26 майста топодель 100 киза Великай Отечественнай войнань ветеранти, СССР-нь Писателень союзонь членти, мокшень содаф поэтти, Кяшалонь цёфксти Александр Степанович Малькинонди. И топодсь 30 киза, кода Кяшал велеса, поэтть шачема-касома уженясонза, кармасть ётафневома Малькинскяй лувоматне. А ушеткс теест путсь Мордовиянь Народнай поэтсь И.М.Девин. 1993 кизоня Малькинонди топодсь 70 киза. Саранскяйста сашендсь писателень оцю делегация. Синь ётксостольхть содаф учёнайсь, филологическяй наукань кандидатсь А.В.Алёшкин, писательхне, поэттне И.М.Девин, И.А.Калинкин, Г.И.Пинясов, С.В.Кинякин, И.Н.Кудашкин. Мордовскяй АССР-нь Заслуженнай учительсь, войнань ветеранць М.В.Кондрашкин азсь мяль—Малькинонди лемтьф илат ётафнемс эрь кизоня. Эста И.М.Девин мярьгсь: «Эрьда тячиень иланьконь лувсаськ ушетксокс тя оцю тевти».
Аф ваномок прябалатнень лангс, Малькинскяй лувоматне ётафневихть эрь кизоня. Колмогемонь кизоста лама содаф поэт, учёнай, журналист, композитор, скульптор, артист сашендсь Кяшалу. А.С.Малькинонь стихонзон лангс сёрматф аф фкя мора, стих. Синь кайгихть аф аньцек Малькинскяй лувоматнень, но и илатнень, концерттнень эса. А «Кяшал веленяй» морось, конань сёрмадозь Нина Кошелева и Илья Вешкин, арась ня лувоматненди Гимнакс.
Колмогемонце Малькинскяй лувоматне лемтьфтольхть содаф поэтть 100 кизонь топодеманцты. Райононь Культурань кудть фойесонза Атерень идень библиотекась аноклась «Эрь строчкаса седиень лямбоц» лем ала выставка. А лезкс тя тевса макссь А.С.Пушкинонь лемса Национальнай библиотекань главнай библиотекарсь В.И.Пронина. Выставкать мархта инжихнень содафтозень Л.К.Вешкина. Сон ащесь ниле пяльксста. Тясотольхть ташта фотографиятне, коса сонць Малькин, писатель ялганзон и мала раднянзон мархта. Няевикс вастсот литературнай критикнень, содаф писательхнень статьясна, рецензиясна и мяльсна, конат арасть сонь творчестванц колга цитатакс. Синь ётксост А.В.Алёшкин, М.И.Малькина, М.Г.Имяреков, В.И.Мишанина, конат аф весть ульсть Малькинскяй лувоматнень эса.
А.С.Малькинонди лемтьф оцю илась ушедсь Кяшал велеса. Саранскяйста саф инжихне, райононь делегациясь путсть панчфт А.С.Малькинонь калмонц лангс. Ётафтфоль аф оцю митинг, коса корхтасть Кяшал велень поселениянь оцюнясь П.Н.Лёвин, Мордовскяй (мокшень и эрзянь) народть Межрегиональнай общественнай организациянц председателец, филологическяй наукань докторсь Ю.А.Мишанин, Мордовия Республикань Заслуженнай писательсь Н.Б.Голенков, Перевесье велень основной общеобразовательнай школань директорсь С.Н.Руськина, Атерень поэтсь, трудонь ветеранць М.П.Надин.
Кяшалонь основной общеобразовательнай школаса инжихнень кшиса-салса васьфтезь ученикне. Национальнай щамса щаф стирнятне лувозь А.С.Малькинонди лемтьф стихснон, сонцень поэтть произведениянзон, а тяфта жа Атерень районца шачф-касф поэттнень стихснон. Шабатнень мархта работась мокшень кялень и литературань учительсь Н.Г.Панькина.
Школать инголе стяфтф поэтть бюстоц, конань тиезе Мордовиянь содаф скульпторсь Н.М.Филатов. Школать стенаса лятфнемань плита. Сонь тиезе Москувонь скульпторсь, Малькинонь землякоц Пётр Добаев (Офта). Инжихне путсть панчфт, лямбе валса лятфтазь скульпторхнень лемснон. Меле корхтамась поладовсь школань историко-краеведческяй музейса, коса ули уженя и А.С.Малькинонди. Экскурсиять ётафтозе мокшень кялень и литературань учительсь Л.П.Байчурина.
