Кадсь эсь колганза цебярь лятфнемат

10 майста топодель 73 киза журналистти, писательти, Россиянь Писателень союзонь членти, Мордовия Республикань культурань Заслуженнай работникти В.М.Лобановонди. Аф сай верондамаце, што тя ару вайме, панжада седи ломанць аш мархтонк. Лувихне учсть эздонза од произведеният, книгат. И виденц корхтайхть, што писательхне аф кулсихть, эряйхть снярс, мзярс улихть школатнень, библиотекатнень эса книгасна, аф кири лувихнень лувкссна. «Калонь кунциень азкст» (1992 к.), «Шкаень толня» (2000 к.), «Эрянь надиязь» (2006 к.), «Вень озкс», «Сюлмоняса мода» (2012 к.) стихонь, азксонь, пеетьксонь, лятфнемань, перьфпяльть колга лия книганзон пара мяльса морафнесазь иттне, учительхне, вузонь и колледжень студенттне, преподавательхне. Тяштихть писательть творчестванц колга сочиненият, рефератт, курсовой и дипломнай работат. Ламоц стихонза, азксонза сувафтфт тонафнемань книгатненди.
В.М.Лобанов шачсь Кадошкинскяй райононь Пою велеса. Средняй школать аделамдонза меле поступась тонафнема Мордовскяй госуниверситетонь филологическяй факультету. Кафта кизода меле ётась тонафнема М.Горькаень лемса Москувонь литературнай институту. Аделамдонза меле сявозь покодема республиканскяй радио и телевидениянь литературно-драматическяй вещаниянь редакцияв старшай редакторкс. Тоста ётафтозь художественнай вещаниянь редакциянь главнай редакторкс. Пцтай 25 киза «служась» радиоти и телевиденияти. Мзяра цебярь работа аноклась-тись тоса покодемста. Пцтай сембе синь сувасть радионь и телевидениянь зрнянь фондти. А сяльде комозьда лама киза макссь «Мокша» журналти. Ульсь редакторти заместителькс, главнай редакторкс. Васенце стихонза «Исса ляйнясь» и «Сёксень пяляз вармась» лиссть «Мокша» журналса 1969 кизоня. Эста теенза ульсь 19 киза. И ведьгемоньда лама киза Виктор Михайлович «служась» журналистикати, литературати. Сёрмадсь аф аньцек художественнай произведеният. Сонь перанц алда лиссть очеркт, фельетотт, творческяй портретт, рецензият. А мзяра од ломаненди лезнесь тяштемань тевса, мумс эсь вастснон мокшэрзянь литератураса. Кода главнай редактор, тись аф кржа «Мокша» журналти.
В.М.Лобанов кадсь цебярь произведеният. Но, койсон, творчестванцты афкуксонь питне апак макст. Цебярь работат Виктор Михайловичень творчестванц колга тяшнесть филологическяй наукань кандидатсь М.И.Малькина, писательсь Г.И.Пинясов. Тяни кассь учёнаень, литературнай критиконь од поколения. Теест эряви шарфтомс мяль В.М.Лобановонь творчестванц лангс.
Илья ВЕШКИН,
Россиянь Писателень союзонь член.