Аф кунара Татарстан Республикаса ётафтовсь модань сокамать коряс Россиянь кемонце чемпионатсь. Эсонза примась участия 65 механизатор странань нильгемонь регионцта, а тяфта жа Казахстанцта, Белоруссияста, Кыргызстанцта. Конкурсанттненди эрявсь нюрьхкяня пингста МТЗ тракторса сокамс модань аф оцю пакш. Васенце вастти путневсь качествась. Мордовия Республикаста тя пялькстомаса эсь маштомошиснон няфтезь «Развитие села» АО-нь специалистсь Сергей Митрофанов и Н.П.Огарёвонь лемса Механикань и энергетикань институтонь преподавательсь Алексей Жалнин. Кафцьке сатсть аф кальдяв результатт. Сергей Митрофанов арась призёркс, сатозе колмоце вастть.
Мяленьке пачфтемс велень хозяйствань покодихнень колга, кодама тефт ня шитнень синь вятихть паксятнень и лугатнень лангса, кода мольфтеви тишень анокламась, мзяра лотка пяшкотьф сенажса. Мокшэрзянь велетнень эса ули кинь шнамс, кинь путомс примеркс и сокамаса, и видемаса, и тишень лядемаса, и сёронь касфнемаса-урядамаса. И эрсь эздост анок няфтемс прянц, сатомс оцю сатфкст эрь-кодама пялькстомаса.
«Агросоюз-Левженский» ООО-са сембе тефне мольфтевихть инголькиге арьсеф планц коре. Тяса лац содасазь, мзярда лисема сокама-видема, кодама пингть анокламат корматне, мзярда кярьмодема сёронь тялямати.
—Июнь и июль кофне, тя самай ся пингсь, мзярда пяшкодемат лоткне сенажса, тишесь марама капас, анокламат сёронь лядемс комбайнатне,—азонды хозяйствань вятись В.И.Сетин.—Аф прянь шнамга азса, ётай кизотнень коряс сембе ня тефне мольфтевихть сяда лац, курокста и оцю качества мархта. Кепотьксонди, тишень и сенажень анокламаса планць пяшкотьф ни сизьгемонь процентс. Сембе корматне пачфневихть ферматнень малас, штоба тялонь кофнень аф содамс синь усксемаснон и жувататнень рационц сувафтомаснон мархта сталмот. Мзярда сембось ряцок, траксне топоцьтот, аш кодамовок прябалат жувататнень андомаснон мархта. Тяфта тевти малаткшнемась максси тейнек возможностть кизоста кизос касфнемс лофцонь потямать. Кепотьксонди, мана эрь траксста средняйста минь получаме кафкса тёжянень килограмма лофца. Тядде тя цифрась касы нинге вете сятт килограммас, сяс мес эрь траксти ули аноклаф пцтай ведьгемонень центнер кормовой единица и сембе синь оцю качествань.
Владимир Иванович пара мяльса азозень сятнень лемснон, кие тишень, сенажень анокламаса сатни оцю сатфкст. Нят: механизаторхне Евгений Курзенков, Владимир Прончатов, водительсь Евгений Богачёв, жувататненди кормань пачфнись Александр Кузнецов, кормань анокламать мельге учётонь вятись Алексей Наумов. Тя тевса синь заняфт аф васенце кизось ни, содасазь мзярда лисемс лядема и кярьмодемс тюковандама. Тяда башка, оцю урожай учсеви получамс и кукурузаса заняф площаттнень эзда. Тя культурась хозяйстваса видеф кафта сятт гектар лангса. Марнек арьсеф анокламс аф 1500 тоннада кржа.
Краснослободскяй районца кормань анокламаса инь лац мольфтевихть тефне «Подкова» ООО-са. Тя хозяйстваса кирдихть алашат. Республикаса алашань кирдемать коряс велень хозяйствань предприятиятне лувовихть сурса, но синь аф ёмла путкссна Продовольственнай программать пяшкодемаса. Лама киза «Подкова» ООО-са аноклакшнесть кумыс, кона пачфневсь странань ламоц региоттненди. Тяни тястонь покодихне касфнихть племенной жуватат. Эрь кизоня хозяйствась мишенди ведьгемонь пря алаша. Сон, кода содаф, тишень и пинемонь кельги жувата, вов мес тяса тевс ноляви эрь частсь, штоба сяда лама анокламс тяфтама корма.
Кемнилие киза механизаторкс хозяйстваса покоди Александр Викторович Бушаев. Ломанць тевонь кельгихнень эзда, тяфтапнень колга корхнихть, кенерькшни сембоса. И тя видец тяфта, сон и ляди, и тюковандай.
—Мзярда улихть кормат, эста кармай и лофца, и сиволь,—мярьгсь Александр Бушаев.—Тялонь кофненди сатомшка ни анокламе и тишеда, и сенажда. Нюрьхкяня пингста ули урядаф кукурузаське.
Мордовия Республикань Велень хозяйствань и продовольствиянь министерствать даннаензон коряс, тячиень шити марнек республикаса аноклаф 28000 тонна тише, 329000 тонна сенаж. Тя сяда лама манать коряс. Лугатнень и паксятнень лангса кормань анокламась стаки мольфтеви.
Николай Лобанов.
Фототне авторть.