юридическяй факультетонь бакалавриатть, тяни тонафни магистратураса, работай прокуратураса.
Меля Вячеслав Мефодьевич получась Мордовия Республикань Оцюнять Артём Здуновонь эзда Диплом.
Пингсь моли инголи, и штоба аф лядомс фталу, эряви фалу тонафнемс. Тядде алязе ётась «Организация собственного дела» (с составлением бизнес-плана для самозанятого)» дополнительнай общеразвивающай программа. Зубово-Полянскяй районца тя тонафнемать ётафтозе Саранскяень Наукань и техникань кудсь.
Тонафнемать пингста корхтамась мольфтевсь сянь колга, кода вятемс личнай подсобнай хозяйствать. Алязе тись бизнес-план, кона тяни эряви ётафтомс эряфс. Тянкса государствась макссь ярмак.
Эрь тевсь аф тёждя, кда тиендьсак сонь совестьс коре. Тядязе и алязе трудонь кельги ломатть. Марян гордость, мес шачень тяфтама семьяса.
Оксана Белкина.