Литературнай оцю ила ётафтовсь школань фойеса. Инь няевикс вастса ащесь содаф поэтть портретоц. Вал максфоль Атюрьевскяй райононь оцюнять социальнай кизефкснень коряс заместителенцты Н.С.Шароновонди.
—Топодсь 30 киза, кода ушедсть ётафневома Малькинскяй лувоматне,—азозе Николай Семёнович.—Аф ваномок ковидть, лия туфталхнень лангс, синь ётнесть эрь кизоня и аф кальдявста. Александр Степанович 33 кизоса примафоль СССР-нь Писателень союзу.
Тя корхтамать поладозе Мордовия Республикань культурань, национальнай политикань и архивнай тевонь министрть васенце заместителец А.И.Карьгин. Сон отмечазе, што тячи А.С.Малькинонди лемтьф илат ётафтовихть аф аньцек Атюрьевскяй, но и лия райоттнень эса, Саранскяйса. Александр Степановичень творчестванцты кельгомась кизоста кизос аньцек касы.
Лама цебярь мяльда-арьсемада азсть Мордовскяй (мокшень и эрзянь) народть Межрегиональнай общественнай организациянц председателец, филологическяй наукань докторсь Ю.А.Мишанин, Мордовия Республикань Писателень союзть Председателенц заместителец, Мордовия Республикань Заслуженнай писательсь Н.Б.Голенков, Россиянь Писателень союзонь членць Н.Л.Храмов.
Оцю мяльса илас сафне кулхцондозь «Мокшень правда» газетать главнай редакторонц О.В.Евдокимовать, «Якстерь тяштеня» идень журналть главнай редакторонц В.И.Брындинать, «Мокша» журналть главнай редакторонц М.В.Аникинать выступленияснон. Синь нинге школаса тонафнемста примсесть участия Малькинскяй лувоматнень эса.
Атерень районца шачсь лама содаф, асу ломаньда. Нят: Ф.М.Костяйкин, И.В.Надёжкин, И.И.Поршин, Н.Н.Балашов, конат тяшнесть стихт, нолясть книгат. Н.Н.Балашов эряй Севастопольса, вятьсы мордовскяй землячествать. Рузонь, мокшень кяльса тяшти стихт, морот. Ётафни тоса Малькинскяй лувомат.
Педагогическяй трудонь ветеранть, Кяшалонь мокшавать Н.Н.Трунькинать аляц, Н.П.Чепайкин, цебярь ялгаль Александр Степановиченди. Поэтсь сидеста сашендсь ширезост, седикс-ваймокс корхнесь фронтовик ялганц мархта. Нина Николаевна эрь кизоня примси участия Малькинскяй лувоматнень эса. Маряй гордость эсь земляконзон инкса. Тяддень лувоматнень эса морафтозе Ф.М.Костяйкинонь А.С.Малькинонди лемтьф стихонц.
Колмогемонь кизоста кит аньцек ашельхть Малькинскяй лувоматнень эса. Васенце илатнень ётафтомста активнай участия примасть М.В.Кондрашкин, В.Н.Равочкин, В.М.Сиркин, М.Я.Зеленов, лиятне. Ламоксть сашендсь илас Чудинкань поэтсь В.Ф.Ерцкин. Сон лемдсь аф фкя стих А.С.Малькинонди.
Атерень Культурань кудса тя шиня кайгсть мокшень морот, конатнень моразь Дарья Гальцова, Нина Шумкина, Марина Калинкина, Валентина Акиняева, Ирина Тремасова и лиятне. Игорь Тишкин, Михаил Вешкин, Дарья Петяйкина, Ирина Макарова лувозь А.С.Малькинонь стихонзон. Ульсть казнетка. Атюрьевскяй райононь администрациясь Почётнай грамотаса казезень Кяшалонь средняй общеобразовательнай школань учительхнень В.А.Сятишевать, Л.С.Кяльгинать, тонафнихнень Кристина Чепайкинать, Дарья Петяйкинать и лиятнень.
Колмогемонце Малькинскяй лувоматне ётасть мялень салайста. Эсост примась участия лама ломань. Илать анокламаса аф кржа вий путсть Атюрьевскяй райононь оцюнять социальнай кизефкснень коряс заместителец Н.С.Шаронов, Кяшал велень поселениянь оцюнясь П.Н.Лёвин.
Илья ВЕШКИН,
Россиянь Писателень
союзонь член.