Агро «К-С» ООО-сь—республикань фкя инь оцю и сатфксонь сатни предприятия. Тяса покодихть сталмода аф пели ломатть, конат кельгсазь эсь шачема-касома уженяснон. Синь виень аф ужяльдезь трудендамаснон вельде Рузаевскяй райононь и региононь эряйхне обеспечендафт качественнай продукцияса. вов ни 40 киза вятьсы ведущай тя предприятиять опытнай и грамотнай аграрийсь, МР-нь велень хозяйствань Заслуженнай работниксь, Рузаевкань почётнай гражданинць Николай Борисович Амбаев. Мокшалясь цебярь хозяйственник. Сонь маштозь тевонь вятеманц, ялгафты и трудонь кельги коллективонц вельде кизоста кизос вииякшнихть-кемокснихть Сузгярьге и Ключарёва велетне.
Тяни велень хозяйствань предприятиятнень эса моли пси пингсь—сёронь урядамась. Агро «К-С» ООО-нь техникась лиссь паксятнень лангс васенцетнень лувксса и тячи урядаф ни видеф площаттнень 50 процентсна.
—Погодась тядде цебярь, сяс ашельхть кодамовок перяфкст, штоба эсь пингстонза ушедомс уборочнай кампаниять и вишкста мольфтемс тевть,—азозе хозяйствать вятиец.
Сембоц тя кизоня Агро «К-С» предприятияса видеф 2300 гектар мода. Мезе касфтсть? Озимой тозер—545 гектар, снав—300 гектар, яровой тозер—1500 гектар, соя—100 гектар. Рана тундаста сявомок сёксети молемс хозяйствань работникне фкявок ши аф ащекшнихть тевфтома. Лац-ряц аноклави модась, эсь пингстонза и эрявикс лувксса сувафневихть удобрениятне, ётафневихть работат вредительда касыкснень араламанкса. А тяста и цебярь урожайностсь. Тядде сон—40-45 центнер гектарста.
Эряви азомс, меля Агро «К-С» предприятияса ладяфоль рекорд—паксятнень лангста урядафоль 10 тёжятть тонна сёра. Тядде тя цифрать арьсекшневи касфтомс.
—Кеман, тейнек тя тиевомшка,—мярьгсь Николай Борисович.—Аньцек погодась афолемазь «васькафта».
Мзярс корхнеме хозяйствань руководительть мархта, паксятнень лангса ашесть лотксе работамда комбайнатне, сей-тов арнесть сёрода пяшксе машинатне.
—Сембоц работайхть сисем комбайнат, колма автомашинат, тяфта жа вете ломатть покодихть тинголангса,—азозе Николай Борисович.—Сембе техникась минценне. Сон фалу одкстопневи. Меля, кепотьксонди, рамаме кафта од комбайнат.
Шнамань лама валда азсь предприятиянь руководительсь коллективонц колга. Ламоц работникне тястоконнет—Сузгярьге и Ключарёва веленнет. Кда корхтамс комбайнёрхнень колга, синь ётксост улихть кода козя опыт мархтот, стане и отт. Миньге содафтоме мархтост. Фкясь эздост, Алексей Курин, трудендай тя хозяйстваса комсь киза ни.
—Сёронь урядамась—эсь лацонь пинге. Эсонза учендат кизоньберьф,—корхтай комбайнёрсь.—Мзярда урожайсь цебярь, седице кенярди, и урядат эсонза пара мяльса. Ванат кенерьф сёроть лангс и лад арси ваймосот, вдь тоньге ули тяса путксце. Меля хозяйствась рамась од комбайнат и монь озафтомазь эздост фкять руленц ваксс. Техникась цебярь, мярьгат сонць семботь тисы. Сёроть урядасы юмафксфтома.
Нинге фкя комбайнёрсь, конань мархта удалась содафтомс, Владислав Сандин. Цёрась сон од, хозяйстваса работай васенце кизось. Но прянц няфтезе аньцек цебярь ширде. Аф нолгаткшни, покоди эрязста, мезьсовок аф лядонды комбай-нёр ялганзон эзда.
—Вестевок ашезь эвондакшне мялезе тумс эряма ошу,—азозе Владислав.—Кельгса модать лангса покодемазень. Сон, мярьгат, вийхть максси.
Од комбайнёрхнень ёткста и Вячеслав Зуев. Работай предприятияса омбоце кизось, но сатфксонзонды ули кода каямс сельме опыт мархта комбайнёрхнендивок. Вячеслав—производствань передовик. Тячиень шити тялясь ни 10 тёжятть центнер сёра.
Паксяста тинголангу од урожайть пачфнесазь водительхне Владимир Горячкин и Николай Овченков. Синь покодихть виень аф ужяльдезь, а сембода главнайсь—кельгсазь ся тевть, конань мархта заняфт.
Тинголангса сёроть примсесы тя участкать заведующаец, отькорь и эрьгав авась Лариса Курышова. Лезнихть теенза весовщицась Надежда Михалина (сонь мирдец, ламоц лия цёраньконь-аляньконь лаца, апак пельхть тусь специальнай военнай операциянь ётафтома васттненди), тинголангонь работникне Сергей Ерушов, Олег Фоминов, водительхне Николай Амбаев, Ярослав Бояров.
—Тя кизось тейне юбилейнай,—азозе тинголангонь азоравась Лариса Курышова.—Тяддень уборочнай кампаниясь тейне—комозцесь! Монць шачемас-касомас коре Рузаевканнян, лисень рьвакс Ключарёвань цёранди и 1986 кизоста сявомок эрян тяса. Хозяйстваса покодемась мялезон. Тяса улихть сембе условиятне, руководствась фалу кирнесы работникнень ширеснон.
Уборочнайть мархта фкя пингста мольфтеви 2024 кизонь урожайть касфтоманцты анокламась—сокави-тиеви озимой тозерть алу модась. Эздонза видеви 800 гектар. Тя тевса заняфт алят-цёрат Александр и Николай Порватофне. Синь покодихть Т-150 тракторса. К-744 тракторть руленц ваксс озаф Иван Рузаев.
Агро «К-С» предприятияса улемстонк аф кржа пара валда кулеме сонь руководителенц колга. Николай Борисовичень седиец най пичеди марстонь тевть инкса, конань мархта сон заняф эряфоньберьф. Мокшалясь кельгсыне ломаттнень и эсь шачема-касома уженянц. Башка мяль шарфни Сузгярьге и Ключарёва велетнень, конатнень территорияса ащи хозяйствац, социальнай прябаласнон решандамаснонды. Оцю лезкс максси предприятиянь работникненди. Кепотьксонди, аф кунара хозяйствать средстванзон лангс рамафоль куд комбайнёрти Алексей Абросимовонди (сонь цёрац—СВО-нь участник), кона тяда инголе эрясь общежитияса. Тяни эряма вастонь получаманкса очередьса ащи комбайнёрсь Владислав Сандин. И тяфтама кепотькста пяк лама.
«Николай Борисович цебярьдонга цебярь руководитель и пара вайме ломань, кона фалу шарьхкоттянза и анок лездомс!»—тяфтама валхт кульфтольхть Агро «К-С» предприятиять вятиенц колга сембе работникнень эзда, кинь мархта савсь корхнемс. А сонць Николай Борисович маряй гордость коллективонц инкса, мархтонза, кле, тейне любой задачатне вийс корят!
Арьсетяма Николай Борисовиченди и сонь команданцты од сатфкст и молемс аньцек инголи!
Ольга Евдокимова.
Фототне Николай КАРАНОВОНЬ.